Gwneud Cais Am Gwrs Ôl-raddedig Ymchwil

Bydd prosiect a gynlluniwyd ymlaen llaw yn aml yn rhan o waith ymchwil ehangach a wneir gan academydd neu grŵp ymchwil. Fel arfer bydd teitl a nodau ac amcanion penodol i'r mathau hyn o brosiectau, a byddwch fel rheol yn cael eich goruchwylio gan yr academydd a gynlluniodd y prosiect. Mae Prifysgol Abertawe yn hysbysebu nifer fawr o'r cyfleoedd hyn drwy gydol y flwyddyn academaidd ym mhob maes pwnc.

Ysgoloriaethau ymchwil yw prosiectau PhD a gynlluniwyd ymlaen llawn sydd â chyllid cysylltiedig. Mae'r cyllid hwn fel arfer yn talu am gost lawn ffioedd dysgu'r DU/yr UE (weithiau caiff ffioedd rhyngwladol eu talu), yn ogystal â chyflog a delir bob blwyddyn am gyfnod y prosiect.

Caiff prosiectau PhD a hunanariennir eu cynllunio ymlaen llaw gan academydd, ond nid oes cyllid yn gysylltiedig â nhw. Disgwylir i chi dalu cost lawn y ffioedd dysgu eich hunan, a thalu am eich costau byw ar gyfer cyfnod eich astudiaethau.

Hysbysebir yr holl brosiectau a gynlluniwyd ymlaen llaw ar ein tudalennau gwe ysgoloriaethau ymchwil neu graddau PhD a hunanariennir, a chaiff cyfleoedd newydd eu hychwanegu'n rheolaidd.

Cyllid

Mae ysgoloriaethau ymchwil yn Abertawe fel arfer yn cynnig cyllid ar gyfer cyfnod eich astudiaethau. Mae'r cyllid hwn fel arfer yn talu am gost lawn ffioedd dysgu'r DU/yr UE (weithiau caiff ffioedd rhyngwladol eu talu), yn ogystal â chyflog a delir bob blwyddyn am gyfnod y prosiect. Mae'r cyflog yn ddi-dreth, a gellir ei ddefnyddio i dalu eich costau byw pan fyddwch yn astudio.

Os ydych yn astudio prosiect PhD a hunanariennir, disgwylir i chi dalu cost lawn y ffioedd dysgu eich hunan, a thalu am eich costau byw am hyd eich astudiaethau.

Mae benthyciadau PhD ar gael i fyfyrwyr cymwys sy’n byw yng Nghymru a Lloegr sy’n ymgymryd ag astudiaethau doethurol. Ni fyddwch chi’n gallu cyflwyno cais am fenthyciad PhD os ydych chi’n derbyn ysgoloriaeth a ariennir gan gyngor ymchwil neu gyllid arall gan y llywodraeth.

Gwneud cais

Mae gwneud cais am brosiect a gynlluniwyd ymlaen llaw yn syml – yr unig beth y bydd angen i chi ei wneud bydd dilyn y cyfarwyddiadau ar hysbyseb y prosiect. Fel arfer bydd y broses gwneud cais yn cynnwys cyflwyno rhai (neu bob un) o'r dogfennau canlynol:

• Ffurflen gais
• Curriculum Vitae (CV)
• Llythyr eglurhaol
• Geirdaon 
• Tystysgrifau Iaith Saesneg (os nad Saesneg yw eich mamiaith)

Mae'n syniad da cysylltu â'r goruchwyliwr a enwyd wrth wneud cais i drafod y prosiect ymhellach a sicrhau ei fod (a'r goruchwyliwr) yn addas i chi. Os byddwch yn cyrraedd y rhestr fer o ganlyniad i'ch cais, fe'ch gwahoddir i gyfweliad a chewch wybod y canlyniad yn fuan wedi hynny.

Fel arfer bydd dyddiad cau ar gyfer cyflwyno cais a dyddiad dechrau penodol ar gyfer prosiectau a gynlluniwyd ymlaen llaw – rhowch ddigon o amser i'ch hunan i gwblhau unrhyw waith papur a chasglu geirdaon os oes angen.

Bydd angen ychydig mwy o ymdrech a meddwl i gychwyn ar PhD a hunangynlluniwyd, ond yn y bôn, dylech fod â thema i'ch prosiect sydd wirioneddol yn eich cyffroi ac o ddiddordeb i chi. Ar ôl creu syniad cychwynnol ar gyfer prosiect, bydd angen i chi ddod o hyd i oruchwyliwr academaidd priodol. Man dechrau da yw dod o hyd i'r adran yn y Brifysgol sydd â'r meysydd cryf sydd fwyaf perthnasol i'ch gwaith ymchwil. Gallwch hefyd chwilio cyfeiriadur arbenigedd Abertawe i ddod o hyd i academydd sydd â diddordebau ymchwil tebyg i'ch rhai chi.

