Mae ymchwilydd PhD mewn cemeg wedi ennill dwy wobr yn STEM for BRITAIN, sef cystadleuaeth posteri gwyddonol fawr a gynhelir yn Senedd y DU, sydd â'r nod o roi dealltwriaeth i wleidyddion o'r gwaith ymchwil rhagorol y mae ymchwilwyr gyrfa gynnar yn ei wneud ym mhrifysgolion y DU.
Dyfarnwyd gwobrau am y perfformiad gorau wrth gyfleu gwyddoniaeth, peirianneg neu fathemateg lefel uchel i gynulleidfa heb arbenigedd yn y meysydd hynny.
Dyfarnwyd y Wobr Efydd am Gemeg i John Hudson ac enillodd wobr Dyson am ymchwil ragorol tuag at ddyfodol mwy cynaliadwy.
Mae ymchwil John i ddeunyddiau moleciwlaidd wedi datgelu mecanweithiau a allai arwain at oleuadau mwy effeithlon o ran ynni, ar gyfer unrhyw beth o oleuadau stryd i arddangosiadau LED. Gallai ei waith ar ymddygiad cwantwm hefyd helpu i ddatblygu platfformau newydd ar gyfer synwyryddion, er enghraifft, y rhai a ddefnyddir i fesur meysydd trydanol a magnetig gwan ar gyfer delweddu biofeddygol.
Adran Gemeg Prifysgol Abertawe
Dyma sylwadau John Hudson am ei brofiad:
“Roedd esbonio fy ymchwil i gynulleidfa heb arbenigedd gwyddonol yn gyfle gwych – gan ei bod hi'n fwyfwy pwysig meithrin gwybodaeth aelodau’r cyhoedd am ymchwil wyddonol a'u hymddiriedaeth ynddi. Mae'n anrhydedd go iawn bod ein hymchwil i foleciwlau cysefin wedi cael ei gwobrwyo yn STEM for BRITAIN. Fel rhan o grŵp ymchwil ifanc a'r ymdrech i ddatblygu lled-ddargludyddion a deunyddiau uwch o dde Cymru, mae'n gadarnhaol iawn bod ein hymdrechion wedi cael eu cydnabod ar lwyfan cenedlaethol.”
Meddai Dr Emrys Evans, goruchwylydd PhD John yn Adran Gemeg Prifysgol Abertawe:
“Dyma gamp fawr ac rydyn ni'n falch iawn o John, sydd wedi rhannu ei ymchwil ragorol ym maes cemeg a gwyddoniaeth gynaliadwy o Brifysgol Abertawe â’n harweinwyr yn Senedd y DU.”
Meddai Stephen Metcalfe AS, Cadeirydd y Pwyllgor Seneddol a Gwyddonol:
“Mae'r Pwyllgor Seneddol a Gwyddonol yn falch o drefnu a chynnal STEM for BRITAIN. Mae'r gystadleuaeth flynyddol hon yn ddyddiad pwysig yn y calendr seneddol, gan ei bod yn rhoi'r cyfle i aelodau seneddol siarad ag amrywiaeth eang o ymchwilwyr ifanc gorau'r wlad.
“Peirianwyr, mathemategwyr a gwyddonwyr gyrfa gynnar fel y rhain yw penseiri ein dyfodol, a STEM for BRITAIN yw cyfle gorau ein gwleidyddion i gwrdd â nhw a deall eu gwaith.”