Rheoli Busnes (Gweithrediadau), BSc (Anrh)

Bydd astudiaethau cynnar yn rhoi sylfaen gadarn i chi ym meysydd cyfrifeg, cyllid, marchnata a rheoli gweithrediadau. Yn ystod blynyddoedd diweddarach eich astudiaethau, gallwch chi deilwra eich astudiaethau drwy ddewis o ddetholiad o fodiwlau arbenigol gwahanol yn unol â'r yrfa o'ch dewis, fel y manylir isod.

Cymhwyster Safon Uwch
Fel arfer bydd cynigion ar gyfer rhaglenni yn yr Ysgol Reolaeth o fewn yr ystod 'ABB-BBB' neu gyfwerth.

Caiff pob cais ei ystyried yn unigol, gan ystyried graddau TGAU, pynciau a graddau UG, profiad gwaith, geirdaon a datganiadau personol.

Gwneir cynigion amrywiol gan ddibynnu ar y pynciau a astudiwyd.

Nid oes angen cymhwyster Safon Uwch mewn Busnes, Economeg, Mathemateg na Chyfrifeg/Cyllid. Gall myfyrwyr gyfuno cymwysterau Safon Uwch â'r cymwysterau eraill a restrir isod. Mae hefyd angen TGAU Mathemateg a Saesneg gradd C o leiaf.

Y Fagloriaeth Ryngwladol
Bydd yr Ysgol Reolaeth yn gwneud cynigion i fyfyrwyr y rhagwelir y byddant yn cyflawni (neu fyfyrwyr sydd wedi cyflawni) 32-33 neu uwch yn y Fagloriaeth Ryngwladol.

BTEC (18-uned)
Bydd yr Ysgol Reolaeth yn gwneud cynigion i fyfyrwyr y rhagwelir y byddant yn cyflawni (neu fyfyrwyr sydd wedi cyflawni) canlyniadau BTEC gwerth DDM neu’n well.

Iaith Saesneg
Rhaid i ymgeiswyr nad ydynt yn siaradwyr Saesneg brodorol ennill cyfartaledd o 6.0 a rhaid i bob cydran fod yn 5.5 neu fwy yn IELTS neu mewn profion cyfwerth.

Rydym yn cynnig ystod o raglenni hyfforddi cyn-sesiynol i fyfyrwyr sy’n methu’r gofyniad iaith Saesneg yn unig. Gellir ymgymryd â nhw cyn dechrau’r rhaglen radd.

Cymwysterau Rhyngwladol
Gweler y cymwysterau rhyngwladol rydym yn eu derbyn, a'r lefel ofynnol, i fyfyrwyr rhyngwladol (nad ydynt o'r UE) a myfyrwyr o'r UE.

 

Opsiynau Blwyddyn Sylfaen: BSc Rheoli Busnes (Gweithrediadau) gyda Blwyddyn Sylfaen

Myfyrwyr y DU
Mae blwyddyn sylfaen ar gael i fyfyrwyr nad ydynt yn ennill y graddau angenrheidiol ar gyfer eu rhaglen radd ddewisol.
Myfyrwyr yr UE/Rhyngwladol
Ewch i wefan Y Coleg i gael gwybodaeth am y cwrs a gofynion mynediad.

Rydym yn falch o gynnig profiad addysgol rhagorol, gan ddefnyddio'r ymagweddau dysgu ac addysgu mwyaf effeithiol, sydd wedi cael eu teilwra'n ofalus i gydweddu ag anghenion penodol eich cwrs. Ar wahân i nifer fach o gyrsiau ar-lein yn unig, mae'r rhan fwyaf o'n cyrsiau yn cynnwys addysgu wyneb yn wyneb ar y campws, gan eich galluogi i ymgysylltu'n llawn â'ch darlithwyr a'ch cyd-fyfyrwyr.

