Mae Prifysgol Abertawe wedi cadw ei statws ymysg y 25 prifysgol orau yn y DU yn ôl The Guardian University Guide, gan gael ei rhestru yn y 24ain safle yn genedlaethol ac aros ar y brig yng Nghymru yn yr argraffiad diweddaraf ar gyfer 2022, a gyhoeddwyd ddydd Sadwrn 11 Medi.
Mae The Guardian University Guide wedi sefydlu'i hun fel tabl cynghrair allweddol ar gyfer prifysgolion y Deyrnas Unedig ac fel un o'r prif ddewisiadau ar gyfer myfyrwyr ledled y byd wrth iddynt benderfynu pa brifysgol sydd orau iddynt hwy.
Mae'r canllaw diweddaraf yn cynnwys tablau cynghrair sy'n rhestru 121 o brifysgolion yn ôl nifer o feini prawf, gan gynnwys boddhad myfyrwyr yn seiliedig ar gyrsiau, addysgu ac adborth, yn ogystal â chyfradd y myfyrwyr sy'n gadael eu cyrsiau a chyfran y graddedigion sy'n cael cyflogaeth broffesiynol neu sy'n dilyn astudiaethau pellach ar ôl graddio. Mae ef hefyd yn cynnwys tablau cynghrair sy'n rhestru prifysgolion yn ôl maes pwnc.
O ran boddhad cwrs, sef y sgôr a roddwyd gan fyfyrwyr yn eu blwyddyn olaf am ansawdd cyffredinol eu cwrs yn yr arolwg cenedlaethol diweddaraf o fyfyrwyr, mae Abertawe wedi cael ei rhestru'n chweched yn y DU am yr ail flwyddyn yn olynol.
Yn ogystal, mae Abertawe wedi dringo naw safle i gael ei rhestru'n 22ain yn y DU am foddhad addysgu, gan aros yn y 23ain safle am ragolygon graddedigion.
Ar lefel pynciau, mae saith pwnc yn y 10 uchaf yn y DU:
- Anatomeg a Ffisioleg – 3ydd
- Meddygaeth – 4ydd
- Troseddeg – 6ed
- Astudiaethau Americanaidd – 6ed
- Peirianneg: Deunyddiau a Mwynau – 8fed
- Astudiaethau'r Cyfryngau a Ffilm – 9fed
- Nyrsio a Bydwreigiaeth – 9fed
Mae pum pwnc arall yn ymddangos yn y 25% uchaf yn y tabl perthnasol i'w pwnc:
- Y Gyfraith
- Y Biowyddorau
- Proffesiynau Iechyd
- Hanes
- Cyfrifiadureg a Systemau Gwybodaeth
Meddai'r Athro Steve Wilks, Profost Prifysgol Abertawe: “Mae'r canlyniadau diweddaraf hyn yn The Guardian University Guide yn ardderchog i Abertawe ac mae'n wych gweld y fath gydnabyddiaeth i waith caled ac ymrwymiad cydweithwyr ym mhob rhan o'r brifysgol. Er gwaethaf y cyfnod heriol rydym wedi ei wynebu dros y flwyddyn ddiwethaf, rydym wedi cadw ein statws ymhlith y 25 prifysgol orau yn y DU ac rydym wedi aros ar y brig yng Nghymru am y drydedd flwyddyn yn olynol. Mae'r canlyniadau o ran boddhad myfyrwyr yn y canllaw hwn hefyd yn dangos ymdrechion ac ymrwymiad ein staff i sicrhau bod myfyrwyr wedi parhau i ddysgu a chael eu cefnogi yn ystod y pandemig.
“Mae'r canlyniadau hyn yn amlygu ymrwymiad Abertawe i gyflwyno profiad ardderchog i fyfyrwyr, gan sicrhau bod ein graddedigion yn magu'r sgiliau angenrheidiol i fynd rhagddynt a mwynhau gyrfaoedd llwyddiannus a buddiol.”
Gweler tablau The Guardian University Guide 2022 yn eu cyfanrwydd.