Astudiaethau Cydymaith Meddygol, MSc

Disgwylir i fyfyrwyr astudio modiwlau gwerth 120 o gredydau ym mhob blwyddyn astudio.

I wneud cais ar gyfer y rhaglen hon, rhaid eich bod chi wedi cyflawni'r canlynol erbyn i chi wneud cais:

• O leiaf radd C mewn TGAU Mathemateg
• O leiaf radd C mewn TGAU Cymraeg/Saesneg

AC wedi cyflawni (neu disgwylir i chi gyflawni) o leiaf un o'r canlynol:

• 2:2 mewn gradd Baglor israddedig neu radd Meistr integredig mewn pwnc gofal iechyd neu'r biowyddorau (enghreifftiau isod), neu
• 2:1 mewn gradd Baglor israddedig neu radd Meistr integredig mewn pwnc ar wahân i ofal iechyd neu’r biowyddorau, gyda phrofiad gwaith perthnasol ac arddangos gwerthoedd yn unol â chyfansoddiad y GIG. Caiff ceisiadau eu hystyried ar sail unigol.

Mae enghreifftiau o raddau gofal iechyd a'r biowyddorau perthnasol yn cynnwys:

• Gwyddorau Bywyd: Anatomeg, Bioleg, Ffisioleg, Bioleg Ddynol, Niwrowyddoniaeth, Ffisioleg, Seicoleg, Gwyddor Fiolegol, Microbioleg

• Gofal iechyd: Ffisiotherapi, Delweddu Diagnostig; Radiotherapi, Astudiaethau Parafeddygol, Awdioleg, Deintyddiaeth, Ymarfer yn yr Adran Lawdriniaeth, Optometreg, Bydwreigiaeth

• Gwyddorau Biofeddygol: Gwyddor Fiofeddygol, Gwyddorau Meddygol Cymhwysol, Fferylliaeth, Gwyddor Fferyllol, Cemeg Feddyginiaethol, Biocemeg, Peirianneg Feddygol, Peirianneg Fiofeddygol, Geneteg Feddygol

*os ydych yn aros am ganlyniad gradd i ategu eich cais, rhaid ei gadarnhau erbyn 31 Gorffennaf fan bellaf yn y flwyddyn y bwriedir cofrestru. Caiff cynigion sy'n amodol ar ganlyniadau gradd eu tynnu'n ôl os nad yw'r canlyniad wedi'i gadarnhauar ôl y dyddiad hwn.

Cofrestru cydamserol

Nid yw rheoliadau'r Brifysgol yn caniatáu i fyfyrwyr fod wedi’u cofrestru ar y rhaglen Astudiaethau Cydymaith Meddygol ac ar unrhyw raglen arall sy'n cynnig dyfarniad ar yr un pryd, boed yn y brifysgol hon neu mewn unrhyw brifysgol arall. Rhaid i bob rhaglen radd arall gael ei chwblhau cyn cofrestru ar y rhaglen hon.

Cymhwysedd ar gyfer bwrsariaethau

Mae'r rhaglen MSc Astudiaethau Cydymaith Meddygol yn gyfyngedig i ymgeiswyr o'r DU/UE sy'n gymwys ar gyfer cyllid Bwrsariaeth y GIG. Mae gwybodaeth am sut i gadarnhau eich bod yn gymwys i'w gweld ar dudalen Asesiad Statws Ffioedd y Brifysgol. Mae gwybodaeth am Fwrsariaeth y GIG i'w gweld yma.

Nid yw'r rhaglen hon ar agor i ymgeiswyr sydd eisoes wedi dilyn rhaglen Astudiaethau Cydymaith Meddygol (yn gyfan gwbl neu'n rhannol), ac ni chaniateir trosglwyddo o raglenni Astudiaethau Cydymaith Meddygol eraill.

Bydd eich addysgu wyneb yn wyneb ar y campws yn cael ei ategu gan labordai sgiliau clinigol, lleoliadau clinigol gydag asesiad, Profion Cynnydd, cyflwyniadau a thraethodau, ac arholiad clinigol gwrthrychol wedi'i strwythuro, dysgu drwy'r we ac e-ddysgu. Drwy gydol eich gradd, bydd y pwyslais ar sgiliau ymarferol yn ogystal â rhai dadansoddol.