Cynhelir sesiynau sgiliau ymarferol, gwaith mewn labordai, seminarau a gweithdai gan amlaf ar ffurf wyneb yn wyneb, gan alluogi gwaith grŵp ac arddangosiadau. Rydym hefyd yn gweithredu labordai rhithwir ac amgylcheddau dysgu efelychol a fydd yn hwyluso rhagor o fynediad at gyfleoedd hyfforddiant yn y dyfodol. Fodd bynnag, mae ein hymagwedd hefyd yn cynnwys defnyddio cymorth ar-lein i ategu ac atgyfnerthu addysgu wyneb yn wyneb traddodiadol.

Gellir cynnal dysgu ar-lein yn fyw drwy ddefnyddio meddalwedd megis Zoom, gan eich galluogi i ryngweithio â'r darlithydd a'r myfyrwyr eraill ac i ofyn cwestiynau. Mae recordiadau o ddarlithoedd hefyd yn galluogi mwy o hyblygrwydd i ail-ymweld â deunyddiau, adolygu ar gyfer asesiadau a gwella dysgu y tu allan i'r ystafell ddosbarth. Mae gan rai modiwlau adnoddau ychwanegol yn Canvas, megis fideos, sleidiau a chwisiau sy'n galluogi rhagor o hyblygrwydd wrth astudio.

Mae'r cwrs hwn yn cynnig rhai modiwlau a addysgir drwy gyfrwng y Gymraeg neu'n ddwyieithog i fyfyrwyr sy'n ystyried eu bod yn siarad Cymraeg yn rhugl. Am ragor o fanylion am y ddarpariaeth cyfrwng Cymraeg sydd ar gael, gweler yr ehangydd Darpariaeth Gymraeg isod.

Rhywfaint o ddarpariaeth

Darperir rhai elfennau o'r cwrs hwn trwy gyfrwng y Gymraeg ond nid oes digon o ddarpariaeth eto i gyrraedd 40 credyd ym mhob blwyddyn.

Mae Academi Hywel Teifi yma i'ch cefnogi trwy gydol eich amser ym Mhrifysgol Abertawe. Rydym yn cynnig:

• Mynediad at ysgoloriaethau a bwrsariaethau hael ar gyfer astudio trwy gyfrwng y Gymraeg.
• Mynediad at fodiwlau a addysgir yn gyfan gwbl neu'n rhannol yn Gymraeg.
• Mynediad at ap Arwain er mwyn derbyn y diweddaraf am ein cyrsiau a'n modiwlau cyfrwng Cymraeg. Lawrlwythwch yr ap am ddim drwy'r App Store a Google Play.
• Cyfle am gyfweliad trwy gyfrwng y Gymraeg wrth wneud cais am le.
• Cyfle i dderbyn gohebiaeth bersonol yn Gymraeg, yn Saesneg neu'n ddwyieithog.
• Cyfle i ysgrifennu a chyflwyno gwaith cwrs neu sefyll arholiadau trwy gyfrwng y Gymraeg (hyd yn oed os ydych chi wedi dewis astudio yn Saesneg), a bydd eich gwaith yn cael ei farcio yn Gymraeg.
• Tiwtor Personol Cymraeg ei iaith.
• Cefnogaeth un i un i wella eich sgiliau Cymraeg academaidd.
• Cyfle i ennill cymhwyster ychwanegol sy'n dystiolaeth o'ch gallu yn yr iaith Gymraeg i gyflogwyr.
• Cyfle i fod yn aelod o Gangen Prifysgol Abertawe o'r Coleg Cymraeg Cenedlaethol.
• Cyfle i gyfrannu at weithgaredd a bywiogrwydd cymuned Gymraeg y Brifysgol ac ennill Gwobr Academi Hywel Teifi

I ddysgu mwy am yr uchod ac am yr holl gyfleoedd sydd ar gael i chi trwy gyfrwng y Gymraeg, ewch i dudalennau israddedig Academi Hywel Teifi

Mae ein gradd BSc Rheoli Busnes (Gweithrediadau) ym Mhrifysgol Abertawe wedi'i hachredu gan y Sefydliad Rheolaeth Siartredig (CMI) 
_{*yn amodol ar ddewis modiwlau}

Beth yw cwrs achrededig?
Un sydd wedi'i gymeradwyo gan gorff proffesiynol perthnasol gan ei fod yn bodloni ei safonau ansawdd. Mae'n amlygu cysylltiad agos rhwng byd diwydiant a'ch cwrs, gan ddod ag arferion y byd go iawn, o'r radd flaenaf i'ch astudiaethau. Gan eu bod yn cyfrif tuag at eich cymwysterau a'ch cofrestriadau, gall cyrsiau achrededig eich helpu i roi eich llwybr gyrfa dewisol ar garlam.

