Cyllid y Llywodraeth i Ôl-raddedigion

Am ragor o wybodaeth, ewch i wefan Cyllid Myfyrwyr Cymru neu ffoniwch Cyllid Myfyrwyr Cymru ar: 0300 100 0494 .

Cyllid i fyfyrwyr o Gymru astudio am radd meistr

2024/2025 - Benthyciad heb brawf modd o hyd at £18,950. Yn amodol ar gymeradwyaeth seneddol.

Pwy sy'n gymwys?

• Ar gael i gyrsiau gradd meistr ym Mhrifysgol Abertawe, gan gynnwys MA, MSc, LLM, MRes, Meistr drwy Ymchwil ac MPhil. Nid yw cyrsiau PGCert na PGDip yn gymwys.
• Rhaid bod eich cwrs yn rhaglen meistr gyflawn (nid cwrs atodol megis rhaglen meistr integredig). Os ydych yn bwriadu ymgymryd ag astudiaeth ddoethurol gyda chymorth benthyciad PhD ar ôl eich gradd Meistr, rhaid bod eich cwrs yn rhaglen PhD gyflawn, nid gradd sy'n cynnwys ‘elfen atodol’ drwy gymhwyster Meistr, megis Meistr drwy Ymchwil neu MPhil.
• Rhaid i chi fyw yng Nghymru fel arfer, a heb fod wedi symud yno at ddibenion astudio.
• Rhaid eich bod yn iau na 60 oed ar ddiwrnod cyntaf blwyddyn academaidd gyntaf eich cwrs.
• Rhaid bod eich cwrs yn werth o leiaf 180 o gredydau - holwch ein Tîm Derbyn os nad ydych yn siŵr.
• Ar gael i ymgeiswyr nad oes ganddynt gymhwyster lefel gradd meistr (neu uwch) eisoes (mae deiliaid PGCert a PGDip yn gymwys i wneud cais am gyllid).
• Gellir astudio'r cwrs ym Mhrifysgol Abertawe neu drwy ddysgu o bell. Gall fod yn gwrs wedi'i addysgu neu ar sail ymchwil a gellir ei astudio ar sail:
  • Amser llawn, am un neu ddwy flynedd academaidd;
  • Rhan-amser, am dair neu bedair blynedd academaidd.

Ceisiadau ac ad-daliadau

Am ragor o wybodaeth, ewch i wefan Cyllid Myfyrwyr Cymru.

Mae ceisiadau am fenthyciadau meistr a PhD ar gyfer Myfyrwyr o Gymru a Lloegr NAWR ar agor! 

Mae Student Finance England yn darparu benthyciadau ôl-raddedig i fyfyrwyr sy’n byw yn Lloegr a fydd yn dechrau cwrs meistr mewn unrhyw brifysgol yn y DU (gan gynnwys Abertawe) o fis Medi 2023.

Gallech fenthyca hyd at £12,167 tuag at gostau astudio am gymhwyster ôl-raddedig, gan gynnwys ffioedd dysgu a chostau byw (sy'n cael eu talu'n uniongyrchol i chi).

Cymhwysedd Preswylio

Gallwch dderbyn Benthyciad i astudio am Radd Meistr Ôl-raddedig os ydych yn bodloni'r holl amodau canlynol:

• rydych yn ddinesydd y DU neu'r UE (statws preswylydd sefydlog neu breswylydd cyn-sefydlog), neu mae gennych 'statws sefydlog' sy'n golygu nad oes cyfyngiadau ar faint o amser y gallwch aros
• rydych yn byw yn Lloegr fel arfer, a heb fod wedi symud yno at ddiben astudio yn unig
• rydych wedi bod yn byw yn y DU, Ynysoedd y Sianel neu Ynys Manaw am dair blynedd cyn dechrau eich cwrs

Eich Cwrs

Mae'n rhaid ei fod:

• yn gwrs meistr (nid cwrs atodol)
• yn werth o leiaf 180 o gredydau - holwch ein tîm Derbyn os nad ydych yn siŵr
• wedi dechrau ar neu ar ôl 1 Awst 2016

Gall eich cwrs fod wedi'i addysgu neu ar sail ymchwil.

