Doethur mewn Gweinyddu Busnes, DBA

Fel arfer rhaid i ymgeiswyr am y DBA feddu ar radd israddedig o brifysgol gymeradwy a rhaid iddynt fod wedi ennill ail ddosbarth uwch (2:1) neu well, neu gymhwyster cyfwerth. Hefyd, fel arfer bydd gan ymgeiswyr radd meistr neu gymhwyster tebyg o brifysgol gymeradwy, neu dylent fod yn astudio am gymhwyster o'r fath.

Fel arfer disgwylir y bydd gan ymgeiswyr o leiaf bum mlynedd o brofiad mewn rôl uwch.

Bydd dau gynrychiolydd o dîm arweinyddiaeth y rhaglen (gan gynnwys cyfarwyddwr y rhaglen fel arfer) yn cyfweld â'r holl ymgeiswyr, a disgwylir i ymgeiswyr ddangos y dyfalbarhad a'r gallu deallusol i ymgymryd â'r DBA.

Iaith Saesneg

Sgôr IELTS gyffredinol o 6.5 (heb unrhyw elfen unigol yn is na 6.5) neu gymhwyster cyfwerth a gydnabyddir gan Brifysgol Abertawe. Mae manylion llawn am ein polisi Iaith Saesneg, gan gynnwys am faint o amser y mae tystysgrifau'n ddilys, i'w gweld yma.

Yn ogystal â chymwysterau academaidd, gall penderfyniadau ynghylch derbyn fod yn seiliedig ar ffactorau eraill gan gynnwys y canlynol: safon y crynodeb/cynnig ymchwil, perfformiad yn y cyfweliad a dwysedd y gystadleuaeth am nifer cyfyngedig o leoedd.  Ar gyfer y DBA yn benodol bydd profiad proffesiynol perthnasol yn cael ei ystyried.

Yn ogystal â chymwysterau academaidd, gellir seilio penderfyniadau ynghylch derbyn myfyrwyr ar ffactorau eraill, gan gynnwys ond heb fod yn gyfyngedig i: safon y crynodeb/cynnig ymchwil, perfformiad yn ystod y cyfweliad, lefel y gystadleuaeth am leoedd cyfyngedig a phrofiad proffesiynol perthnasol.

Gofyniad am eirda

Yn arferol, gofynnir am ddau eirda cyn y gallwn anfon ceisiadau i Diwtor Derbyn rhaglenni ymchwil y Coleg/Ysgol i'w hystyried.

Caiff ceisiadau a dderbynnir heb ddau eirda wedi'u hatodi atynt eu gohirio nes y derbynnir y geirda sy'n weddill. Sylwer y gall oedi hir wrth dderbyn y geirda sy'n weddill arwain at ohirio'ch cais tan ddyddiad cychwyn/mis derbyn posib diweddarach, o'i gymharu â'r dyddiad y rhestroch yn gychwynnol fel y dyddiad dechrau o'ch dewis.

Efallai yr hoffech ystyried cysylltu â'ch canolwr (canolwyr) i'n cynorthwyo wrth dderbyn y geirda sy'n weddill neu, fel arall, gallwch ohirio cyflwyno'ch cais nes eich bod wedi dod o hyd i'ch geirda. Sylwer nad cyfrifoldeb Swyddfa Derbyn y Brifysgol yw dod o hyd i'r geirda sy'n weddill ar ôl i ni anfon e-bost cychwynnol at y canolwyr (canolwyr) a enwebwyd gennych, gan ofyn am eirda ar eich rhan chi.

Gall y geirda hwn fod ar ffurf llythyr ar bapur pennawd swyddogol neu gellir ei gyflwyno ar ffurflen geirda safonol y Brifysgol. Cliciwch ar y ddolen hon i lawrlwytho ffurflen geirda'r Brifysgol.

Fel arall, gall canolwyr anfon geirda mewn e-bost o'u cyfrif e-bost gwaith. Sylwer na ellir derbyn geirda a anfonir oddi wrth gyfrifon e-bost preifat, (h.y. Hotmail, Yahoo, Gmail).

Gellir cyflwyno geirda i pgradmissions@abertawe.ac.uk.