Pa fanteision mae Achrediad Proffesiynol yn eu cynnig?
- Achub y blaen: Bydd graddau sydd wedi'u hachredu'n broffesiynol yn eich esgusodi rhag sefyll arholiadau/cymwysterau proffesiynol cynnar penodol, sy'n golygu y cewch chi hwb ar ddechrau eich gyrfa.
- Cymorth: Cofrestrwch am aelodaeth myfyriwr a gallwch chi ddechrau elwa o gymorth gyrfa corff proffesiynol, yn ogystal â chysylltiadau â chymheiriaid ac arbenigwyr. Mae'n edrych yn dda ar eich CV ac mae'n eich helpu i baratoi ar gyfer cyflogaeth. 

SYLWER:
Mewn sawl proffesiwn, mae astudio cwrs achrededig yn gam cychwynnol yn unig at fod yn gwbl gymwysedig.
Gallwch chi wirio gyda'r cyrff proffesiynol perthnasol am ofynion penodol eraill.

Am ragor o wybodaeth, gweler ein tudalen Achredu Proffesiynol.

Cewch eich addysgu gan dîm o academyddion profiadol o gefndiroedd ymchwil, academaidd a diwydiant. Mae eu gwybodaeth a'u harbenigedd amrywiol iawn yn gysylltiedig yn agos â chynnwys y modiwl y caiff ei addysgu i chi, gan sicrhau eich bod chi'n dysgu'r wybodaeth fwyaf perthnasol a diweddar ac yn meithrin sgiliau sy'n ofynnol ar gyfer gyrfa mewn  rheoli busnes neu weithrediadau.  

Gallwch ddysgu rhagor am ein staff academaidd drwy edrych ar ein proffiliau staff.

Gellir codi ffioedd myfyrwyr Israddedig y DU llawn amser yn chwyddiannol mewn blynyddoedd astudio i ddod. Penderfynir ar y swm gan Lywodraeth Cymru.

Bydd ffioedd ar gyfer myfyrwyr UE/Rhyngwladol Israddedig yn cynyddu 3% ar gyfer pob blwyddyn ddilynol o astudio.

Yn ystod blwyddyn ryngol (e.e. blwyddyn mewn diwydiant, blwyddyn dramor neu flwyddyn lleoliad), bydd ffi is yn gymwys. Am ragor o wybodaeth ewch i'n tudalen ffioedd dysgu.

Gallwch ddod o hyd i ragor o wybodaeth am ffioedd a sut i dalu ar ein tudalen ffioedd dysgu.

Efallai y byddwch yn gymwys i gael arian i helpu i gefnogi eich astudiaethau. I gael gwybod am ysgoloriaethau, bwrsariaethau a chyfleoedd cyllido eraill sydd ar gael, ewch i dudalen ysgoloriaethau a bwrsariaethau'r Brifysgol.

Myfyrwyr cyfredol: Gallwch ddod o hyd i ragor o wybodaeth am ffioedd a sut i dalu ar ein tudalen ffioedd dysgu.

Mae’n bosib eich bod yn gymwys i gael cymorth ariannol tuag at eich astudiaethau.

I gael gwybod am ysgoloriaethau, bwrsariaethau a chyfleoedd eraill am gymorth ariannol sydd ar gael, ewch i dudalen ysgoloriaethau a bwrsariaethau'r Brifysgol.

