Cyrsiau MSc Cyfrifiadurol

Mae Prifysgol Abertawe wedi bod yn sefydliad sy'n arwain y byd ym maes Peirianneg Gyfrifiadurol ers y 1960au

Ynglŷn â'n cyrsiau msc cyfrifiadol

Mae'r cyrsiau MSc Cyfrifiadol ar gyfer myfyrwyr sy'n barod i ennill y sgiliau sydd eu hangen arnynt i ddatblygu dulliau cyfrifiadol a’u rhoi ar waith at ddiben efelychu’n rhithwir amrywiaeth eang o broblemau ffisegol, gan gynnwys mecaneg solet, deinameg hylifau, symudiad tonnau ac aml-ffiseg. Mae'r cwrs yn cynnwys modiwlau dewisol mewn dysgu peirianyddol a dulliau a ysgogir gan ddata.

Mae ymgeiswyr i’r cyrsiau MSc fel arfer yn fyfyrwyr sydd â chefndir mewn disgyblaeth peirianneg (fecanyddol, awyrofod, sifil neu drydanol) neu wyddoniaeth (mathemateg, ffiseg). Rhaglen amlddisgyblaethol yw hon, gyda modiwlau sy'n addas i'r rhai sydd am ddatblygu sgiliau peirianneg gyfrifiadol er mwyn gwella eu gyrfaoedd ym maes peirianneg a gwyddoniaeth.

Mae tri chwrs ar gael:

Gweld y cwrs

Peirianneg Gyfrifiadol, MSc:

Mae'r cwrs hwn ar gyfer myfyrwyr sy'n barod i ennill y sgiliau sydd eu hangen arnynt i ddatblygu dulliau cyfrifiadol ar gyfer problemau'r byd go iawn. Mae'r cwrs hwn yn para blwyddyn, a bydd modd i'r myfyrwyr deilwra'r radd drwy ddewis un o'r tri arbenigedd gwahanol sydd ar gael iddynt: Offer meddalwedd, dulliau a ysgogir gan ddata, a thechnegau rhifiadol.

Gweld y cwrs

Peirianneg Gyfrifiadol gyda Diwydiant, MSc:

Mae’r cwrs hwn ar gyfer myfyrwyr rhyngwladol yn unig. Estyniad o'r MSc mewn Peirianneg Gyfrifiadol yw hwn, gydag ail flwyddyn. Yn ystod yr ail flwyddyn, byddwch yn ymgymryd â naill ai lleoliad diwydiannol neu brosiect sy'n canolbwyntio ar ddiwydiant i weithio ar her ymarferol mewn cydweithrediad ag un o nifer o bartneriaid diwydiannol.

Gweld y cwrs

Mecaneg Gyfrifiadol, MSc Rhyngwladol:

Cwrs MSc 2 flynedd yw hwn mewn cydweithrediad ag Universitat Politècnica de Catalunya (UPC) yn Barcelona, Sbaen. Gall myfyrwyr treulio’r flwyddyn gyntaf yn Abertawe a'r ail flwyddyn yn UPC neu i'r gwrthwyneb. Ar ddiwedd y flwyddyn gyntaf, maen nhw'n ymgymryd â lleoliad diwydiannol. Mae'r cwrs hwn yn rhoi cyfle unigryw i astudio mewn dwy brifysgol adnabyddus yn y maes ac mewn dwy wlad wahanol. Felly, mae'n cynnig ystod eang o fodiwlau dewisol i arbenigo mewn nifer o feysydd mecaneg gyfrifiadol, yn Abertawe ac yn Barcelona.

Pam msc cyfrifiadol yn Abertawe?

Caiff y cyrsiau MSc Cyfrifiadol eu haddysgu gan academyddion sydd gyda'r goreuon yn y byd ac fe'u cynghorir gan Bwyllgor Llywio Diwydiannol sydd ag arbenigwyr diwydiannol ym maes peirianneg gyfrifiadol. Mae'r Pwyllgor Llywio Diwydiannol yn cynnwys:

Hexagon
Rolls-Royce
Rockfield
Peritus International
Pebble Engineering

Bydd gan fyfyrwyr fynediad am ddim at yr holl feddalwedd sydd ei hangen i ymgymryd â'u hastudiaethau, ar gyfrifiaduron y Brifysgol ac yn eu cartrefi. Ar gyfer eu traethawd hir bydd ganddynt hefyd fynediad at y cyfleusterau cyfrifiadura perfformiad uchel sydd ar gael yn Abertawe, gan gynnwys y Clwstwr Effaith a chyfleusterau Uwchgyfrifiadura Cymru yn Abertawe, sydd â chyfanswm o 4,920 o greiddiau a 47 Tb o gof RAM.

Cyfleoedd Cyflogaeth

Mae ystod eang o gyfleoedd ar gael i raddedigion y cwrs MSc Peirianneg Gyfrifiadol. Bydd cyfle iddynt gael swyddi ym myd diwydiant neu yn y byd academaidd, gan ddibynnu ar eu diddordebau.

O ganlyniad i sgiliau unigryw peiriannydd cyfrifiadol, mae'r cyflog disgwyliedig fel arfer yn uwch na chyflog peiriannydd arferol. Er enghraifft, yn y DU, cyflog cyfartalog peiriannydd cyfrifiadol ym mis Tachwedd 2022 oedd £43,000, tra mai £38,000 oedd cyflog cyfartalog peiriannydd. Mae'n werth nodi bod cyflogwyr sy'n chwilio am raddedigion yn defnyddio naill ai "Peiriannydd Cyfrifiadol", "Peiriannydd Modelu" neu "Beiriannydd Efelychu" yn eu disgrifiadau.

Mae cwmnïau sy'n cynnig swyddi i Beirianwyr Cyfrifiadol yn cynnwys rhai o frandiau enwocaf y byd, sef Alphabet, Amazon, Apple, Boeing, Chevron, Coca-Cola, ExxonMobil, General Dynamics, HP, IBM, Intel, Meta, Microsoft, Nike, Pfizer, Tesla.

Wedi iddynt raddio, mae'n well gan rai myfyrwyr ddilyn PhD mewn Peirianneg Gyfrifiadol. Mae ein graddedigion wedi mynd ymlaen i ddilyn graddau PhD yn llawer o brifysgolion blaenllaw’r byd, ac mae gan lawer o raddedigion Abertawe swyddi ymchwil neu academaidd mewn prifysgolion a chanolfannau ymchwil a datblygu uchel eu bri.