Rydyn ni'n falch o gynnig profiad addysgol rhagorol, gan ddefnyddio'r ymagweddau dysgu ac addysgu mwyaf effeithiol, sydd wedi cael eu teilwra'n ofalus i gydweddu ag anghenion penodol eich cwrs. Ar wahân i nifer fach o gyrsiau ar-lein yn unig, mae'r rhan fwyaf o'n cyrsiau yn cynnwys addysgu wyneb yn wyneb ar y campws, gan eich galluogi chi i ryngweithio’n llawn â'ch darlithwyr a'ch cyd-fyfyrwyr.

Cynhelir sesiynau sgiliau ymarferol, seminarau gwaith mewn labordai, a gweithdai sydd gan amlaf ar ffurf wyneb yn wyneb, gan alluogi gweithio mewn grwpiau, ac arddangosiadau. Rydyn ni hefyd yn gweithredu labordai rhithwir ac amgylcheddau dysgu efelychol a fydd yn galluogi myfyrwyr i achub ar gyfleoedd hyfforddiant yn y dyfodol. Fodd bynnag, mae ein hymagwedd hefyd yn cynnwys rhywfaint o ddysgu  ar-lein i ategu ac atgyfnerthu addysgu wyneb yn wyneb traddodiadol. 

Gellir cynnal dysgu ar-lein 'yn fyw' drwy ddefnyddio meddalwedd megis Zoom, gan eich galluogi i ryngweithio â'r darlithydd a'r myfyrwyr eraill ac i ofyn cwestiynau. Mae recordiadau o ddarlithoedd hefyd yn caniatáu am fwy o hyblygrwydd i ail-ymweld â deunyddiau, adolygu ar gyfer asesiadau ac atgyfnerthu dysgu y tu allan i'r ystafell ddosbarth. Mae gan rai modiwlau adnoddau ychwanegol yn Canvas, megis fideos, sleidiau a chwisiau sy'n galluogi rhagor o hyblygrwydd wrth astudio.  

Rhywfaint o ddarpariaeth

Darperir rhai elfennau o'r cwrs ôl-raddedig hwn trwy gyfrwng y Gymraeg ond nid oes digon o ddarpariaeth eto i gyrraedd 40 credyd ym mhob blwyddyn. Gall Cyfarwyddwr Rhaglen amlinellu union natur y ddarpariaeth cyfrwng Cymraeg.

Mae Academi Hywel Teifi yma i'th gefnogi trwy gydol dy amser ym Mhrifysgol Abertawe. Rydym yn cynnig:

• Mynediad at ysgoloriaethau a bwrsariaethau ar gyfer astudio trwy gyfrwng y Gymraeg.
• Mynediad at ap Arwain er mwyn derbyn y diweddaraf am ein cyrsiau a'n modiwlau cyfrwng Cymraeg. Gelli lawrlwytho'r ap am ddim drwy'r App Store a Google Play.
• Cyfweliad trwy gyfrwng y Gymraeg wrth wneud cais am le.
• Gohebiaeth bersonol yn Gymraeg, yn Saesneg neu'n ddwyieithog.
• Cyfle i lunio a chyflwyno gwaith cwrs neu sefyll arholiadau trwy gyfrwng y Gymraeg (hyd yn oed os wyt ti wedi dewis astudio yn Saesneg), a bydd dy waith yn cael ei asesu yn Gymraeg.
• Mentor Academaidd Cymraeg ei iaith.
• Cefnogaeth un i un i wella dy sgiliau Cymraeg academaidd.
• Cyfle i ennill cymhwyster ychwanegol sy'n dystiolaeth o dy allu Cymraeg i gyflogwyr y dyfodol.
• Aelodaeth o Gangen Prifysgol Abertawe o'r Coleg Cymraeg Cenedlaethol.

Cer i'r dudalen Mae Gen i Hawl am wybodaeth bellach am hawliau iaith Gymraeg myfyrwyr.