Mae ysgoloriaethau a bwrsariaethau hael ar gael gan Academi Hywel Teifi, Prifysgol Abertawe a’r Coleg Cymraeg Cenedlaethol ar gyfer myfyrwyr sy'n dymuno astudio trwy gyfrwng y Gymraeg neu'n ddwyieithog. I ddysgu mwy am y cyfleoedd sydd ar gael i chi, ewch i dudalen Ysgoloriaethau a Bwrsariaethau Academi Hywel Teifi

Mae'r Ysgol Reolaeth hefyd yn cynnig Ysgoloriaeth Datblygu Dyfodol ar gyfer myfyrwyr israddedig rhyngwladol sydd wedi cael cynnig i astudio yn yr Ysgol Reolaeth. Mae'r ysgoloriaeth yn werth hyd at £2,000 am un flwyddyn academaidd, sy'n cael ei ddidynnu'n awtomatig o'r ffioedd dysgu.

Mae'r pecyn ysgoloriaeth yn annog myfyrwyr i feithrin nifer o sgiliau proffesiynol wrth iddynt weithio gyda'r Ysgol drwy gydol y flwyddyn academaidd.

Bydd mynediad i'ch dyfais ddigidol eich hun/y pecyn TG priodol yn hanfodol yn ystod eich amser yn astudio ym Mhrifysgol Abertawe. Bydd mynediad at wifi yn eich llety hefyd yn hanfodol i'ch galluogi i ymgysylltu'n llawn â'ch rhaglen. Gweler ein tudalennau gwe pwrpasol i gael arweiniad pellach ar ddyfeisiau addas i'w prynu, ac i gael canllaw llawn ar sefydlu'ch dyfais.

Efallai y byddwch chi'n wynebu costau ychwanegol tra byddwch chi yn y brifysgol, gan gynnwys (ond heb fod yn gyfyngedig i):

• Teithio i'r campws ac oddi yno
• Costau argraffu, llungopïo, rhwymo, deunydd ysgrifennu ac offer (e.e. ffyn USB)
• Prynu llyfrau neu werslyfrau
• Gwisgoedd ar gyfer seremonïau graddio

Mae Academi Cyflogadwyedd Abertawe'n cefnogi myfyrwyr Prifysgol Abertawe ar bob cam yn eu taith yrfaol.

Mae ein gwasanaethau cymorth gyrfaoedd yn cynnwys:

• Gweithdai cyflogadwyedd, sgyrsiau gan gyflogwyr, digwyddiadau pwrpasol a ffeiriau gyrfaoedd
• Cyngor ac arweiniad unigol gan Ymgynghorwyr Gyrfaoedd proffesiynol
• Cymorth i chwilio am swyddi, interniaethau, lleoliadau gwaith a chyfleoedd gwirfoddoli
• Mynediad i adnoddau gwybodaeth am amrywiaeth eang o bynciau rheoli gyrfa
• Cyngor ac arweiniad ar astudio a chyllid i fyfyrwyr ôl-raddedig.
• Ariannu i gefnogi cyfleoedd interniaethau myfyrwyr a digwyddiadau Cymdeithasau/Clybiau Myfyrwyr

Rydym hefyd yn darparu cymorth a chyngor i gyn-fyfyrwyr Prifysgol Abertawe am hyd at bum mlynedd ar ôl iddynt raddio.

Hefyd, mae gan yr Ysgol Reolaeth dîm Cyflogadwyedd penodol mewnol sy'n cynnig cymorth ychwanegol.
Yn ystod eich amser gyda ni, byddwch chi’n cael cyfle i wneud y canlynol:

• Ymuno â'n cynllun Mentora Cyflogadwyedd a chael eich mentora gan gyflogwr a all eich helpu i bontio o fod yn fyfyriwr i fod yn weithiwr proffesiynol
• Siarad â’n Cymuned o Gyn-fyfyrwyr sy’n tyfu
• Gweithio a rhwydweithio â chyflogwyr o amrywiaeth o gwmnïau cenedlaethol ac amlwladol drwy ein seminarau a'n digwyddiadau
• Gwella eich sgiliau a chwrdd â chyflogwyr yn ystod ein Modiwl Cyflogadwyedd, a gynhelir ddwywaith y flwyddyn
• Cael cymorth wrth ddod o hyd i gyfleoedd am flwyddyn mewn diwydiant neu astudio dramor.
• Elwa o gymorth 1 i 1 anghyfyngedig i ddatblygu eich profiad gyrfa
• Cadw mewn cysylltiad i gael cymorth am bum mlynedd ar ôl i chi raddio