Dynodir tîm goruchwylio i chi ar ddechrau'r rhaglen DBA, a fydd yn cynnwys Cyfarwyddwr Astudiaethau ac ail oruchwyliwr.  Byddwch hefyd yn rhan o gymuned o fyfyrwyr doethurol o bob rhan o'r Ysgol, yn ogystal â'ch grŵp o fyfyrwyr ar y rhaglen DBA.

Cewch eich cefnogi gan dîm ymroddedig o staff academaidd a gwasanaethau proffesiynol, ynghyd â’ch cyd-fyfyrwyr a siaradwyr o amrywiaeth eang o sectorau.  Arweinir pob un o'r chwe modiwl a addysgir gan gydlynydd modiwl, gyda chymorth nifer o gydweithwyr.

Blociau Addysgu Dwys
Mae'r DBA yn cynnwys chwe modiwl a fydd yn cael eu cyflwyno dros dair blynedd; gyda dau fodiwl yn cael eu cyflwyno bob blwyddyn.

Er bod y DBA yn cael ei arwain gan ymchwil a bydd gwaith yn cael ei wneud o bell, bydd pob modiwl yn cael ei strwythuro o amgylch bloc addysgu dwys tri diwrnod. Sy'n golygu y bydd gofyn i chi fynychu seminarau a gweithdai wyneb yn wyneb ar Gampws y Bae yn Abertawe ddwywaith y flwyddyn.

I'r rhai sy'n cofrestru ym mis Hydref, bydd eich sesiynau wyneb yn wyneb tri diwrnod yn debygol o ddigwydd yn ystod y misoedd canlynol:

• Tachwedd
• Mai

Mwy o fanylion am union ddyddiadau ac amseriadau i ddilyn.

Mae ffioedd dysgu ar gyfer blynyddoedd o astudiaeth ar ôl eich blwyddyn gyntaf yn amodol ar gynnydd o 3%.

Gallwch ddod o hyd i ragor o wybodaeth am ffioedd a sut i dalu ar ein tudalen ffioedd dysgu.

Efallai y byddwch yn gymwys i gael arian i helpu i gefnogi eich astudiaethau. I gael gwybod am ysgoloriaethau, bwrsariaethau a chyfleoedd cyllido eraill sydd ar gael, ewch i dudalen ysgoloriaethau a bwrsariaethau'r Brifysgol.

Myfyrwyr cyfredol: Gallwch ddod o hyd i ragor o wybodaeth am ffioedd a sut i dalu ar ein tudalen ffioedd dysgu.

Mae’n bosib eich bod yn gymwys i gael cymorth ariannol tuag at eich astudiaethau.

Mae arian gan y llywodraeth bellach ar gael ar gyfer myfyrwyr o Gymru, Lloegr a'r UE sy'n dechrau ar raglenni ymchwil Ôl-raddedig ym Mhrifysgol Abertawe. I gael mwy o wybodaeth, ewch i'n tudalen benthyciadau Ôl-raddedig.

I gael gwybod am ysgoloriaethau, bwrsariaethau a chyfleoedd eraill am gymorth ariannol sydd ar gael, ewch i dudalen ysgoloriaethau a bwrsariaethau'r Brifysgol.

Mae ysgoloriaethau a bwrsariaethau hael ar gael gan Academi Hywel Teifi, Prifysgol Abertawe a’r Coleg Cymraeg Cenedlaethol ar gyfer myfyrwyr sy'n dymuno astudio trwy gyfrwng y Gymraeg neu'n ddwyieithog. I ddysgu mwy am y cyfleoedd sydd ar gael i chi, ewch i dudalen Ysgoloriaethau a Bwrsariaethau Academi Hywel Teifi

Ysgoloriaethau Academi Dysgu Ddwys Cymru

Os ydych yn bwriadu gwneud gwaith ymchwil DBA mewn Iechyd a Gofal sy'n Seiliedig ar Werth, ac yn gweithio o fewn GIG Cymru, gofal cymdeithasol a sefydliadau'r trydydd sector; gallwch ymgeisio am ysgoloriaeth llawn fel rhan o Academi Dysgu Ddwys (ADD) Llywodraeth Cymru.

