Hysbysiad Hwylus Ffarmacoleg Feddygol

Y sgil allweddol ar gyfer ffarmacolegwyr yw gwir ddiddordeb mewn deall sut mae pethau yn mynd o’i le o ran clefydau a sut rydym yn gallu defnyddio cyffuriau a datblygu cyffuriau newydd i geisio eu datrys.

Mae gan ffarmacolegwyr ddealltwriaeth o gemeg a bioleg, ac yn gallu cyfathrebu eu gwaith yn effeithiol ar lafar ac yn ysgrifenedig i amrywiaeth o gynulleidfaoedd, ac yn gallu gweithio’n annibynnol ac fel rhan o dîm ymchwil/tîm clinigol ehangach.

Mae ffarmacolegwyr yn astudio effaith cyffuriau ar bethau byw, a’r effaith mae pethau byw a’u hamgylchedd yn ei chael ar y cyffuriau hynny. Bydd ein tri maes cyflogadwyedd, fel rhan o’n gradd mewn Ffarmacoleg Feddygol, yn eich galluogi i ddatblygu’r sgiliau a’r wybodaeth am gyffuriau a’u defnydd, a rhoi ichi fynediad i ystod o yrfaoedd cyffrous y mae ffarmacolegwyr yn eu gwneud:

• Hyfforddi fel clinigwyr – trwy ddilyn ein Llwybr i Feddygaeth a symud ymlaen i Feddygaeth i Raddedigion, rydych yn gallu defnyddio’ch gwybodaeth am y ffordd mae cyffuriau yn gweithio er mwyn rhoi’r cyffur cywir i’r claf cywir ar yr adeg gywir.
• Ymchwilio i gyffuriau newydd neu wella sut rydym yn defnyddio meddyginiaethau presennol
• Datblygu technolegau ac arloesedd newydd er mwyn gwella therapïau i gleifion.

Mae swyddi eraill yn cynnwys gyrfaoedd yn y byd academaidd, y diwydiant cynhyrchion fferyllol a rheoleiddio cyffuriau.

Mae Fferylliaeth a Ffarmacoleg yn ddwy ddisgyblaeth wahanol iawn, gydag amcanion tebyg o sicrhau bod meddyginiaethau yn ddiogel ac yn effeithiol i gleifion.

Ffarmacoleg yw'r ddisgyblaeth fiofeddygol sy'n ymwneud â datblygu cyffuriau ac astudio'r effeithiau maent yn eu cael ar organeddau byw. Erbyn hyn, mae gan Ffarmacoleg nifer o isdeuluoedd, sy'n cynnwys, ymhlith eraill:

• Ffarmacocineteg
• Niwroffarmacoleg
• Imiwnoffarmocoleg
• Ffarmacoleg Canser

Mae ffarmacoleg yn hanfodol mewn llawer o ddisgyblaethau biofeddygol. Gallwch weld presenoldeb ffarmacoleg ym mhobman. Mewn cabinetau meddygaeth, pan fyddwch yn ymweld â'r deintydd a phan fyddwch chi'n cymryd math o feddyginiaeth  Efallai y bydd gan ffarmacolegwyr ddealltwriaeth arbenigol o effaith cyffuriau ar gorff organeb byw mewn meysydd therapiwtig penodol; ffarmacoleg gardiofasgwlaidd neu ffarmacoleg gastroberfeddol, er enghraifft. Efallai y byddant yn gweithio fel rhan o dîm amlddisgyblaethol sy'n cynnwys fferyllwyr fel rhan o'r broses dylunio a datblygu cyffuriau. Yn ogystal, efallai byddant yn rhan o waith ymchwil sy’n ymwneud â sut mae cyffuriau'n gweithio a sut maent yn effeithio ar y corff. Mae ffarmacolegwyr yn helpu i wella therapïau presennol, yn ogystal â darganfod a datblygu meddyginiaethau newydd i'w defnyddio ym maes gofal iechyd.

Ar y llaw arall, mae Fferylliaeth yn ddisgyblaeth fiofeddygol alwedigaethol sy'n cynnwys agweddau ar ffarmacoleg, ffarmafferyllol, cemeg fferyllol, biocemeg, ffisioleg ddynol, ymarfer fferylliaeth a fferylliaeth glinigol.

