Hysbysiad Hwylus Iechyd Poblogaethau a Gwyddorau Meddygol

Mae Iechyd Poblogaethau yn cyfeirio at ddeterminantau a deilliannau iechyd unigolion, grwpiau a phoblogaethau. Mae’n ymwneud â’r ffactorau sy’n llunio’n hiechyd, gan gynnwys systemau gofal iechyd, geneteg, bioleg, hefyd y ffordd o fyw ac ymddygiadau unigol yn ogystal â dylanwadau amgylcheddol. Trwy ystyried y ffactorau hyn, mae arbenigwyr Iechyd Poblogaethau yn gallu arloesi gyda systemau gofal iechyd a dod o hyd i ffyrdd i helpu pobl i fyw bywydau hwy ac iachach.

Gwnaeth Kindig a Stoddartd (2003) ddiffinio Iechyd Poblogaethau fel “deilliannau iechyd grŵp o unigolion, gan gynnwys dosbarthiad deilliannau fel hyn yn y grŵp.”

Onid yw hynny’n iechyd cyhoeddus?

Nac ydy, mae gwahaniaeth. Mae Iechyd Cyhoeddus yn canolbwyntio ar weithgareddau sy’n sicrhau amgylchiadau i bobl fod yn iach mewn cymdeithas benodol, a thra bod iechyd poblogaethau yn cwmpasu iechyd cyhoeddus, mae’n fwy na dim ond iechyd cyhoeddus; mae Iechyd Poblogaethau hefyd yn canolbwyntio ar pam mae rhai poblogaethau yn iachach nag eraill.

Os ydych chi erioed wedi meddwl mai gyrfa mewn meddygaeth oedd yr unig ffordd i wneud gwahaniaeth i iechyd pobl, meddyliwch eto. Mae’r maes Iechyd Poblogaethau sy’n ehangu’n gyson yn ddewis gyrfaol cyffrous, ac yn ddewis sydd wrth wraidd chwyldro gofal iechyd.

Nid yw’n gyfrinach bod systemau gofal iechyd yn y DU a ledled y byd yn wynebu pwysau cynyddol. Mae clefydau cronig, cyflyrau sy’n gysylltiedig ag oedran a salwch meddwl yn cynyddu, ac mae’n debyg bod adroddiadau am argyfyngau yn y GIG yn y newyddion bob dydd.

Tra bod gwelliannau meddygol yn helpu llawer o bobl i fyw’n hwy, mae ansawdd y gofal y bydd person yn ei dderbyn drwy gydol ei fywyd yn dibynnu’n fawr ar le y’i ganwyd, lle mae’n byw ac yn gweithio.

Yr anghydraddoldeb hwn y mae arbenigwyr ym maes Iechyd Poblogaethau yn ceisio mynd i’r afael ag ef, trwy ddeall anghenion iechyd grwpiau o bobl a thrawsnewid modelau gofal iechyd traddodiadol er mwyn diwallu’r anghenion hynny. Dyna pam os ydych chi erioed wedi dymuno gyrfa sy’n gwella iechyd a lles pobl, sy’n gwneud gwahaniaeth yn eich cymuned, neu sy’n wirioneddol newid y byd – efallai’r BSc mewn Iechyd Poblogaethau a Gwyddorau Meddygol fydd y cwrs i chi.

Mae sefydliadau sy’n eirioli dros iechyd, fel y King’s Fund, yn galw am drawsnewid brys mewn systemau gofal iechyd er mwyn mynd i’r afael â’r bylchau o ran gofal iechyd. A gwnaeth Uwch-gynhadledd Arloesi Fyd-eang dros Iechyd (WISH) gyhoeddi adroddiad yn rhybuddio, oni bai fod polisïau iechyd yn newid, ‘ bydd y bylchau hyn yn wirioneddol tyfu - a bydd gwasanaethau gofal iechyd yn cael trafferth i ymdopi o dan y pwysau’.

Dyna waith maes Iechyd Poblogaethau. Mae’n herio systemau iechyd, fel y GIG, i symud o ymagwedd adweithiol lle mae person yn ymgysylltu â’i feddyg teulu dim ond pan fo’n sâl. Yn hytrach, gallai ymagwedd at Iechyd Poblogaethau ystyried yr holl ffactorau sy’n effeithio ar iechyd a lles person, a defnyddio system sy’n rhannu anghenion y claf ar draws gwasanaethau perthnasol. Mae monitro a chyfathrebu yn allweddol, yn ogystal â barn y claf.

Yn y pen draw, mae Iechyd Poblogaethau yn ceisio arloesi modelau gofal iechyd er mwyn:

• gwella iechyd a lles cymunedau lleol
• darparu profiad gofal gwell ar gyfer cleifion
• lleihau pwysau ar feddygon teulu a gwasanaethau Damweiniau ac Achosion Brys
• arbed arian yn y sector iechyd cyhoeddus

Bydd astudio Iechyd Poblogaethau a Gwyddorau Meddygol yn rhoi ichi sylfaen ardderchog ar gyfer ymarfer proffesiynol a gyrfaoedd ymchwil yn y Gwyddorau Meddygol a Bywyd a thu hwnt.

Er enghraifft:

• Ymarfer clinigol
• Ymchwil
• Eirioli dros gleifion
• Rheoli/cydlynu gofal
• Addysg iechyd
• Polisïau’r llywodraeth
• Hysbyseg iechyd
• Teleiechyd a thelefeddygaeth

Mae Iechyd Poblogaethau wedi cael ei groesawu fel ‘y peth mawr nesaf ym maes gofal iechyd’ oherwydd yn fwyfwy mae modelau gofal iechyd yn newid ffocws o ‘faint’ i ‘werth’ gyda mwy o bwyslais yn cael ei roi ar atal a helpu pobl i ofalu am eu hiechyd a’u lles eu hunain. Dyna pam fod cyfleoedd cyffrous i ddilyn amrywiaeth eang o lwybrau gyrfaol yn y maes hwn. Nid yw meddygaeth bellach yn bodoli ar wahân i’r gwyddorau economaidd, demograffaidd a chymdeithasol. Lle mae’r disgyblaethau hyn yn cwrdd, mae iechyd poblogaethau yn dod i’r wyneb. Mae astudio Iechyd Poblogaethau yn gallu agor y drws i’ch dyfodol mewn ystod eang o ddewisiadau gyrfaol ym maes meddygaeth a’r gwyddorau bywyd. Mae angen arweinwyr er mwyn chwyldroi gwasanaethau iechyd, llunio strategaethau rheoli newydd, ac arloesi modelau gofal er mwyn canolbwyntio ar anghenion yr unigolyn ac anghenion cymunedau.