Bydd parhau i astudio trwy'r Gymraeg yn:

• ddatblygiad naturiol i ti os wyt ti wedi astudio trwy'r Gymraeg ar lefel israddedig.
• ffordd o sicrhau dy gyfle i gael yr addysg orau.
• ffordd o dderbyn lefel uchel o gefnogaeth wrth i'r grwpiau astudio fod yn llai.
• ychwanegiad gwerthfawr i dy CV a dy ddatblygiad gyrfaol.

Caiff myfyrwyr Astudiaethau Cydymaith Meddygol eu haddysgu gan amrywiaeth o ymchwilwyr blaenllaw yn yr Ysgol Feddygaeth, gan roi mynediad heb ei ail i chi at ein hymchwil feddygol ddiweddaraf.

Y prif aelodau staff sy'n cefnogi'r cwrs MSc Cydymaith Meddygol yw:

• Cyfarwyddwr y Rhaglen: Dr Sharon Hartwell
• Dirprwy Gyfarwyddwr y Rhaglen ac Arweinydd Cwricwlwm: Dr Balwinder Bajaj
• Dirprwy Gyfarwyddwr y Rhaglen ac Arweinydd Sgiliau Clinigol: Dr Sharon Hartwell
• Dirprwy Gyfarwyddwr y Rhaglen: Yr Athro Cysylltiol Alys Einion

Arweinwyr Derbyn

• Dr Arun Ramachandran
• Dr Mike Gilbert

Arweinwyr Blociau Addysgu

• Gwyddor Gardiofasgwlaidd: Dr Balwinder Bajaj
• Gwyddor Anadlu: Dr Narendra Chinnappa
• Gwyddor Gastroberfeddol Dr Lisa Williams, Dr Sophie Henson
• Niwroleg: Dr Marguerite Hill
• Gwyddor Gyhyrysgerbydol Dr Stuart Kyle
• Gwyddor Fetabolaidd Dr Richard Chudleigh
• Iechyd Meddwl: Dr Rob Stamatakis
• Haematoleg a Dermatoleg Dr Rhian Jones, Dr Sairan Whittaker
• Anatomeg: Dr Chris Summers, Dr Marcela Bezdickova

Arweinwyr Eraill

• Arweinydd Sgiliau Clinigol: Dr Sharon Hartwell
• Arweinydd Blwyddyn 1: Andrew Leckie PA-R
• Arweinydd Sgiliau Gweithdrefnol, Arweinydd Blwyddyn 2 ac Uwch-fentor Academaidd: Mrs Collette Hill
• Arweinydd Asesiadau Prawf Cynnydd: Mr Steve Capey
• Arweinydd Anatomeg: Dr Chris Summers
• Arweinydd Dysgu Cymunedol: Dr Llinos Roberts
• Arweinydd Lleoliadau Clinigol: Dr Narendra Chinnappa
• Arweinydd Pynciau Dewisol: Dr Balwinder Bajaj
• Arweinydd Cymorth ac Arweiniad Myfyrwyr: Dr Claire Vogan
• Arweinydd Iechyd ac Ymddygiad: Mr Neil Price
• Arweinwyr Ansawdd: Dr Ujjal Choudhuri, Dr Aidan Byrne

Mae ffioedd dysgu ar gyfer blynyddoedd o astudiaeth ar ôl eich blwyddyn gyntaf yn amodol ar gynnydd o 3%.

Gallwch ddod o hyd i ragor o wybodaeth am ffioedd a sut i dalu ar ein tudalen ffioedd dysgu.

Efallai y byddwch yn gymwys i gael arian i helpu i gefnogi eich astudiaethau. I gael gwybod am ysgoloriaethau, bwrsariaethau a chyfleoedd cyllido eraill sydd ar gael, ewch i dudalen ysgoloriaethau a bwrsariaethau'r Brifysgol.

Myfyrwyr cyfredol: Gallwch ddod o hyd i ragor o wybodaeth am ffioedd a sut i dalu ar ein tudalen ffioedd dysgu.

Mae’n bosib eich bod yn gymwys i gael cymorth ariannol tuag at eich astudiaethau.

