Mae un o gyn-fyfyrwyr Academi Hywel Teifi wedi ennill Gwobr Ede and Ravenscroft 2016/17 am gyfraniad eithriadol i fywyd myfyrwyr Prifysgol Abertawe.
Graddiodd Lewys Aron gyda gradd dosbarth cyntaf yn y Gymraeg yn 2017. Bu'n weithgar iawn gydag Undeb y Myfyrwyr Prifysgol Abertawe gan wasanaethu fel Swyddog Materion Cymraeg a'r flwyddyn ganlynol, etholwyd Lewys yn Llywydd Undeb y Myfyrwyr. Yn sgil holl gyflawniadau’r flwyddyn honno, cydnabuwyd Undeb Myfyrwyr Abertawe yn ‘Undeb y Flwyddyn’ ar gyfer 2015-16 gan Undeb Cenedlaethol y Myfyrwyr.
Wrth dderbyn y wobr am £250, dywedodd Lewys, sy'n hanu o Gorslas yng Nghwm Gwendraeth: "Roedd yn bleser astudio ym Mhrifysgol Abertawe ac yn bleser pellach gallu rhoi rhywbeth yn ôl i'r Brifysgol. Dyma brifysgol sy'n dod â'r gorau allan o'i myfyrwyr a dyna pam rwyf wedi bod yn ddigon ffodus i ennill y wobr hon."
Wrth ei longyfarch ar ennill y wobr, dywedodd pennaeth Adran y Gymraeg, Dr Rhian Jones: "Nid oes dwywaith fod Lewys yn llawn haeddu'r wobr hon. Yn ogystal â pherfformio’n ardderchog yn academaidd, cyfrannodd yn helaeth i fywyd y Brifysgol. Yn ystod ei gyfnod fel Swyddog Iaith Gymraeg Undeb y Myfyrwyr ac yna fel Llywydd yr Undeb hwnnw, gweithiodd Lewys yn ddygn ac yn ddiflino i sicrhau datblygiadau sylweddol er lles ei gyd-fyfyrwyr, gan achub ar bob cyfle i hyrwyddo'r iaith. Rydym fel Adran yn hynod falch o'i gyflawniadau ac estynnwn ein llongyfarchiadau gwresog iddo ar dderbyn y wobr."
