Cyfiawnder Troseddol Cymhwysol a Throseddeg, MA

Trosolwg o'r Cwrs

Mae troseddu, ei achosion, a sut y dylem ymdrin ag ef, yn y penawdau yn aml, ac mae cyflogwyr yn y llywodraeth ac mewn sectorau eraill yn gwerthfawrogi arbenigedd yn y meysydd hyn yn gynyddol.

Bydd astudio ein MA mewn Cyfiawnder Troseddol Cymhwysol a Throseddeg yn sicrhau bod gennych y cymwyseddau dadansoddol, beirniadol, methodolegol a moesegol y bydd eu hangen arnoch i ymdrin yn ystyrlon â rhai o'r heriau byd-eang mwyaf dybryd a wynebir gan gymdeithas heddiw.

Mae'r rhaglen hon wedi'i hadeiladu ar sail tri philer craidd: damcaniaeth droseddegol, polisi ac ymarfer cyfiawnder troseddol, a datblygu sgiliau ymchwil trylwyr. Mae'r pileri hyn yn llunio cynnwys a chyflwyniad y cwricwlwm, gan sicrhau y gallwch ddatblygu dealltwriaeth ddofn, feirniadol a chymhwysol o droseddu a chyfiawnder yn y gymdeithas gyfoes.

Drwy’r fframwaith hwn, mae’r rhaglen yn cynnig profiad dysgu cynhwysol i chi, sy'n ddeniadol ac sy’n cael ei arwain gan ymchwil. Byddwch chi'n cael eich annog i ddeall cysyniadau allweddol mewn troseddeg, gan gwestiynu syniadau'n feirniadol, ac asesu eu gallu i esbonio ymddygiad troseddol a gwyrdroëdig, gan dynnu ar wybodaeth sy'n dod i'r amlwg yn y maes.

Mae natur gymhwysol y rhaglen hon yn caniatáu i ddeunydd ac asesiadau’r cwrs gyfeirio'n uniongyrchol at y system cyfiawnder troseddol, a sut mae'n gweithio fel sefydliad, gan eich annog i gymhwyso'ch gwybodaeth am y pwnc yn uniongyrchol i realiti presennol y system cyfiawnder troseddol yng Nghymru a Lloegr. Anogir hyn drwy astudio amrywiol elfennau allweddol sy'n ffurfio'r system cyfiawnder troseddol, yn ogystal ag asesiadau ymarferol sy'n canolbwyntio'n uniongyrchol ar effeithio ar bolisi ac ymarfer cyhoeddus yn y maes hwn.

Drwy gyfuno'r wybodaeth fanwl hon am droseddu a'r system cyfiawnder troseddol â natur gymhwysol ac ymarferol y rhaglen, byddwch chi'n gallu datblygu'r sgiliau a'r wybodaeth y bydd eu hangen arnoch chi i ymuno ag amrywiaeth o yrfaoedd diddorol a deniadol.

Pam Cyfiawnder Troseddol a Throseddeg Gymhwysol ym Mhrifysgol Abertawe?

Fel myfyriwr ôl-raddedig yn yr Adran Troseddeg, Cymdeithaseg a Pholisi Cymdeithasol ym Mhrifysgol Abertawe, byddwch yn rhan o amgylchedd academaidd sy'n ffynnu ac sydd wedi ymrwymo i ragoriaeth mewn addysgu ac ymchwil, gan gynnig profiad rhagorol i fyfyrwyr.

Byddwch yn astudio ar ein Campws Singleton, wedi'i leoli mewn parcdir hardd sy'n edrych dros Fae Abertawe, lle gallwch elwa o gael mynediad at:

• Yr ymchwil a'r addysgu diweddaraf sy'n canolbwyntio ar ddatblygiadau rhyngwladol mewn troseddeg a chyfiawnder troseddol
• Gallwch astudio effaith ffactorau cymdeithasol, gwleidyddol ac economaidd ar bolisïau sy'n ymwneud â throseddu a chyfiawnder troseddol
• Arbenigwyr yn y diwydiant, sydd â chyfoeth o brofiad academaidd ac ymarferol
• Grwpiau darlith bach sy'n rhoi cyfle i chi leisio'ch barn a rhannu syniadau mewn amgylchedd agored
• Siaradwyr gwadd yn cynnwys uwch-ymarferwyr cyfiawnder troseddol, rheolwyr a llunwyr polisi
• Cymuned groesawgar, a gefnogir gan y Gymdeithas Troseddeg dan arweiniad myfyrwyr, sy'n cynnal amrywiaeth o ddigwyddiadau cymdeithasol

Eich profiad Cyfiawnder Troseddol a Throseddeg Gymhwysol

Cyflwynir y rhaglen MA Cyfiawnder Troseddol Cymhwysol a Throseddeg ym Mhrifysgol Abertawe trwy gymysgedd deinamig o ddulliau addysgu arloesol, a arweinir gan ymarfer ac ymchwil. Mae'r dulliau hyn wedi'u cynllunio i gyd-fynd ag athroniaeth y rhaglen o ymchwil feirniadol, cyfiawnder cymdeithasol ac ymarfer cymhwysol, gan sicrhau y gallwch ddatblygu'r sgiliau dadansoddol, moesegol a phroffesiynol sydd eu hangen i ffynnu yn y maes.

Gyda holl gynnwys craidd y cwrs yn cael ei gyflwyno ar un diwrnod o'r wythnos, byddwch yn gallu treulio diwrnod cyfan yn ymdrochi yn eich astudiaethau, ochr yn ochr â'ch cyd-fyfyrwyr, gan feithrin perthnasoedd agos a chydweithio. Mae sesiynau a seminarau ‘dysgu dros ginio rheolaidd hefyd yn cefnogi’r ethos cymunedol hwn, gan roi amrywiaeth o bynciau i chi sy’n cefnogi eich dysgu parhaus, a datblygiad eich sgiliau academaidd a rhyngbersonol.