Bydd angen i ymgeiswyr fod wedi gwneud cais am ysgoloriaeth a chael eu derbyn ar y cwrs cyn y gellir dyfarnu ysgoloriaeth. 

Bydd mynediad i'ch dyfais ddigidol eich hun/y pecyn TG priodol yn hanfodol yn ystod eich amser yn astudio ym Mhrifysgol Abertawe. Bydd mynediad at wifi yn eich llety hefyd yn hanfodol i'ch galluogi i ymgysylltu'n llawn â'ch rhaglen. Gweler ein tudalennau gwe pwrpasol i gael arweiniad pellach ar ddyfeisiau addas i'w prynu, ac i gael canllaw llawn ar sefydlu'ch dyfais.

Efallai y byddwch chi'n wynebu costau ychwanegol tra byddwch chi yn y brifysgol, gan gynnwys (ond heb fod yn gyfyngedig i):

• Teithio i'r campws ac oddi yno
• Costau argraffu, llungopïo, rhwymo, deunydd ysgrifennu ac offer (e.e. ffyn USB)
• Prynu llyfrau neu werslyfrau
• Gwisgoedd ar gyfer seremonïau graddio

Rydyn ni’n deall bod ymgeiswyr ar gyfer y DBA yn debygol o fod yn weithwyr proffesiynol prysur ac, felly, rydyn ni’n ymdrechu i gynnig ymagwedd gefnogol at y broses ymgeisio. Felly, rydym yn argymell eich bod chi’n cymryd y camau canlynol:

1. Gwiriwch eich bod yn bodloni meini prawf derbyn y rhaglen DBA.
2. Ystyriwch pa faes ymchwil sy'n debygol o fod o ddiddordeb i chi.
3. Trefnwch gael sgwrs ag aelod o dîm y DBA i drafod cwestiynau a allai fod gennych, er enghraifft, ynghylch cymhwysedd a'ch maes ymchwil arfaethedig.  Mae hyn yn caniatáu i ni ddechrau cynllunio goruchwyliaeth bosib ar gyfer eich DBA. Yn ogystal, gallwn eich cynghori ar gynnwys eich cynnig ymchwil. Cysylltwch â Chyfarwyddwr y Rhaglen, Dr Simon Brooks, yn uniongyrchol yn s.b.brooks@swansea.ac.uk
4. Cwblhewch ein ffurflen gais ar-lein. Gwnewch yn siŵr eich bod yn cynnwys curriculum vitae sy'n amlygu eich profiad proffesiynol yn ogystal â'ch cynnig ymchwil.

Fframwaith Amser a Awgrymir ar gyfer Cyflwyno Cais

Er mwyn caniatáu digon o amser i gael trafodaeth â thîm y DBA, llunio eich cais ac i’r Ysgol Reolaeth ei ystyried, rydym yn argymell eich bod yn dechrau'r broses erbyn diwedd mis Awst i ddechrau’r rhaglen ym mis Hydref.  Sylwer y gellir cyflwyno cais unrhyw adeg, ond mae'n bosib y bydd angen rhoi eich cais o'r neilltu neu ohirio eich cynnig tan y cyfnod derbyn priodol nesaf.

Amseroedd Arfaethedig ar gyfer Cyflwyno Cais

Er mwyn caniatáu digon o amser i'ch cais gael ei ystyried gan academydd, ac i ganiatáu i amodau cynnig posib megis teithio/adleoli gael eu bodloni, argymhellwn eich bod yn cyflwyno cais cyn y dyddiadau a nodir isod. Sylwer y gellir cyflwyno ceisiadau y tu allan i'r dyddiadau a awgrymir isod o hyd, ond mae'n bosib y gall fod angen gohirio'ch cais/eich cynnig posib i'r dyddiad derbyn priodol nesaf.