Os ydych yn fyfyriwr y DU neu'r UE sy’n dechrau ar radd Meistr ym Mhrifysgol Abertawe, efallai y byddwch yn gymwys i gyflwyno cais am arian gan y Llywodraeth i helpu tuag at gostau eich astudiaethau. I gael mwy o wybodaeth, ewch i'n tudalen benthyciadau Ôl-raddedig.

I gael gwybod am ysgoloriaethau, bwrsariaethau a chyfleoedd eraill am gymorth ariannol sydd ar gael, ewch i dudalen ysgoloriaethau a bwrsariaethau'r Brifysgol.

Mae ysgoloriaethau a bwrsariaethau hael ar gael gan Academi Hywel Teifi, Prifysgol Abertawe a’r Coleg Cymraeg Cenedlaethol ar gyfer myfyrwyr sy'n dymuno astudio trwy gyfrwng y Gymraeg neu'n ddwyieithog. I ddysgu mwy am y cyfleoedd sydd ar gael i chi, ewch i dudalen Ysgoloriaethau a Bwrsariaethau Academi Hywel Teifi

Lleoedd a Ariennir

Cefnogir y rhaglen Cydymaith Meddygol ar hyn o bryd drwy fwrsariaeth Llywodraeth Cymru. Ar gyfer 2022/23 gallwn gadarnhau bod 36 o leoedd a ariennir wedi cael eu cynnig i ni ar y rhaglen Cydymaith Meddygol.

Mae Llywodraeth Cymru wedi ein hysbysu y bydd cyllid ar gyfer y cwrs hwn wedi ei gyfyngu i fyfyrwyr sy'n fodlon ymrwymo i weithio yng Nghymru am 18 mis ar ôl cymhwyso. Drwy dderbyn gwahoddiad i gyfweliad, rydych yn cadarnhau eich bod yn ymrwymo i hyn. Ni fydd y pecyn cyllido llawn ar gael ond i unigolion sy'n fodlon gwneud yr ymrwymiad hwn. Rhowch wybod i ni cyn gynted â phosib os hoffech dynnu'ch cais yn ôl neu os nad ydych am dderbyn eich gwahoddiad i gyfweliad. Ar hyn o bryd, ni allwn gynnig lleoedd i fyfyrwyr sy'n talu eu ffioedd eu hunain.

Cynllun Bwrsariaethau GIG Cymru

Mae Llywodraeth Cymru, drwy GIG Cymru, yn darparu cyllid ar gyfer y cwrs Cydymaith Meddygol yma yn Abertawe gan gynnwys cost ffioedd dysgu. Gellir gwneud cais am grant o £1000 nad yw'n dibynnu ar brawf modd. Mae bwrsariaeth arall sy'n ddibynnol ar brawf modd ar gael hefyd. Os ydych yn gymwys i gael bwrsariaeth sy'n dibynnu ar brawf modd, gallech gael cymorth ar gyfer teithio, llety (tra byddwch ar leoliad), gofal plant, Lwfans i Fyfyrwyr Anabl, Lwfans Dibynnydd a Lwfans Dysgu i Rieni.

*Am ragor o fanylion darllenwch ddogfen Telerau ac Amodau Cynllun Bwrsariaethau GIG Cymru, gan mai GIG Cymru sy'n gweinyddu’r bwrsariaethau hyn, nid Prifysgol Abertawe.

Costau Ychwanegol

Bydd mynediad i'ch dyfais ddigidol eich hun/y pecyn TG priodol yn hanfodol yn ystod eich amser yn astudio ym Mhrifysgol Abertawe. Bydd mynediad at wifi yn eich llety hefyd yn hanfodol i'ch galluogi i ymgysylltu'n llawn â'ch rhaglen. Gweler ein tudalennau gwe pwrpasol i gael arweiniad pellach ar ddyfeisiau addas i'w prynu, ac i gael canllaw llawn ar sefydlu'ch dyfais.

