Doethuriaeth Peirianneg ym Mhrifysgol Abertawe

Mae'r Ddoethuriaeth Peirianneg (EngD) yn ddewis amgen i'r PhD traddodiadol os oes gennych ddiddordeb mewn dilyn gyrfa yn y diwydiant.

Mae'r EngD yn cyfateb i PhD o ran ei her ddeallusol, ond fel Peiriannydd Ymchwil (myfyriwr EngD), caiff eich gwaith ymchwil ei arwain gan ddiwydiant a byddwch yn gweithio gyda chwmni fel rhan o'ch prosiect. Mae'r rhaglen yn cynnwys elfen a addysgir sy'n ymwneud â hyfforddiant technegol, rhyngbersonol a rheoli.

Mae hwn yn gyfle heb ei ail i gael profiad o waith ymchwil arloesol sy'n berthnasol i ddiwydiant.

Mae'r rhaglen amser llawn pedair blynedd yn cyfuno prosiectau ymchwil ar lefel PhD gyda chyrsiau a addysgir. Byddwch yn treulio o leiaf hanner eich amser yn gweithio'n uniongyrchol gyda chwmni.

Fel Peiriannydd Ymchwil, cewch eich goruchwylio gan ddau academydd a chyswllt diwydiannol yn y cwmni.

Cafodd y cynllun EngD ei sefydlu gan y Cyngor Ymchwil Gwyddorau Ffisegol a Pheirianneg (EPSRC) er mwyn rhoi hyfforddiant ar lefel doethuriaeth i raddedigion uchelgeisiol ac uchel eu cymhelliant, gan roi syniadau newydd ar waith a datblygu gyrfaoedd er mwyn cyrraedd swyddi uwch mewn diwydiant.

Caiff Prifysgol Abertawe ei chydnabod fel un o brifysgolion gorau'r DU ar gyfer peirianneg.

Mae'r cynllun EngD yn un o brosiectau blaenllaw'r Cyngor Ymchwil Gwyddorau Ffisegol a Pheirianneg (EPSRC), sy'n ariannu ein rhaglenni EngD yn rhannol. Mae'r EPSRC yn dewis ariannu sefydliadau uchel eu parch, sy'n anelu at ragoriaeth ym maes ymchwil ac sydd â chysylltiadau diwydiannol da.

Mae holl raglenni EngD Abertawe yn cynnwys bwrsari di-dreth hael ac mae'r holl ffioedd dysgu yn cael eu talu gan y cynllun.

Byddwch hefyd yn cael budd o'r canlynol:

Ymestyn eich gwybodaeth a'ch sgiliau i ddod yn arweinydd yn y diwydiant yn y dyfodol

Gwella eich cyfleoedd a'ch rhagolygon gyrfa

Meithrin profiad gan ddefnyddio'r technegau diweddaraf trwy eich prosiect ymchwil eich hun

Datblygu eich arbenigedd trwy amrywiaeth o fodiwlau a addysgir

Ymuno â rhwydwaith o gyd-beirianwyr ymchwil a chysylltiadau yn y diwydiant

Caiff ein gweithgareddau i gyd eu llywio a'u hategu gan ymchwil o'r radd flaenaf, fel y cydnabyddir yn Fframwaith Rhagoriaeth Ymchwil (REF) 2014, lle cafodd Peirianneg ym Mhrifysgol Abertawe ei rhoi yn y 10fed safle yn y DU am ei sgôr gyfun ar gyfer ansawdd ymchwil yn y disgyblaethau Peirianneg.

Mae'r Fframwaith yn dangos bod 94% o ymchwil ein staff academaidd o'r radd flaenaf (4*) neu'n rhyngwladol ardderchog (3*). Mae hyn wedi cynyddu o 73% yn RAE 2008.

Mae gwaith ymchwil a gaiff ei arloesi yn y Coleg Peirianneg yn manteisio i'r eithaf ar arbenigedd staff academaidd yr adran. Mae'r gwaith ymchwil amlddisgyblaethol arloesol hwn yn llywio ein haddysgu gwych ac mae llawer o'n staff yn arweinwyr yn eu meysydd.

Mae 'gwneud dur' wedi ymdrin â phob agwedd o fwynau i ddur stribed caenog, gorffenedig a chydrannau modurol. Mae prosiectau blaenorol yn cynnwys:

• Dur Cynaliadwy ym maes Adeiladu - dadansoddiad o gylch bywyd dur yn y diwydiant adeiladu
• Priodweddau arwyneb a nodweddion cyrydu caenau aloi tin (Sn) isel
• Prosesu technolegau ffotofoltäig cost isel yn gyflym
• Caenau hybrid newydd ar gyfer cymwysiadau tymheredd uchel
• Efelychiadau cyfrifiadurol effeithiol o broses ffurfio boeth ar gyfer duroedd boron er mwyn helpu i ddatblygu dur
• Astudiaeth o gyrydu lleol ar alwminiwm gan ddefnyddio technegau electrocemegol datblygedig
• Caenau gweithredol ar gyfer Celloedd Solar Llifynnau
• Ymchwilio i Dduroedd Boron fel 'Dur Sbring' addas ar gyfer trawstiau tro siasi cefn moduron

Gweithgynhyrchu uwch mewn tair thema: Awyrofod, Modurol, Pecynnu. Mae prosiectau blaenorol yn cynnwys:

• Geometregau celloedd anilocs ar gyfer electroneg argraffadwy a phecynnu hyblyg 
• Delweddu thermol ar sail system rhagfynegi dyfnder pwll toddi
• Nodweddu a gwerthuso perfformiad triniaethau calsiwm mewn duroedd modurol
• Optimeiddio ansawdd arwyneb caenau sinc cynnyrch gorffeniad llawn ar gyfer y sector modurol ar gyflymder llinell uchel
• Nodweddu cyrydiad ar dduroedd pecynnu sy'n rhydd rhag Cr6+
• Cynhyrchion gorffeniad llawn y genhedlaeth nesaf ar gyfer cymwysiadau modurol
• Duroedd trydanol ar gyfer cydrannau trydanol modurol uwch-weithredol ar gyfer arbedion ynni cyfatebol
• Dulliau gweithgynhyrchu a dylunio newydd a gymhwyswyd i'r cerbyd Record Cyflymder Tir, sef Bloodhound SSC
• Gweithgynhyrchu Uwch drwy Argraffu Dangoswyr yn seiliedig ar Nanoddefnyddiau sydd wedi'u Defnyddio

Mae Metelau Strwythurol ar gyfer Cymwysiadau Tyrbinau Nwy wedi ymdrin â gwaith ymchwil metelegol yn y sectorau awyrofod, morol ac ynni. Mae prosiectau blaenorol yn cynnwys: 

• Profi cymwysiadau awyrofod/niwclear ar raddfa fach
• Ymateb i lwythi cylchol ar gyfer defnyddiau a chydrannau titaniwm alwminid
• Technegau profi newydd i nodweddu defnyddiau strwythurol datblygedig
• Datblygiadau ym maes aloi titaniwm ar gyfer Cymwysiadau Disgiau Ffan Vision 10
• Deall yr effaith a gaiff difrod ocsideiddio, diriant cymedrig a chyflwr yr arwyneb ar ymddygiad craciau lludded aloi disg nicel o ganlyniad i ddatguddiad thermol ar dymereddau uchel
• Nodweddu aloion awyr-beiriant newydd ar raddfa fach