Cofrestru ym mis Hydref

Ymgeiswyr o'r DU – 15 Awst

Ymgeiswyr o'r UE/ymgeiswyr rhyngwladol – 15 Gorffennaf

Cofrestru ym mis Ionawr

Ymgeiswyr o'r DU – 15 Tachwedd

Ymgeiswyr o'r UE/ymgeiswyr rhyngwladol – 15 Hydref

Cofrestru ym mis Ebrill

Ymgeiswyr o’r Deyrnas Unedig – 15 Chwefror

Ymgeiswyr o'r UE/ymgeiswyr rhyngwladol – 15 Ionawr

Cofrestru ym mis Gorffennaf

Ymgeiswyr o'r DU – 15 Mai

Ymgeiswyr o'r UE/ymgeiswyr rhyngwladol – 15 Ebrill

Manyleb Rhaglen Doethur mewn Gweinyddu Busnes, DBA

Mae manyleb y rhaglen hon yn cyfeirio at y flwyddyn academaidd gyfredol ac mae'n darparu cynnwys dangosol er gwybodaeth. Bydd y Brifysgol yn gwneud pob ymdrech i ddarparu pob cwrs yn unol â'r disgrifiadau a geir yn nhudalennau gwe'r cwrs perthnasol ar adeg ymgeisio. Fodd bynnag, gall fod sefyllfaoedd pan fydd yn ddymunol neu'n angenrheidiol i'r Brifysgol wneud newidiadau yn narpariaeth y cwrs naill ai cyn neu ar ôl cofrestru.

Crynodeb o'r Rhaglen

Mae DBA Ysgol Reolaeth Abertawe yn ddoethuriaeth broffesiynol ran-amser a gynlluniwyd ar gyfer uwch-reolwyr ac arweinwyr ym mhob sector, preifat, cyhoeddus a'r sector nid er elw.

Ar raglen DBA Abertawe, bydd dysgwyr yn ymgymryd ag ymchwil gymhwysol, gan ddefnyddio damcaniaeth sefydledig ac arloesol i ymdrin â materion ymarferol eu sefydliadau. Byddwch yn datblygu ac yn cyfoethogi ymarfer yn eich maes yn ogystal â chyfrannu at ein dealltwriaeth o sylfaen ddamcaniaethol y gwaith.

Mae ymagwedd strwythuredig DBA Abertawe yn seiliedig ar chwe modiwl dros dair blynedd, cyfuniad o ddarlithoedd, siaradwyr gwadd, trafodaethau mewn gweithdai a chyflwyniadau myfyrwyr. Byddwch yn datblygu traethawd ymchwil y ddoethuriaeth dan arweiniad tîm goruchwylio a gaiff ei ddynodi ar ddechrau'r rhaglen.

Mae DBA Ysgol Reolaeth Abertawe wedi'i chynllunio i feithrin meddylwyr ac ymarferwyr beirniadol a fydd yn myfyrio ar eu heffaith ar eu sefydliadau a chymdeithas ehangach.  

Nodau'r Rhaglen

Nod DBA Abertawe, fel doethuriaeth broffesiynol, yw darparu rhaglen strwythuredig i ymgymryd ag ymchwil ddoethurol, a fydd yn galluogi myfyrwyr i ddangos cyfraniad gwreiddiol at wybodaeth yn y pwnc academaidd a'r maes ymarfer drwy ymchwil wreiddiol neu roi gwybodaeth a dealltwriaeth sefydledig ar waith mewn ffyrdd gwreiddiol.

Strwythur y Rhaglen 

Mae strwythur rhaglen Abertawe'n seiliedig ar chwe modiwl a fydd yn cynnig 30 credyd yr un, ynghyd â thraethawd ymchwil sy'n werth 360 o gredydau, i gyd ar lefel wyth (lefel doethuriaeth).  

Bydd strwythur pob modiwl yn seiliedig ar gyfnodau tri diwrnod o addysgu dwys, ynghyd ag amrywiaeth o gymorth ar-lein gan y timau addysgu a'r goruchwylwyr doethurol.  Darperir y modiwlau dros gyfnod o dair blynedd.  

Bydd gwaith ar y traethawd ymchwil yn dechrau ochr yn ochr â'r modiwlau a addysgir.  Mae DBA Abertawe wedi'i chynllunio i alluogi myfyrwyr i'w chwblhau mewn pedair blynedd.