Efallai y byddwch chi'n wynebu costau ychwanegol tra byddwch chi yn y brifysgol, gan gynnwys (ond heb fod yn gyfyngedig i):

• Teithio i'r campws ac oddi yno
• Costau argraffu, llungopïo, rhwymo, deunydd ysgrifennu ac offer (e.e. ffyn USB)
• Prynu llyfrau neu werslyfrau
• Gwisgoedd ar gyfer seremonïau graddio

Bydd lleoliadau gwaith ar draws y rhanbarth a'r myfyriwr fydd yn gyfrifol am dalu costau teithio rhwng y safleoedd. Cysylltwch â Swyddfa Gwybodaeth Myfyrwyr ac Addysg yr Ysgol Feddygaeth am ragor o wybodaeth.

Efallai y byddwch yn wynebu costau ychwanegol yn ystod eich amser yn y Brifysgol, gan gynnwys y canlynol (ond heb fod yn gyfyngedig iddynt):

• Prynu stethosgop
• Llyfrau, deunyddiau cwrs a chostau argraffu neu lungopïo (mae llawer o'r llyfrau testun a argymhellir ar gyfer y cwrs hwn ar gael yn llyfrgelloedd y Brifysgol neu'r ysbytai)
• Parcio'n lleol a theithio i'r campws ac oddi yno neu i safle addysgu Ysbyty Treforys ac oddi yno
• Llungopïo a phrynu deunyddiau ysgrifennu, cofau bach
• Llogi gwisg academaidd ar gyfer graddio

Nid yw'r Arholiad Cenedlaethol Ardystio ar gyfer Cymdeithion Meddygol yn rhan o'r cwrs a bydd rhaid i fyfyrwyr wneud eu trefniadau eu hunain i sefyll yr arholiad hwn. Y myfyriwr fydd yn gyfrifol am yr holl gostau sy'n gysylltiedig â hyn.

Mae Academi Cyflogadwyedd Abertawe'n cefnogi myfyrwyr Prifysgol Abertawe ar bob cam yn eu taith yrfaol.

Mae ein gwasanaethau cymorth gyrfaoedd yn cynnwys:

• Gweithdai cyflogadwyedd, sgyrsiau gan gyflogwyr, digwyddiadau pwrpasol a ffeiriau gyrfaoedd
• Cyngor ac arweiniad unigol gan Ymgynghorwyr Gyrfaoedd proffesiynol
• Cymorth i chwilio am swyddi, interniaethau, lleoliadau gwaith a chyfleoedd gwirfoddoli
• Mynediad i adnoddau gwybodaeth am amrywiaeth eang o bynciau rheoli gyrfa

Rydym hefyd yn darparu cymorth a chyngor i gyn-fyfyrwyr Prifysgol Abertawe am hyd at bum mlynedd ar ôl iddynt raddio.

Yn ogystal â chymorth pwnc penodol gan staff addysgu'r coleg a'ch mentor academaidd personol, mae'r Ganolfan Llwyddiant Academaidd yn darparu cyrsiau, gweithdai a chymorth un-i-un mewn meysydd fel:

• Ysgrifennu academaidd
• Mathemateg ac ystadegau
• Meddwl critigol
• Rheoli amser
• Sgiliau digidol
• Sgiliau cyflwyno
• Cymryd nodiadau
• Technegau adolygu, dysgu ar gof ac arholiadau
• Sgiliau Saesneg (os nad Saesneg yw eich iaith gyntaf)

Yn ogystal, os oes gennych Anhawster Dysgu Penodol (ADP/SpLD), anabledd, cyflwr iechyd meddwl neu gyflwr meddygol, mae gan y Ganolfan Llwyddiant Academaidd Diwtoriaid Arbenigol i gefnogi'ch dysgu. Bydd y tiwtoriaid yn gweithio ochr yn ochr â'r Swyddfa Anabledd a'r Gwasanaeth Lles i gefnogi eich holl anghenion a gofynion tra byddwch yn astudio ym Mhrifysgol Abertawe.

Mentor Academaidd Personol: 

Neilltuir Mentor Academaidd i chi o blith staff academaidd cymwys yn yr Ysgol Feddygaeth, neu efallai o blith staff clinigol o Fyrddau Iechyd yn achos GEM a PA.  

