Dewis Goruchwyliwr

Mae tair ffordd hawdd i chi ddod o hyd i oruchwyliwr a allai fod â diddordeb yn eich prosiect ymchwil:

1. Chwiliwch fesul unigolyn
   Defnyddiwch gyfeiriadur arbenigedd Abertawe i chwilio am academyddion sy’n gweithio yn eich maes. Chwiliwch trwy gyfrwng allweddeiriau cyffredinol neu feysydd pwnc - porwch drwy broffiliau academaidd i ddarganfod y person mwyaf tebygol o fod â diddordeb yn eich syniad.
2. Chwiliwch fesul pwnc
   Ffordd arall o chwilio am oruchwyliwr yw cael syniad o bwy sy’n gweithio yn eich maes drwy bori trwy dudalennau’r adran ar gyfer y pwnc y mae gennych ddiddordeb ynddo, gwybodaeth am grwpiau neu ganolfannau ymchwil, a bywgraffiadau staff. Fel arall, gallwch e-bostio cyfarwyddwr ymchwil yr adran berthnasol a gofyn iddo argymell goruchwyliwr posibl – manteisiwch ar ei wybodaeth o’r arbenigedd sydd ar gael yn ei adran.

1. Chwiliwch fesul prosiect
   Bydd llawer o ddarpar fyfyrwyr ymchwil, yn enwedig ym meysydd gwyddoniaeth a pheirianneg, yn chwilio am brosiect a gynlluniwyd ymlaen llaw. Caiff y rhain eu hysbysebu gan yr academydd sy’n gyfrifol am y prosiect a fydd fel arfer wedi sicrhau cyllid gan gorff cyllido ar gyfer ysgoloriaeth. Caiff pob un o ysgoloriaethau Abertawe eu hysbysebu drwy gydol y flwyddyn ar ein tudalen ysgoloriaethau ymchwil. Efallai y byddwch hefyd yn dymuno edrych ar ein rhestr o brosiectau PhD a hunanariennir.

1. Peidiwch ag osgoi dewis goruchwyliwr rydych eisoes yn ei adnabod - byddai’n well gan rai myfyrwyr PhD wneud gwaith ymchwil gydag academydd o’u hastudiaeth flaenorol y maen nhw’n ei adnabod ac yn ei hoffi. Mae hyn yn iawn, ond cofiwch mai’r ffactor pwysicaf wrth ddewis goruchwyliwr yw bod ei ddiddordebau â chysylltiad agos â’ch rhai chi.
2. Ymgyfarwyddwch â gwaith eich darpar oruchwyliwr - treuliwch rywfaint o amser yn edrych ar ei restr o gyhoeddiadau. A yw ei ddiddordebau ymchwil yn debyg i’ch rhai chi? Pa mor enwog ydyw? A yw hyn yn bwysig i chi mewn gwirionedd? Mae gwefan sawl prifysgol yn rhoi proffiliau staff academaidd, sy’n rhestru manylion am fyfyrwyr ymchwil blaenorol/presennol goruchwylwyr. Bydd hyn yn dangos i chi’n glir a fydd gan eich darpar oruchwyliwr ddiddordeb yn eich syniad ymchwil.
3. Bydd gan academyddion mwy newydd lai o fyfyrwyr PhD i oruchwylio a llai o ymrwymiadau – sy’n golygu mwy o amser i weithio gyda chi o bosibl. Os ydych yn gweithio’n dda gyda llawer o gymorth ymarferol, mae’n bosibl mae goruchwyliwr o’r fath fydd fwyaf addas ar eich cyfer.
4. Bydd gan academyddion mwy enwog fwy o gyfrifoldebau ac ymrwymiadau - gan gynnwys mwy o fyfyrwyr PhD sy’n mynnu eu sylw. Gallai hyn olygu y byddant yn defnyddio dull llai ymarferol i’ch goruchwylio. Bydd hefyd ganddynt fwy o arbenigedd yn eich maes, a mwy o brofiad o oruchwylio graddau PhD. Byddant hefyd wedi ennill eu plwyf yn fwy – bydd ganddynt fwy o gysylltiadau i chi elwa arnynt o bosibl, a chyfleoedd gwell i rwydweithio neu gael swydd yn y dyfodol.
5. Sut maen nhw’n gweithio a sut rydych chi’n gweithio? A ydych chi’n credu y byddwch yn gymharus? Chi fydd yn cyfeirio ac yn ysgogi eich hun yn ystod astudiaeth PhD i raddau helaeth, ond bydd rhai goruchwylwyr am gymryd mwy o ran yn eich gwaith ymchwil nag eraill. Gofynnwch iddynt beth bydd eu disgwyliadau o ran cyswllt rheolaidd, a sicrhewch eu bod yn ymwybodol o’ch disgwyliadau. Mae’n anochel y bydd hyn yn wahanol o bwnc i bwnc. Mewn rhai pynciau gwyddonol a pheirianneg, gallwch fod yn gweithio gydag academyddion mewn labordy bob dydd. Ar y llaw arall, gall goruchwylwyr gyfathrebu’n fwy drwy e-bost a chyfarfodydd llai rheolaidd mewn pynciau yn y celfyddydau a’r dyniaethau.
6. Beth am gwrdd â nhw am sgwrs anffurfiol cyn i chi ymrwymo i unrhyw beth. Byddwch yn gweithio ochr yn ochr â’r unigolyn hwn am y tair neu’r pedair blynedd nesaf, felly mae’n hollbwysig eich bod yn meithrin perthynas waith dda o’r cychwyn cyntaf.