Mae pwynt ymadael wedi'i gynnwys yng nghynllun y rhaglen i ganiatáu i fyfyrwyr ymadael gan ennill y dyfarniad is, sef Meistr drwy Ymchwil, ar yr amod eu bod yn cwblhau 180 o gredydau mewn modiwlau, gan gynnwys llunio crynodeb ymchwil.

Asesu

Asesir myfyrwyr y Ddoethuriaeth mewn Gweinyddu Busnes mewn dwy ffordd, drwy’r modiwlau a thrwy lunio traethawd ymchwil doethurol.

Mae pob un o'r chwe modiwl yn gofyn i fyfyrwyr lunio papur 6,000 o eiriau a gaiff ei asesu gan dîm y modiwl.  Cefnogir myfyrwyr yn y broses hon drwy'r gweithdai tri diwrnod, eu tîm goruchwylio a thrwy gyflwyno eu papur arfaethedig am asesiad ffurfiannol un mis cyn cyflwyno’r fersiwn derfynol.

Caiff y traethawd ymchwil doethurol ei lunio â chymorth y tîm goruchwylio.  Mae'r traethawd ymchwil a gaiff ei gwblhau dan oruchwyliaeth yn cael ei ystyried yn 'Ddoethuriaeth Broffesiynol' yn unol â rheoliadau Ymchwil Ôl-raddedig Prifysgol Abertawe ac felly mae uchafswm o 80,000 gair wedi'i bennu.

Cyflwynir y traethawd ymchwil i'w asesu drwy arholiad viva voce yn unol â rheoliadau cyfredol Prifysgol Abertawe ynghylch ymchwil ôl-raddedig.

Goruchwylio a Chefnogi Ymchwilwyr Doethurol

Caiff myfyrwyr y rhaglen Doethur mewn Gweinyddu Busnes eu goruchwylio gan dîm goruchwylio. Lle y bo'n briodol, gall staff o Golegau neu Ysgolion yn y Brifysgol heblaw am y Coleg neu'r Ysgol 'gartref' gyfrannu at feysydd ymchwil perthynol.

Fel arfer, y prif oruchwyliwr (neu'r goruchwyliwr 'cyntaf') fydd y prif gyswllt drwy gydol y DBA a'r unigolyn hwn fydd â chyfrifoldeb cyffredinol am oruchwyliaeth academaidd. Bydd mewnbwn academaidd yr ail oruchwyliwr yn amrywio ym mhob achos. Gall y tîm goruchwylio gynnwys goruchwyliwr o ddiwydiant neu faes ymarfer proffesiynol penodol i gefnogi'r ymchwil hefyd.

Bydd y prif oruchwyliwr yn darparu cymorth bugeiliol hefyd. Os oes angen, bydd y prif oruchwyliwr yn cyfeirio'r ymchwilydd doethurol at ffynonellau cymorth eraill (e.e. Lles, Anableddau, Arian, Cyngor, TG, Llyfrgell, Undeb y Myfyrwyr, Gwasanaethau Academaidd, Gwasanaethau Cymorth i Fyfyrwyr, y Ganolfan Yrfaoedd).

Dysgu a Datblygu

Mae'r cyfleoedd dysgu allweddol ar gyfer myfyrwyr y DBA yn canolbwyntio ar ddatblygu set o sgiliau ymchwil a fydd yn eu galluogi i wneud cyfraniad at eu maes ymarfer, yn ogystal ag at wybodaeth ddamcaniaethol.

O'r cychwyn cyntaf, bydd myfyrwyr yn datblygu trosolwg clir o'u taith ymchwil a'r camau angenrheidiol i gyflawni ar lefel doethuriaeth.  I ddechrau, bydd myfyrwyr y DBA yn dysgu sut i fireinio eu maes ymchwil arfaethedig yn ogystal â chael cyflwyniad i egwyddorion sylfaenol ymchwil strwythuredig. Bydd hyn yn eu galluogi i egluro cyd-destun a chynnwys y broblem maent am ymchwilio iddi.

Bydd myfyrwyr yn ymgymryd â gwerthusiad manwl o gyd-destun damcaniaethol eu hymchwil, gan ddatblygu dealltwriaeth feirniadol o hanes eu maes ac o'r syniadaeth ddiweddaraf. 