Mentoriaid Academaidd Personol yw eich pwynt cyswllt cyntaf wrth astudio yn yr Ysgol Feddygaeth a gallant ddarparu cymorth a chyngor ar amrywiaeth o faterion a allai effeithio ar eich lles, eich presenoldeb a'ch cynnydd addysgol. Gallai Mentoriaid Academaidd Personol hefyd eich helpu gyda'ch cynllunio datblygu personol a chyngor gyrfaoedd. Gall eich mentor hefyd eich cyfeirio at y gwasanaeth Lles a gwasanaethau cymorth eraill, fel y bo'n briodol.  

Swyddfa Wybodaeth yr Ysgol Feddygaeth: 

Mae'n tîm o weinyddwyr a chydlynwyr gwybodaeth myfyrwyr wrth law i roi cymorth gyda'ch ymholiadau academaidd a'ch cyfeirio at wasanaethau ychwanegol pan fydd angen.  

Rhaid ymgeisio drwy UCAS, ac mae’r broses yn agor ddiwedd mis Medi bob blwyddyn.

Deallwn y gallai ymgeiswyr gynnwys mathau gwahanol o gyrsiau yn eu dewisiadau UCAS. O ganlyniad, efallai na fydd Datganiadau Personol rhai ymgeiswyr yn mynegi popeth maen nhw am ei ddweud am eu profiadau a'r hyn sy'n eu hysgogi i astudio i fod yn Gydymaith Meddygol. Byddem yn hapus i dderbyn Datganiadau Personol atodol a anfonir i Dîm Derbyn y rhaglen Cydymaith Meddygol. Bydd y rhain yn disodli Datganiadau Personol a gyflwynir drwy UCAS.

*Mae'r broses ymgeisio'n cael ei hadolygu drwy'r amser - sylwer, mae Ysgol Feddygaeth Prifysgol Abertawe'n cadw'r hawl i newid y broses asesu yn unol â’r hyn sy’n addas ar gyfer pob cylch ymgeisio.

Argymhellwn eich bod chi'n cyflwyno eich cais am le ar ein cyrsiau mor fuan â phosibl cyn ein dyddiadau cau ar gyfer cyflwyno cais. Bydd cyrsiau'n cau yn gynharach na'r dyddiadau cau a restrir os caiff yr holl leoedd eu llenwi. Mae rhagor o wybodaeth ar gael ar ein tudalen we Dyddiadau cau ar gyfer cyflwyno cais.

Datganiad Personol

Rhaid i bob ymgeisydd ddarparu datganiad personol sy'n dangos tystiolaeth o brofiad gofalu, dealltwriaeth o rôl Cydymaith Meddygol a'r rhinweddau personol ac academaidd sydd eu hangen ar gyfer y cwrs ac wrth ymarfer yn y dyfodol.

Ni chaiff ceisiadau a dderbynnir eu hystyried tan ar ôl y dyddiad cau, ddiwedd mis Ionawr yn y flwyddyn y bwriedir dechrau. Yna caiff cyfweliadau eu cynnig i ymgeiswyr yn seiliedig ar eu datganiad personol a bodloni'r gofynion mynediad.

Caiff ceisiadau eu hasesu gan y tîm derbyn ddechrau mis Ebrill yn y flwyddyn y bwriedir dechrau. Caiff datganiadau personol eu hadolygu gan banel o academyddion a chlinigwyr a phenderfynir pwy i'w wahodd am gyfweliad.

Yn ddelfrydol dylai datganiadau personol ddangos dealltwriaeth dda o rôl Cydymaith Meddygol a rhesymau clir am pam mae’r ymgeisydd am ddilyn gyrfa fel Cydymaith Meddygol.

Cyfweliad

Cynlluniwyd proses y cyfweliad i ystyried y rhinweddau personol ac academaidd mae eu hangen ar Gydymaith Meddygol, a'r gallu i fodloni Fframwaith Cymhwysedd a Chwricwlwm Cyfadran y Cymdeithion Meddygol.  

Yn gryno, y rhain yw:

• Sgiliau Cyfathrebu
• Ymdopi â phwysau a gwytnwch
• Craffter ac Uniondeb
• Angerdd am y rhaglen
• Dealltwriaeth o gwmpas ymarfer

Ar ddiwrnod eich cyfweliad, fe'ch gwahoddir i gymryd rhan mewn dau gyfweliad ar wahân, a fydd ill dau'n para 20 munud. Cânt eu cynnal gan barau o gyfwelwyr hyfforddedig, sy'n aelodau o'n panel o glinigwyr, academyddion a myfyrwyr cydymaith meddygol. Caiff eich datganiad personol ei ystyried a'i drafod yn ystod y cyfweliad.