Gall fod:

• yn amser llawn, am un neu ddwy flynedd academaidd
• yn rhan-amser, am ddwy i bedair blynedd academaidd - ni ddylai fod yn fwy na dwywaith hyd y cwrs amser llawn cyfatebol
• yn rhan-amser, am hyd at dair blynedd, lle nad oes cwrs amser llawn cyfatebol ar gael

Mae enghreifftiau o gymwysterau meistr ôl-raddedig cymwys yn Abertawe'n cynnwys:

• MSc (meistr yn y gwyddorau)
• MA (meistr yn y celfyddydau)
• MPhil (meistr mewn athroniaeth)
• MRes (meistr mewn ymchwil)
• LLM (meistr yn y gyfraith)

Ni fyddwch yn gallu derbyn Benthyciad Meistr Ôl-raddedig i astudio am dystysgrif neu ddiploma ôl-raddedig.

Os ydych yn bwriadu astudio am ddoethuriaeth gyda chymorth benthyciad PhD ar ôl eich gradd meistr, rhaid bod eich cwrs yn rhaglen PhD gyflawn, a heb gynnwys elfen 'atodol' o gymhwyster meistr, megis Meistr drwy Ymchwil neu MPhil.

Eich oedran

Rhaid eich bod yn iau na 60 oed ar ddiwrnod cyntaf blwyddyn academaidd gyntaf eich cwrs.

Cyfyngiadau

Ni fyddwch yn gallu derbyn Benthyciad Meistr Ôl-raddedig yn yr amgylchiadau canlynol:

• rydych eisoes yn derbyn taliadau gan Gyllid Myfyrwyr ar gyfer astudio ar gwrs arall
• rydych wedi derbyn Benthyciad Meistr Ôl-raddedig o'r blaen - oni bai i chi adael eich cwrs oherwydd salwch, profedigaeth neu reswm personol difrifol arall
• rydych eisoes wedi ennill gradd meistr, neu gymhwyster cyfwerth neu uwch
• mae gennych ôl-ddyledion o fenthyciadau blaenorol gan y Cwmni Benthyciadau Myfyrwyr

Byddwch yn gymwys hyd yn oed os oes gennych TAR neu ddiploma neu dystysgrif ôl-raddedig. Ni fyddwch yn cael arian ychwanegol os ydych yn ail-wneud blwyddyn o'ch cwrs.

Ad-daliadau

• Byddwch yn dechrau ad-dalu pan fyddwch yn ennill dros £21,000 y flwyddyn. Bydd ad-daliadau'n seiliedig ar 6% o'ch incwm dros y trothwy hwn (mae ad-daliadau benthyciadau israddedig yn seiliedig ar 9% o incwm).
• Os oes gennych fenthyciad israddedig gan y Cwmni Benthyciadau Myfyrwyr, byddwch yn ei ad-dalu ar yr un pryd â'r benthyciad ôl-raddedig. 

Ewch i Student Finance England am ragor o wybodaeth. Gallwch chi hefyd ddysgu mwy am y cynllun benthyciadau i fyfyrwyr ôl-raddedig drwy fynychu un o’n Diwrnodau Agored i Ôl-raddedigion.

Mae Llywodraeth yr Alban wedi cadarnhau cynlluniau ar gyfer cynllun benthyciadau'r Alban yn 2023/24. Gall myfyrwyr yr Alban fenthyca hyd at £11,500.

Ceir rhagor o wybodaeth am gymhwysedd ar wefan Student Awards Agency Scotland.

Mae Student Finance NI yn darparu benthyciadau gwerth hyd at £6,500 i fyfyrwyr sy’n byw yng Ngogledd Iwerddon ac sydd am astudio cyrsiau ôl-raddedig (hyd at lefel Meistr) mewn prifysgol yn y DU (gan gynnwys Prifysgol Abertawe).

Ceir rhagor o wybodaeth am gymhwysedd ar wefan Student Finance NI.

Bydd modd i fyfyrwyr astudio a chyflawni lleoliadau gwaith ar draws y byd trwy gynllun newydd sbon, cynllun Turing, sy’n disodli cyfranogaeth y Deyrnas Unedig yn rhaglen Erasmus+.   

