Parhau i Ddysgu – y Gyfraith

Mae Dr Emma Borland yn ystyried sut rydym yn diffinio ffoadur o dan y gyfraith ryngwladol a pham mae hyn yn bwysig.

Mae hi’n trafod yr hanes sydd wedi newid cyfraith ryngwladol, megis dadleoli torfol pobl yn ystod yr Ail Ryfel Byd a Chonfensiwn y Ffoaduriaid 1951 a luniwyd yn sgil hyn, sy’n parhau i fod yn gonglfaen y gyfraith ar ffoaduriaid heddiw.

Cyflwyniad i ‘eiriolaeth’ gan Billy Seagrim, Uwch-ddarlithydd yn Ysgol y Gyfraith. Mae Billy yn trafod egwyddorion sylfaenol eiriolaeth a dod yn eiriolwr galluog, gan gynnwys llawer o awgrymiadau a chanllawiau defnyddiol a ddysgwyd gan Billy yn ystod ei gyfnod fel Bargyfreithiwr proffesiynol.

Mae’r fideo hwn yn cynnwys tasg i chi ei chwblhau er mwyn dechrau ymarfer eich sgiliau eirioli.

Mae Dr Ryan Murphy yn darparu cyflwyniad i’r cyfreithiau a’r system gyfreithiol sydd mewn grym yng Nghymru a Lloegr drwy ystyried natur y gyfraith, a sut mae hyn yn effeithio ar bob elfen o’n bywydau beunyddiol.

Mae Ryan yn defnyddio paned o goffi fel enghraifft, gan edrych ar y cyfreithiau mae’n rhaid eu hystyried wrth gynhyrchu’r coffi, y ffordd mae’n cael ei ddosbarthu a’i yfed, ac mae’n esbonio sut mae hyn yn berthnasol i bob un o feysydd y gyfraith.

Dilynwch gyflwyniad sleidiau Cerys i ddysgu am anonestrwydd, un o gysyniadau allweddol cyfraith trosedd. Mae Cerys yn esbonio sut mae anonestrwydd yn gysyniad allweddol mewn amrywiaeth o droseddau a sut mae cyfreithiau Cymru a Lloegr yn ei ddiffinio.

Mae’r cyflwyniad hefyd yn cynnwys tair sefyllfa i chi weithio drwyddynt, sy’n cynnwys cwestiynau unigryw i ddatblygu eich gwybodaeth. Gallwch wrando ar sylwebaeth Cerys drwy glicio’r eicon sain yng nghornel dde uchaf pob sleid.

Dylech wylio’r cyflwyniad hwn gan ddefnyddio cyfrifiadur personol pen desg neu liniadur lle bynnag y bo modd.

Trosolwg o sut mae’r gyfraith yn ymdrin â rhyddid mynegiant a rheoleiddio iaith casineb gan Ddarlithydd yn y Gyfraith, Dr Val Aston.

Mae Val yn siarad am y materion sydd ynghlwm wrth yr angen i amddiffyn rhyddid mynegiant, ond hefyd i ddiogelu’r cyhoedd rhag iaith casineb ar yr un pryd. Mae hi hefyd yn trafod anawsterau diffinio iaith casineb yn y gyfraith, gan ganiatáu rhyddid i bobl fynegi eu barn ar yr un pryd, ac mae’n gofyn a ydych chi’n meddwl bod y gyfraith yn darparu’n ddigonol ar gyfer hyn neu a allem wneud mwy?

Mae Dr Patrick Bishop yn rhoi cyflwyniad i un o elfennau allweddol y gyfraith yng Nghymru a Lloegr, cyfraith camwedd, y byddech yn ei hastudio’n llawer manylach fel un o’r saith modiwl sy’n rhan o’ch gradd yn y gyfraith.

Mae Patrick yn siarad am gamwedd esgeulustod yn benodol, sef un o feysydd pwysicaf a mwyaf dylanwadol a defnyddiol cyfraith camwedd.

Sesiwn am ‘ddiffinio terfysgaeth yn y Deyrnas Unedig’ gan Dr Katy Vaughan, sy’n arbenigo yn y maes hwn.

Mae Katy yn ystyried sut mae’r gyfraith yn y DU yn diffinio terfysgaeth – yn y Ddeddf Terfysgaeth – a’r digwyddiadau a ddylanwadodd ar y ddeddfwriaeth hon. Trafodir sawl enghraifft o weithredoedd terfysg posib, er mwyn i chi benderfynu a ydynt yn cydweddu â diffiniad y DU o derfysgaeth ai peidio.

Mae’r Athro Michael Draper a Matthew Parry yn trafod egwyddorion sylfaenol cyfraith tir yn y podlediad byr hwn ac yn chwalu ychydig o ‘fythau’ cyffredin am gyfraith tir ar yr un pryd!

Mae Cyfraith Tir yn un o’r saith modiwl y byddwch yn eu hastudio yn ystod dwy flynedd gyntaf eich gradd yn y gyfraith, ac mae’n ymdrin â’r ffyrdd o ddefnyddio tir a’i gyflenwad, gan gynnwys yr hawliau i ddefnyddio tir neu allgau eraill ohono.

Mae Dr Ryan Murphy, Cyfarwyddwr Dysgu ac Addysgu yn Ysgol y Gyfraith, yn darparu canllaw cynhwysfawr i sicrhau profiad gwaith yn y gyfraith.

Mae Ryan yn trafod y mathau gwahanol o brofiad gwaith sydd ar gael, y manteision mae pob un yn eu cynnig ac mae’n darparu rhestr o adnoddau defnyddiol i chi ddysgu rhagor. Gallwch lawrlwytho’r canllaw drwy glicio’r ddelwedd gyferbyn.

Trafodaeth gan Dr Patrick Bishop am iaith ar-lein, sef y pwnc mae’n ei addysgu ar ein modiwl seiberdroseddu. Mae Patrick yn siarad am gyfathrebiadau ar-lein, sut cânt eu rheoleiddio a ‘The Online Disinhibition Effect’ gan John Suler, sy’n trafod pam mae pobl yn ymddwyn yn wahanol i’r arfer ar-lein. Byddai hyn yn ddeunydd darllen pellach da os oes gennych ddiddordeb yn y pwnc hwn.

Mae Dr Ryan Murphy yn trafod prif nodweddion achos, gan gynnig cyflwyniad i gyfraith achosion, a sut caiff adroddiadau am achosion cyfreithiol eu llunio.

Mae cyfraith achosion yn gasgliad o benderfyniadau cyfreithiol blaenorol a wnaed gan y llysoedd, a chaiff ei defnyddio i bennu cynsail, er mwyn osgoi amwysedd neu ddryswch wrth benderfynu ar achosion cyfredol.

Mae ein hacademyddion wedi darparu eu rhestr orau o lyfrau, podlediadau ac adnoddau ar-lein eraill y dylai pob myfyriwr eu darllen, er mwyn cael trosolwg o elfennau amrywiol o’r gyfraith a’n system gyfreithiol. Bwriad y rhain yw rhoi blas i chi ar y deunydd y gallech fod yn ymdrin ag ef wrth astudio’r gyfraith yn y brifysgol.