Yn ogystal â chymorth pwnc penodol gan staff addysgu'r coleg a'ch tiwtor personol, mae'r Ganolfan Llwyddiant Academaidd yn darparu cyrsiau, gweithdai a chymorth un-i-un mewn meysydd fel:

• Ysgrifennu academaidd
• Mathemateg ac ystadegau
• Meddwl critigol
• Rheoli amser
• Sgiliau digidol
• Sgiliau cyflwyno
• Cymryd nodiadau
• Technegau adolygu, dysgu ar gof ac arholiadau
• Sgiliau Saesneg (os nad Saesneg yw eich iaith gyntaf)

Yn ogystal, os oes gennych Anhawster Dysgu Penodol (ADP/SpLD), anabledd, cyflwr iechyd meddwl neu gyflwr meddygol, mae gan y Ganolfan Llwyddiant Academaidd Diwtoriaid Arbenigol i gefnogi'ch dysgu. Bydd y tiwtoriaid yn gweithio ochr yn ochr â'r Swyddfa Anabledd a'r Gwasanaeth Lles i gefnogi eich holl anghenion a gofynion tra byddwch yn astudio ym Mhrifysgol Abertawe.

I ddysgu mwy am astudio dramor, ewch i'n tudalennau gwe Go Global. Nid yw cofrestru ar raglen sy'n cynnwys semester/blwyddyn dramor yn gwarantu lleoliad gwaith semester/blwyddyn dramor yn awtomatig. Mae nifer gyfyngedig o leoedd ar gael ac yn amodol ar broses ddethol gystadleuol. Os na fyddwch chi'n llwyddo i ennill lleoliad gwaith semester/blwyddyn dramor, cewch chi eich trosglwyddo i gwrs safonol eich cynllun gradd heb semester neu flwyddyn dramor.

Mae rhaglenni rhyngwladol yr haf ar agor i fyfyrwyr o bob ysgol. Fel arfer, mae rhaglenni'n para o 2 i 6 wythnos, ar draws cyrchfannau megis Tsieina, Sambia, De Corea, Siapan, Canada a ledled Ewrop. Am ragor o wybodaeth ynghylch rhaglenni a chymhwysedd, ewch i'n tudalennau gwe Haf Dramor.

Gwnewch gais nawr - myfyrwyr y DU, UE a rhyngwladol.

Cewch wybod mwy drwy ymweld â'n tudalen ar sut i wneud cais

Argymhellwn eich bod chi'n cyflwyno eich cais am le ar ein cyrsiau mor fuan â phosibl cyn ein dyddiadau cau ar gyfer cyflwyno cais. Bydd cyrsiau'n cau yn gynharach na'r dyddiadau cau a restrir os caiff yr holl leoedd eu llenwi. Mae rhagor o wybodaeth ar gael ar ein tudalen we Dyddiadau cau ar gyfer cyflwyno cais.

Mae'r cwrs hwn yn cynnig y cyfle i chi dreulio Blwyddyn mewn Diwydiant, yn y DU neu dramor*, gan roi profiad gwaith gwerthfawr i chi. Mae'r Brifysgol yn eirioli dros leoliadau gwaith â thâl sydd ar gyfartaledd dros £15,000.   Caiff pob cais ei ystyried fesul achos.

Er mai'r myfyriwr sy'n gyfrifol am sicrhau lleoliad gwaith, rydym yn gweithio gyda nifer o sefydliadau sy'n darparu ystod o gyfleoedd lleoliad gwaith. Mae myfyrwyr hefyd yn cael eu cefnogi drwy gydol eu taith cyflwyno cais gyda chyngor, arweiniad ac adnoddau ychwanegol. Os nad ydych chi'n sicrhau lleoliad erbyn diwedd ail flwyddyn eich astudiaethau, cewch eich drosglwyddo i'r rhaglen radd gyfatebol.

*mae lleoliadau dramor yn dibynnu ar gyfyngiadau FISA fesul gwlad