Cynhwysiant Ac Ehangu Mynediad At Ofal Iechyd

Eich datganiad personol yw’ch cyfle cyntaf i ddweud wrthym ni pam rydych chi wedi dewis i astudio eich cwrs dewisol a’r hyn sy’n eich ysgogi i ddilyn eich gyrfa glinigol ddewisol.

Bydd eich datganiad personol yn unigryw i chi ac yn cynnwys eich profiadau ac yn atgyfnerthu’r pethau sy’n eich ysgogi. Fodd bynnag, bydd ein tîm derbyn yn chwilio am y canlynol:

• Rhywbeth amdanoch chi, eich stori bersonol
• Agweddau ar y cwrs sy’n eich denu
• Eich ysgogiad i astudio eich cwrs dewisol
• Eich dealltwriaeth o’r rôl yrfa rydych chi’n cyflwyno cais i astudio tuag ati
• Y nodweddion, y sgiliau a’r profiadau personol sy’n dangos eich bod chi’n addas ar gyfer yr astudiaethau a’r yrfa#
• Eich Potensial Academaidd

Dylai eich datganiad personol gyfleu’r cwrs rydych chi’n cyflwyno cais ar ei gyfer, a bod yn benodol amdano.. Cynghorir ymgeiswyr yn gryf i osgoi datganiadau personol gofal iechyd cyffredinol (e.e. datganiad personol ar gyfer nyrsio a gwyddor barafeddygol). Os ydych chi’n cyflwyno cais i fwy nag un cwrs gofal iechyd gyda ni, rhaid cyflwyno datganiad personol penodol ar gyfer pob cwrs, un drwy UCAS a’r lleill drwy e-bostio copi papur o’ch datganiad personol i’r tîm derbyn.

Nod y cyfweliad yw asesu eich addasrwydd ar gyfer y cwrs. Rydym ni’n chwilio am sawl nodwedd a fydd yn eich helpu i lwyddo ar eich cwrs dewisol a chael gyrfa lwyddiannus sy’n rhoi boddhad ym maes gofal iechyd.

Nod y broses ddethol yw canfod eich:

• potensial academaidd
• ymwybyddiaeth o'ch rhaglen ddewisol a'i gofynion
• sgiliau cyfathrebu: geiriol a heb eiriau
• cymhelliad ar gyfer gyrfa yn eich proffesiwn iechyd arfaethedig
• ymwybyddiaeth o faterion cyfredol ym maes iechyd
• uniondeb personol - gonestrwydd, natur ddibynadwy, prydlondeb
• agwedd ofalgar wrth ymdrin â’r cyhoedd

Nid yw'r cyfwelwyr yn ceisio eich dal chi allan; Os nad ydych yn deall unrhyw un o’r cwestiynau, gofynnwch iddynt ailadrodd y cwestiwn. Mae hwn yn gyfle i ni gael gwybod rhagor amdanoch chi ac i chi gael gwybod rhagor amdanom ni. Ar ddiwedd y broses ddewis, cewch gyfle i ofyn unrhyw gwestiynau a allai fod gennych. Mae croeso i chi baratoi'r rhain o flaen llaw a'u hysgrifennu i lawr.

Cynhelir yr holl gyfweliadau  ar-lein ac o bell, a bydd y panel cyfweld yn cynnwys darlithydd, gweithiwr proffesiynol clinigol a defnyddiwr gwasanaeth (cyfwelydd lleyg). Byddwch yn derbyn gwahoddiad i gyfweliad drwy e-bost, a bydd hwnnw’n amlinellu dyddiad ac amser eich cyfweliad ac yn cynnwys eich côd unigryw er mwyn cyrchu’r cyfweliad ar-lein.

Bydd y cyfweliad yn para tua 30 munud a byddwn yn gofyn i bob un sy’n dod i gyfweliad ddod â phrawf swyddogol o hunaniaeth, megis pasbort neu drwydded yrru. 

Cyn y cyfweliad, efallai y bydd gofyn i chi ddarparu sawl copi wedi’u sganio o ddogfennau megis tystysgrifau  arholiadau. A wnewch chi ddarparu’r rhain yn brydlon a’u dychwelyd drwy e-bost.

Cyfweliadau drwy gyfrwng y Gymraeg

Os hoffech chi gynnal eich cyfweliad drwy gyfrwng y Gymraeg, cysylltwch â’r tîm derbyn drwy e-bost. Sylwer y caiff yr holl gyfweledigion eu trin yn gyfartal ac nid oes mantais nac anfantais sy’n gysylltiedig ag iaith eich cyfweliad. Rydym ni am i’r holl ymgeiswyr allu mynegi eu hunain yn yr iaith sydd fwyaf cyffyrddus iddyn nhw, boed yn Gymraeg neu yn Saesneg, er mwyn iddynt berfformio’n dda yn eu cyfweliad.

Anghenion arbennig

Os oes unrhyw ofynion arbennig gennych ar gyfer diwrnod y cyfweliad, a wnewch chi roi gwybod i'r tîm derbyn drwy e-bost cyn gynted â phosib cyn eich cyfweliad fel bod modd i ni wneud y trefniadau priodol. Rydym yn hapus i'ch cynorthwyo ag unrhyw gais rhesymol ond efallai y bydd yn anodd i ni wneud hyn ar y dydd heb rybudd o flaen llaw.