Amodau'r Cynnig

Mae unrhyw gynnig a wneir yn amodol ar dystiolaeth o gymwysterau, geirdaon boddhaol, gwiriad y Gwasanaeth Datgelu a Gwahardd (DBS) neu'r heddlu a chliriad iechyd galwedigaethol.

*Mae'r broses ymgeisio'n cael ei hadolygu'n gyson - sylwer, mae Ysgol Feddygaeth Prifysgol Abertawe'n cadw'r hawl i newid y broses asesu ar gyfer pob cylch ymgeisio. 

Cynyddu Darpariaeth Gweithiwyr Proffesiynol Perthynol i Iechyd yng Nghymru

Mae gennym becyn o fesurau ar waith i gyflawni'r argymhellion o ran cynyddu darpariaeth Meddygon i Gymru. Mewn modd tebyg, byddwn yn cynnig cyfweliadau am y lleoedd sy'n weddill ar ein rhaglen Cydymaith Meddygol ar sail lleoliad cartref, ysgol uwchradd a fynychwyd a rhanbarth cartref, gan roi blaenoriaeth i geisiadau gan fyfyrwyr o Gymru. Mae manylion llawn ar gael yn ein. 

Rhaid i ysgolion meddygol ystyried effaith cyflyrau iechyd ac anableddau ar addasrwydd myfyrwyr i ymarfer fel meddyg. Mae hyn o ganlyniad i'r ffaith bod ganddynt gyfrifoldeb am sicrhau bod myfyrwyr yn gymwys i gael eu cofrestru gyda'r Cyngor Meddygol Cyffredinol.   Mae pob cynnig yn amodol ar gadarnhad gan iechyd galwedigaethol o addasrwydd i ymarfer. Bydd y manylion y byddwch yn eu darparu hefyd yn ein helpu i ystyried pa addasiadau rhesymol sy'n bosib er mwyn cynorthwyo gyda'ch heriau iechyd a’ch anableddau penodol.

Os oes gennych anabledd, gwnewch yn siŵr eich bod yn nodi hyn ar y ffurflen UCAS drwy roi tic yn y blwch perthnasol.  Ni fydd datgelu hyn yn effeithio ar sgrinio eich cais. Os gwneir cynnig, bydd yr Adran Iechyd Galwedigaethol yn cysylltu â chi i drafod eich sefyllfa.

Os ydych yn ansicr sut bydd anabledd yn rhan o'r broses cyflwyno cais neu os oes angen rhagor o wybodaeth arnoch, e-bostiwch y tîm Iechyd Galwedigaethol yn occupational-health@abertawe.ac.uk. Dylech hefyd hysbysu'r tîm derbyn os ydych yn gymwys am ystyriaethau arbennig yn ystod y profion ysgrifenedig neu’r cyfweliadau ar sail eich anabledd.

Sgrinio Iechyd a Gwiriadau Datgelu a Gwahardd

Bydd yn rhaid i'r holl ymgeiswyr llwyddiannus sy'n derbyn lle gwblhau datganiad iechyd a ffurflenni imiwneiddio. Bydd gan eich Meddyg Teulu fynediad at fanylion eich hanes imiwneiddio a dylai allu rhannu hyn â chi ar gais.  Caiff y rhain eu sgrinio gan ein Hadran Iechyd Galwedigaethol. Bydd Meddyg Iechyd Galwedigaethol yn cysylltu â rhai myfyrwyr i gael rhagor o wybodaeth lle bo'n briodol.  Gallai adolygiad iechyd galwedigaethol gynnwys profion gwaed ac imiwneiddiadau i sicrhau'ch diogelwch chi yn ogystal â diogelwch cleifion.

Bydd yn rhaid i fyfyrwyr gwblhau gwiriad manwl llwyddiannus gan y Gwasanaeth Datgelu a Gwahardd cyn cael eu derbyn i’r cwrs.