Cyllid

Os ydych yn ystyried dechrau prosiect a hunanariennir, bydd angen i chi sicrhau eich bod yn gallu talu cost eich ffioedd dysgu a'ch costau byw ar gyfer cyfnod eich astudiaethau. Mae ein tudalennau gwe Ffioedd a Chyllid yn cynnwys llawer o wybodaeth ac argymhellion defnyddiol am ariannu eich astudiaeth PhD. Mae benthyciadau PhD ar gael i fyfyrwyr cymwys sy’n byw yng Nghymru a Lloegr sy’n ymgymryd ag astudiaethau doethurol.

Gwneud cais

Yn gyntaf, dylech asesu eich cymwysterau gradd/profiad gwaith yn erbyn pob gofyniad mynediad a restrir ar dudalen y cwrs ymchwil priodol.

Os ydych yn ansicr a ydych yn bodloni’r gofynion mynediad ar gyfer rhaglen, bydd staff y Swyddfa Derbyn yn hapus i’ch cynghori, e-bostiwch pgradmissions@abertawe.ac.uk

Yn ail, bydd angen i chi gysylltu â darpar oruchwylydd/oruchwylwyr cyn cyflwyno cais ffurfiol. Mae academyddion yn croesawu ymholiadau anffurfiol gan ddarpar fyfyrwyr – yn eich e-bost cychwynnol, dylech gynnwys disgrifiad byr o’ch syniad ymchwil a manylion eich cefndir academaidd/cyflogaeth. Bydd yr academydd yn gallu eich helpu i gyfeirio eich cynnig ymchwil i fod yn brosiect trefnus sy’n gweithio. Unwaith byddwch wedi cysylltu â goruchwylydd priodol ac mae’n argymell eich bod yn bwrw iddi a chyflwyno cais ffurfiol, yna gallwch gyflwyno cais ffurfiol ar gyfer astudiaeth ymchwil bosib.

Sylwer nad yw gofyn i chi gyflwyno cais ffurfiol yn gwarantu cynnig yn y dyfodol. Yn ogystal â chymwysterau academaidd, gall penderfyniadau derbyn fod yn seiliedig ar ffactorau eraill, gan gynnwys (ymysg ffactorau eraill): safon y crynodeb/cynnig ymchwil, perfformiad yn y cyfweliad, hyd a lled y gystadleuaeth am leoedd cyfyngedig, a phrofiad proffesiynol perthnasol.

Bydd angen i chi gyflwyno dau eirda gyda’ch cais ffurfiol a'ch cais ymchwil. Os ydych wedi graddio o fewn y pum mlynedd diwethaf, dylech gael geirdaon gan ddarlithwyr neu diwtoriaid o’ch cwrs blaenorol.

Os oes saib hir wedi bod ers i chi astudio ddiwethaf, bydd tiwtoriaid derbyn weithiau’n derbyn geirdaon gan gyflogwyr neu unigolion addas eraill sy’n gallu rhoi sylwadau ynglŷn â’ch gallu academaidd. Ni dderbynnir geirdaon gan berthnasau neu ffrindiau.

Dylid trin geirdaon gan gyn-gyflogwyr yn ofalus iawn. Mae geirda gan gyflogwr yn werthfawr os ydych yn ystyried gwneud ymchwil mewn maes yr oedd eich gwaith blaenorol yn berthnasol iddo yn unig.

Mae eich cynnig ymchwil yn rhan bwysig o'r broses cyflwyno cais. Mae'n crynhoi'r cwestiwn rydych chi am ei ateb drwy'ch ymchwil. Mae'n arddangos eich gwybodaeth am y maes pwnc ac yn dangos y dulliau rydych chi am eu defnyddio.

Pan fyddwch yn llunio'ch cynnig, mae'n bwysig:

• Amlygu ei wreiddioldeb neu ei arwyddocâd
• Esbonio sut mae'n datblygu neu'n herio gwybodaeth bresennol am eich pwnc
• Nodi pwysigrwydd eich ymchwil arfaethedig
• Dangos pam mai chi yw'r unigolyn cywir i ymgymryd â'r prosiect ymchwil hwn

Darllenwch ein canllaw defnyddiol i ddysgu mwy am ein hawgrymiadau gorau.