FLITE A BLOODHOUND Car Uwchsonig

Yr Her

Gofynnodd prosiect Record Cyflymder Tir Bloodhound i dîm Dynameg Hylif Cyfrifiadurol Prifysgol Abertawe greu siâp aerodynamig sy'n gallu cyrraedd 1000mya yn ddiogel ar y tir.

Y Dull

Wedi'i arwain gan yr Athro Ben Evans, chwaraeodd tîm Dynameg Hylifau Gyfrifiadol (CFD) Prifysgol Abertawe rôl allweddol wrth ddylunio Car Uwchsonig BLOODHOUND yn aerodynamig, gan adeiladu ar yr arbenigedd a ddatblygwyd yn ystod prosiect Car Uwchsonig THRUST. 

Cymhwysodd y tîm dechnegau modelu uwch a methodolegau profedig, gan ddefnyddio FLITE, sef yr un system gyfrifiadol a ddefnyddiwyd o'r blaen i ddylunio Car Uwchsonig THRUST, i gynnal efelychiadau hynod fanwl o lif aer a pherfformiad cyffredinol y cerbyd.

Galluogodd FLITE y tîm i fodelu'r rhyngweithiad rhwng y cerbyd symudol a'r tir yn dra chywir a dyma ffactor critigol ar gyflymderau uwchsonig. Gwnaeth y gallu hwn leihau amserau efelychu'n sylweddol, gan alluogi dadansoddiadau awyrofod cymhleth i gael eu cwblhau dros nos, yn hytrach na chymryd sawl mis.

Drwy'r efelychiadau hyn, datblygodd y tîm fodelau cyfrifiadol o'r llifau aerodynamig roedd y BLOODHOUND yn eu profi. Defnyddiwyd y modelau hyn yn ailadroddol i brofi, mireinio ac optimeiddio dyluniad y cerbyd.

Yr Effaith

• Cafodd y system dylunio aerodynameg gyfrifiadol FLITE, ddylanwad uniongyrchol a sylweddol ar ddyluniad terfynol BLOODHOUND. Mae'r nodweddion aerodynamig allweddol a gafodd eu llunio gan y gwaith hwn yn cynnwys ffurfwedd yr olwynion blaen, siâp y trwyn, dyluniad mewnlif yr injan jet, llilinwyr yr olwynion ôl a maint a ffurfiad yr adenydd. O ganlyniad, gwnaeth y tîm Dynameg Hylifau Gyfrifiadol wella perfformiad ac effeithlonrwydd aerodynamig y cerbyd yn sylweddol.
• Roedd system FLITE yn rhan hanfodol o lwyddiant prosiect Car Uwchsonig THRUST, a osododd Record Cyflymder Tir y Byd ym 1997 drwy fod y car cyntaf i dorri'r rhwystr sŵn. Gan adeiladu ar yr etifeddiaeth hon, dyluniwyd BLOODHOUND i gyrraedd cyflymderau o hyd at 1000 mya yn ddiogel, sef oddeutu pum gwaith cyflymach na char Fformiwla 1.
• Mae'r prosiect wedi cyfrannu at annog rhan sylweddol o'r cyhoedd i ymddiddori mewn gwyddoniaeth a pheirianneg. O ganlyniad i FLITE a'r rhaglen BLOODHOUND ehangach, cafwyd menter addysg ar raddfa fawr, gan gynnwys mwy na 5,000 o ysgolion ac ysbrydoli diddordeb mewn pynciau STEM ymhlith pobl ifanc.