Mae strwythur y rhaglen yn adlewyrchu taith ddysgu gynyddol:

• Ym Mloc Addysgu 1, mae'r modiwlau gorfodol yn rhoi cyflwyniad i chi i'r sylfeini athronyddol, yr ymagweddau beirniadol a'r meddylfryd ymarferol sydd i gyd yn hanfodol ar gyfer deall ac ymchwilio i gyfiawnder troseddol a throseddeg.
• Mae Bloc Addysgu 2 yn estyn y sylfeini hyn trwy astudiaethau achos a dylunio ymchwil yn y byd go iawn, gan eich paratoi chi ar gyfer eich traethawd hir.
• Mae modiwlau dewisol yn eich galluogi i deilwra'ch dysgu i gyd-fynd â'ch diddordebau disgyblaethol a'ch nodau gyrfa, gyda phynciau'n cynnwys meysydd fel radicaleiddio a therfysgaeth, polisi cyffuriau, eithafiaeth ar-lein, niwed ar sail rhywedd a charchardai. Mae'r rhaglen yn elwa o'r gallu i dynnu modiwlau arbenigol o sawl disgyblaeth, gan roi ystod eang o opsiynau i chi.
• Mae'r radd yn dod i ben gyda'ch traethawd hir, sy'n integreiddio damcaniaeth ac ymarfer. Bydd gofyn i chi gyflawni darn annibynnol o ymchwil empirig o dan oruchwyliaeth academaidd agos, sy'n gweithredu fel cam olaf y rhaglen, lle gallwch arddangos eich cyflawniadau, gwybodaeth a’ch sgiliau yn llawn.

Mae'r cwrs hefyd yn cynnig cyfleoedd i chi ymdrin ag ysgolheictod, ymchwil a datblygiadau polisi arloesol, a chewch eich annog i gysylltu eich prosiect ymchwil â dadleuon a methodolegau cyfredol, er mwyn sicrhau eich bod yn wybodus yn feirniadol am faterion pwysig.

Mae staff addysgu'r rhaglen hon yn ymchwilwyr gweithredol mewn troseddeg, cymdeithaseg a pholisi cymdeithasol, sy'n golygu bod y cynnwys a gyflwynir hefyd yn adlewyrchu'r syniadaeth academaidd a phroffesiynol ddiweddaraf. Yn ogystal â hyn, byddwch yn cael y cyfle i gymryd rhan mewn symposia, digwyddiadau ymgysylltu â'r cyhoedd ac ymchwil gydweithredol gydag asiantaethau lleol, gan roi profiad hanfodol i chi a chyfleoedd i adeiladu rhwydwaith proffesiynol eang.

Cyfleoedd cyflogaeth Cyfiawnder Troseddol a Throseddeg Gymhwysol

Mae sgiliau cyflogadwyedd wedi'u hymgorffori drwy gydol y cwricwlwm, gan sicrhau eich bod yn barod i ymuno â'r gweithle fel gweithiwr proffesiynol gwybodus.

Drwy gydol y rhaglen, bydd gennych gyfleoedd i ddatblygu ystod o gymwyseddau proffesiynol a moesegol drwy fodiwlau sy'n mynd i'r afael â materion cymdeithasol penodol, gan eich helpu chi i ddod yn fyfyriwr graddedig sy'n gyfrifol yn gymdeithasol ac yn gymwys yn fyd-eang.

Bydd y rhaglen yn sicrhau bod gennych y sgiliau dadansoddi, ymchwil a pholisi uwch sy'n cael eu gwerthfawrogi'n fawr mewn rolau sy'n mynd i'r afael â throseddu, cyfiawnder a pholisi cymdeithasol.

Mae graddedigion y rhaglen MA Cyfiawnder Troseddol Cymhwysol a Throseddeg ym Mhrifysgol Abertawe mewn sefyllfa dda i ddilyn ystod eang o yrfaoedd ar draws y sectorau cyhoeddus, preifat a’r trydydd sector.

Mae cyrchfannau tebygol i raddedigion yn cynnwys y canlynol:

• Sector cyhoeddus:
• Asiantaethau cyfiawnder troseddol (e.e. yr heddlu, y gwasanaeth prawf, y gwasanaeth carchardai)
• Adrannau'r llywodraeth (e.e. Y Swyddfa Gartref, y Weinyddiaeth Gyfiawnder)
• Awdurdodau lleol a phartneriaethau diogelwch cymunedol
• Rolau polisi ac ymchwil yn y gwasanaeth sifil
• Cyflwyno addysg bellach ac addysg uwch
  
  
• Y Sector Preifat:
• Cwmnïau ymgynghori diogelwch a risg
• Adrannau gwasanaethau cyfreithiol a chydymffurfiaeth
• Timau cyfrifoldeb cymdeithasol corfforaethol a moeseg
  
  
• Y Trydydd Sector:
• Elusennau a chyrff anllywodraethol sy'n canolbwyntio ar gyfiawnder, adsefydlu a hawliau dynol
• Sefydliadau eiriolaeth a chymorth i ddioddefwyr, troseddwyr a grwpiau sy'n agored i niwed
  
  
• Gyrfaoedd Academaidd ac Ymchwil:
• Astudiaethau Doethurol ac ymchwil academaidd
• Swyddi Cynorthwy-ydd ymchwil mewn prifysgolion neu melinau trafod
• Rolau dadansoddi polisi mewn sefydliadau cenedlaethol a rhyngwladol