Wrth i chi astudio am eich MSc mewn Nyrsio Iechyd Meddwl, byddwch yn dysgu drwy gydbwysedd clir o ddamcaniaeth, efelychu ac ymarfer clinigol ymarferol. Dros ddwy flynedd, byddwch yn cwblhau 4,720 awr o ddysgu, gan gynnwys 2,370 awr o ddamcaniaeth yn y brifysgol a 2,350 awr o ddysgu drwy ymarfer ar draws ystod eang o leoliadau iechyd a gofal cymdeithasol. Mae'r strwythur hwn yn sicrhau eich bod yn datblygu’r wybodaeth, y sgiliau a'r hyder sydd eu hangen ar gyfer cofrestru fel Nyrs Iechyd Meddwl.
Mae eich dysgu damcaniaethol yn cynnwys darlithoedd, tiwtorialau, seminarau, gwaith mewn grŵp bach a thrafodaethau sy'n seiliedig ar achosion, wedi'u hategu gan dasgau dysgu dan arweiniad ac adnoddau digidol. Mae llawer o sesiynau yn rhyngweithiol, gan roi cyfle i chi archwilio senarios cymhleth, cymhwyso'ch dysgu a datblygu eich rhesymu clinigol. Byddwch hefyd yn cwblhau gwaith astudoi annibynnol yn rheolaidd i baratoi ar gyfer sesiynau yn yr ystafell ddosbarth ac atgyfnerthu cysyniadau allweddol.
Mae efelychu yn chwarae rhan bwysig wrth eich helpu i fagu hyder clinigol mewn amgylchedd diogel. Byddwch yn ymarfer triniaethau nyrsio hanfodol, yn gweithio drwy senarios realistig ac yn cymryd rhan mewn ôl-drafodaethau strwythuredig i fyfyrio ar eich penderfyniadau a'ch cynnydd. Mae'r profiadau hyn yn eich helpu i deimlo'n barod ar gyfer lleoliadau clinigol go iawn ac yn eich paratoi i weithio'n ddiogel ac yn effeithiol gyda chleifion.
Cynhelir eich dysgu drwy ymarfer mewn amrywiaeth o leoliadau, megis ysbytai, timau cymunedol a'r sectorau annibynnol a gwirfoddol. Yn ystod eich lleoliadau clinigol, byddwch yn cael eich cefnogi gan oruchwylwyr ymarfer, aseswyr ymarfer ac aseswyr academaidd sy'n gweithio gyda'i gilydd i lywio eich datblygiad ac asesu eich cynnydd yn unol â meysydd hyfedredd y Cyngor Nyrsio a Bydwreigiaeth.
Byddwch yn astudio ochr yn ochr â myfyrwyr o amrywiaeth o gefndiroedd academaidd a phroffesiynol, gan greu amgylchedd cydweithredol lle gallwch rannu safbwyntiau a dysgu gan eich gilydd. Mae gan eich tîm addysgu gymysgedd eang o brofiad clinigol ac academaidd, gan eich helpu i wneud cysylltiadau clir rhwng yr hyn rydych chi'n ei ddysgu yn y brifysgol a'r hyn rydych chi'n ei wneud wrth ymarfer.
Nid yw'r cwrs hwn yn dilyn tymhorau arferol y Brifysgol. Mae'r flwyddyn academaidd yn cychwyn tua dechrau mis Medi ac yn gorffen tua diwedd mis Awst y flwyddyn ganlynol.
