1. Hafan
  2. Y Brifysgol
  3. Academi Hywel Teifi
  4. Dathlu
  5. Eisteddfodau a digwyddiadau eraill

Eisteddfodau a digwyddiadau eraill

Mae Academi Hywel Teifi yn cynrychioli ac yn hyrwyddo'r Brifysgol ar blatfformau cenedlaethol

Eisteddfod Genedlaethol

Athro M Wynn Thomas, Huw Edwards a Dr Gwenno Ffrancon

Lansiwyd Academi Hywel Teifi yn ystod Eisteddfod Genedlaethol Glyn Ebwy 2010 gan Huw Edwards ym mhresenoldeb y Gweinidog Addysg Leighton Andrews AC a’r Gweinidog Treftadaeth Alun Ffred Jones AC gan ddenu cyhoeddusrwydd helaeth. Sefydlwyd Darlith Goffa Hywel Teifi yn yr Eisteddfod honno a bellach mae wedi dod yn uchafbwynt ar gyfer rhaglen Prifysgol Abertawe yn yr Eisteddfod. Academi Hywel Teifi sy’n gyfrifol am drefnu, cydlynu a hyrwyddo y rhaglen honno, yn ogystal a datblygu ac arbrofi gyda’r dulliau o gynnal presenoldeb y Brifysgol ar y Maes. 

Ers 2010 cynhaliwyd digwyddiad ar gyfer staff, cyn-fyfyrwyr a chyfeillion y Brifysgol gyda’r Is-ganghellor a staff arweiniol yn annerch y derbyniad. Yn ogystal a staff, mae cyfeillion blaenllaw eraill yr Academi fel Huw Edwards, Beti George, Jason Mohammad  a Heini Gruffudd  wedi arwain sesiynau ar stondin y Brifysgol. Mae ffocws gref ar recriwtio a darparu gwybodaeth i ddarpar fyfyrwyr yn yr Eisteddfod, gyda diwyg y stondin yn adlewyrchu’r nod hwn. Defnyddir myfyrwyr presennol yn flynyddol dan gynllun cyflogadwyedd SPIN y Brifysgol i gefnogi’r gweithgareddau recriwtio.  

Eisteddfod yr Urdd

Ysbyty Tedi, Coleg Meddygaeth

Ffurfiodd Prifysgol Abertawe bartneriaeth gydag Urdd Gobaith Cymru yn 2011 er mwyn cefnogi a datblygu y GwyddonLe, sef y babell wyddoniaeth ar faes Prifwyl yr Urdd. Mae staff marchnata Academi Hywel Teifi yn sefydlu ac yn cynnal pwyllgor o arbenigwyr y Gwyddorau o'r Brifysgol yn flynyddol i gynllunio a threfnu y gweithgareddau rhygweithiol ar gyfer ymwelwyr ifanc o bob oed.

Mae’r gweithgareddau yn cynnwys gweithgareddau allestyn cyn wythnos yr Eisteddfod mewn ffurf ymweliadau ysgol, gweithdai a chystadeuthau.

Trwy’r GwyddonLe mae’r Academi yn sicrhau bod modd i staff a myfyrwyr ôl-radd Gwyddorau cyfrwng Cymraeg y Brifysgol ddod â gwyddoniaeth yn fyw i'r degau o filoedd o bobl ifanc sy’n ymweld â’r Maes a rhoi llwyfan i arbenigeddau a phrosiectau gwyddonol y Brifysgol. Mae’r Academi wedi sicrhau bod y Gwyddonle wedi proffesiynoli a datblygu o ran diwyg y gofod a’r cyfleusterau ac allbwn, wrth weithio mewn partneriaeth gyda sefydliadau cenedlaethol fel S4C.   

Tafwyl

Athro Tudur Hallam, Aneurin Karadog

Yn sgil y bartneriaeth sydd wedi ei ffurfio gyda Llenyddiaeth Cymru fe wahoddwyd Academi Hywel Teifi i gyfrannu at raglen pafiliwn llenyddiaethTafwyl yng Nghaerdydd yn 2015. Trefnwyd sesiwn yn hyrwyddo ymchwil ac arbenigedd yr Adran Gymraeg ym maes barddoniaeth. Roedd y sesiwn honno mor llwyddiannus fel y gwahoddwyd yr Academi i noddi y pafiliwn llenyddiaeth, a chyflwyno pedair sesiwn yn ystod 2016. Cynhaliwyd sesiynau i hyrwyddo prosiect y Corpws Cenedlaethol Cymraeg Cyfoes, cyfrol newydd yr Athro Alan Llwyd ar Gwenallt, cyfrol o farddoniaeth ein myfyriwr PhD Aneirin Karadog a bu Dr Elain Price yn sgwrsio am ei chyfrol newydd ar hanes S4C gyda Beti George. 2016 oedd blwyddyn fwyaf llwyddiannus Tafwyl gyda dros 36,000 o bobl yn mynychu’r digwyddiad.   

Gŵyl y Gelli

Athro Alan Llwyd

Mae Prifysgol Abertawe yn cynnal cyfres o ddigwyddiadau yng Ngŵyl y Gelli, ac am y tro cyntaf yn 2018 roedd Academi Hywel Teifi wedi sicrhau bod digwyddiadau cyfrwng Cymraeg yn cael eu cynnal fel rhan o gyfres y Brifysgol.

Roedd sesiynau Academi Hywel Teifi yn arddangos arbenigedd ysgolheigion cyfrwng Cymraeg Prifysgol Abertawe – a hynny mewn gŵyl sy’n denu ymwelwyr o bedwar ban byd. Roedd yr Academi'n falch iawn bod partneriaeth gyffrous y Brifysgol gyda Gŵyl y Gelli yn golygu bod modd i fynychwyr yr ŵyl cael profiad Cymraeg yn ystod eu hymweliad, gan glywed agweddau ar hanes, llenyddiaeth a gwyddoniaeth yn cael eu trafod yn yr iaith.

Graddedigion ar Gampws y Bae Darllenwch y rhifyn diweddaraf o Arwain