Yn hanesyddol, cafodd Fferylliaeth ei hystyried fel gwyddor paratoi, cadw, cyfuno a dosbarthu meddyginiaethau. Fodd bynnag, mae Fferylliaeth yr oes fodern hefyd yn cynnwys darganfod, dylunio a datblygu cyffuriau. Mae'n broffesiwn cofrestredig sydd wedi symud o ddosbarthu meddyginiaethau i reoli meddyginiaethau a rheoli cleifion ag anghenion cymhleth. Mae fferyllwyr yn helpu i ddatblygu a gwella'r defnydd o feddyginiaethau presennol a newydd ym maes gofal iechyd.

Gan fod Fferyllwyr yn arbenigwyr meddyginiaeth, maent yn gallu gwerthuso priodoldeb clinigol meddyginiaethau a ragnodwyd, adolygu a monitro cleifion a chyfeirio'n briodol i sicrhau diogelwch cleifion. Mae fferyllwyr heddiw yn rhan o ddatblygu a defnyddio meddyginiaethau personol, therapïau CAR-T a brechlynnau.

Mae astudio fferylliaeth fel meddu ar radd sy'n basbort rhyngwladol, gan eich galluogi chi i weithio yn y gymuned, mewn ysbytai, meddygaeth gyffredinol (meddyg teulu), academia, ymchwil, gofal cartref, materion rheoleiddio, carchardai a fferylliaeth filfeddygol a milwrol. Mae llawer o fferyllwyr heddiw yn rhagnodwyr annibynnol ac yn aelodau allweddol o dimoedd amlddisgyblaethol sy’n sicrhau darpariaeth gofal di-dor.

Mae ffarmacolegwyr yn canolbwyntio ar ddatblygu triniaethau a chyffuriau er mwyn trin clefydau. Mae’r yrfa hon yn amrywiol ac yn cynnig ystod o gyfleoedd ledled y DU a’r byd mewn sectorau fel y byd academaidd a’r diwydiant cynhyrchion ffarmacolegol. Mae ffarmacoleg yn yrfa amrywiol iawn, sy’n eich galluogi i archwilio effeithiau cyffuriau ar lefel genetig a lefel folecwlaidd, hyd at effeithiau cyffuriau ar gleifion.

Mae hyfforddiant mewn ffarmacoleg yn agor y drws i yrfaoedd mewn ymchwil i ganser, ffarmacoleg gardiofasgwlaidd, ffarmacoleg filfeddygol a meddygaeth glinigol.

Ar gyfer gyrfa ymchwil, gall ffarmacolegwyr ymgymryd â PhD. Yr isafswm cenedlaethol ar gyfer cyflog doethur am 2020/2021 yw £15,285.

Mae gan yrfaoedd yn y byd academaidd neu ym myd diwydiant gyflog cychwynnol o dua £35,000 ar ôl cwblhau PhD. Yn aml, bydd cyflogau ym myd diwydiant yn uwch nag yn y byd academaidd ond bydd ffarmacolegydd a chanddo PhD yn debygol o ennill yn fwy nag un heb PhD.

Mae ffarmacolegwyr ar lefel uwch yn gallu disgwyl ennill >£65,000.

_{*Mae ffigyrau incwm yn ddangosol ac yn esiampl yn unig.}

Nid yw ffarmacolegwyr yn trin cleifion yn uniongyrchol. Yn hytrach, mae ffarmacolegwyr yn datblygu’r meddyginiaethau a ddefnyddir gan glinigwyr i drin cleifion. Mae ffarmacolegwyr yn gweithio i ddarganfod dulliau newydd i drin clefydau a datblygu’r meddyginiaethau hynny o fainc y labordy i ochr y gwely.

Bydd gradd israddedig mewn Ffarmacoleg yn rhoi ichi’r sgiliau ynghylch sut mae cyffuriau’n effeithio ar y corff a sut mae’r corff yn effeithio ar y cyffur, sy’n gallu helpu i’ch paratoi ar gyfer gyrfa mewn meddygaeth glinigol. Mae rhai clinigwyr hyd yn oed yn arbenigo fel Ffarmacolegwyr Clinigol.