Mae rhaglen cyfnewid dysgu rhyngwladol Llywodraeth Cymru, Taith, hefyd ar gael i fyfyrwyr o Gymru.

Mae ceisiadau am fenthyciadau meistr a PhD ar gyfer Myfyrwyr o Gymru a Lloegr NAWR ar agor! 

Myfyrwyr o Gymru: am ragor o wybodaeth ac i wneud cais, ewch i wefan Cyllid Myfyrwyr Cymru.

Myfyrwyr o Loegr: am ragor o wybodaeth ac i wneud cais, ewch i'r wefan gov.uk.

Sylwer, bod benthyciadau doethurol wedi’u dylunio i gyd-fynd â ffynonellau ariannu eraill felly efallai yr hoffech chi archwilio ffynonellau ariannu eraill a chyfleoedd gwaith â thâl yn ystod eich astudiaethau. 

Mae benthyciadau doethurol ar gyfer myfyrwyr newydd sy'n astudio rhaglenni ar lefel PhD bellach ar gael:

Myfyrwyr o Gymru:

Dyma rai o nodweddion allweddol y cynllun benthyciadau:

• Cewch fenthyca hyd at £28,395 tuag at gost unrhyw raglen ar lefel PhD
• Ar gael i ymgeiswyr sy’n byw yng Nghymru, sy'n 59 oed neu'n iau nad ydynt yn derbyn ysgoloriaeth gan y Cyngor Ymchwil
• Ar gael ar gyfer rhaglenni mewn Prifysgol yn y DU sy'n dyfarnu graddau PhD (gan gynnwys Prifysgol Abertawe)
• Swm yr ad-daliadau yw 6% o'r incwm dros £21,000 y flwyddyn (ar y cyd â benthyciad gradd meistr a/neu israddedig os yw'n berthnasol)
• Nid yw myfyrwyr sydd eisoes wedi ennill cymhwyster ar lefel PhD yn gymwys i wneud cais am fenthyciad
• Rhaid bod eich cwrs yn rhaglen PhD gyflawn, a rhaid nad yw'n cynnwys elfen 'atodol' o gymhwyster meistr, megis Meistr drwy Ymchwil neu MPhil.
• Ar gael ar gyfer rhaglenni amser llawn neu ran-amser
• Nid yw'n destun prawf modd

Rhagor o wybodaeth am gynllun benthyciadau PhD Cymru.

Myfyrwyr o Loegr:

Dyma rai o nodweddion allweddol y benthyciad:

• Cewch fenthyca hyd at £28,673 tuag at gost unrhyw raglen ar lefel PhD
• Ar gael i fyfyrwyr sy'n byw yn Lloegr, sy'n 59 oed neu'n iau nad ydynt yn derbyn ysgoloriaeth gan y Cyngor Ymchwil
• Ar gael ar gyfer rhaglenni mewn Prifysgol yn y DU sy'n dyfarnu graddau PhD (gan gynnwys Prifysgol Abertawe)
• Swm yr ad-daliadau yw 6% o'r incwm dros £21,000 y flwyddyn (ar y cyd â benthyciad gradd meistr a/neu israddedig os yw'n berthnasol)
• Nid yw myfyrwyr sydd eisoes wedi ennill cymhwyster ar lefel PhD yn gymwys i wneud cais am fenthyciad
• Rhaid bod eich cwrs yn rhaglen PhD gyflawn, a rhaid nad yw'n cynnwys elfen 'atodol' o gymhwyster meistr megis Meistr drwy Ymchwil neu MPhil.
• Ar gael ar gyfer rhaglenni amser llawn neu ran-amser
• Nid yw'n destun prawf modd

Rhagor o wybodaeth am gynllun benthyciadau PhD Lloegr.

Myfyrwyr o Gymru: am ragor o wybodaeth ac i wneud cais, ewch i wefan Cyllid Myfyrwyr Cymru

Myfyrwyr o Loegr: am ragor o wybodaeth ac i wneud cais, ewch i'r wefan gov.uk