Bydd myfyrwyr yn cael sylfaen drylwyr mewn dulliau a thechnegau ymchwil, yn ogystal â damcaniaeth fethodolegol sylfaenol, a fydd yn eu galluogi i werthuso'n feirniadol a defnyddio'r ymagweddau sy'n briodol ar gyfer eu hymchwil eu hunain.  Bydd myfyrwyr hefyd yn meithrin y gallu ymarferol i gasglu, dadansoddi a chyflwyno data drwy astudiaeth beilot fel rhan o'u datblygiad.

Bydd y modiwlau a addysgir yn datblygu gallu myfyrwyr i greu dealltwriaeth newydd o ddamcaniaeth ac ymarfer drwy syntheseiddio eu hymchwil â damcaniaeth sefydledig, gan arwain at ddatganiadau clir o effaith a chyfraniad at wybodaeth.

Deilliannau Dysgu'r Rhaglen

1. Creu cydsyniad o brosiect, ei gynllunio a'i roi ar waith, â'r nod o greu gwybodaeth neu gymwysiadau newydd ym maes Busnes a Rheoli.
2. Creu, dehongli, dadansoddi a datblygu gwybodaeth newydd drwy ymchwil wreiddiol neu ysgolheictod uwch arall.
3. Dangos gwybodaeth gynhwysfawr a beirniadol o'r llenyddiaeth berthnasol a dangos y gallu i egluro cyd-destun ymarferol eu hymchwil yn glir.
4. Dangos y gallu i ddatblygu a deall yn systematig gorff sylweddol o wybodaeth sydd ar flaen y gad ym maes Rheoli a Busnes, drwy ddatblygu traethawd ymchwil ysgrifenedig.
5. Dangos y gallu i ddatblygu a deall yn systematig gorff sylweddol o wybodaeth sy'n arwain at gymhwysiad ac effaith ymarferol, ac sy'n creu gwybodaeth ymarferol wrth wneud hyn.
6. Ymateb yn briodol i broblemau annisgwyl wrth lunio prosiect drwy wneud addasiadau priodol.
7. Dewis, dehongli a chymhwyso technegau perthnasol ar gyfer ymchwil ac ymholiad academaidd uwch yn gywir.
8. Llunio a gwerthuso'n feirniadol athroniaeth ymchwil y gellir ei hamddiffyn ac sy'n gydnaws â'r cwestiwn ymchwil a'r dulliau a ddefnyddir i gasglu a dadansoddi data.
9. Gwneud penderfyniadau gwybodus ar faterion cymhleth ym meysydd Busnes a Rheoli, yn aml heb ddata cyflawn a chyfiawnhau’r penderfyniadau hynny i gynulleidfa briodol.
10. Cyfleu canfyddiadau ymchwil cymhleth yn eglur ac yn effeithiol ac mewn modd diddorol i gynulleidfaoedd arbenigol (gan gynnwys y gymuned academaidd) ac anarbenigol, gan ddefnyddio amrywiaeth o gyfryngau a digwyddiadau priodol, gan gynnwys cyflwyniadau mewn cynadleddau, seminarau a gweithdai.
11. Lledaenu gwybodaeth newydd a ddysgir trwy ymchwil wreiddiol neu ysgolheictod uwch arall mewn cyhoeddiadau o safon uchel a adolygir gan gymheiriaid yn y ddisgyblaeth.
12. Datblygu’r rhwydweithiau a’r sylfeini ar gyfer gwaith ymchwil a datblygu parhaus yn y ddisgyblaeth.
13. Dangos y rhinweddau a'r sgiliau trosglwyddadwy angenrheidiol ar gyfer cyflogaeth, gan gynnwys y gallu i arfer cyfrifoldeb personol a menter annibynnol i raddau helaeth mewn sefyllfaoedd cymhleth ac anrhagweladwy mewn amgylcheddau proffesiynol neu gyfatebol.

Sgiliau a Chymwyseddau

Deallusol

Dangos sgiliau meddwl yn feirniadol, er enghraifft, drwy werthuso dadleuon, cysylltu syniadau, ymdrin â phroblemau mewn modd systematig a llunio casgliadau newydd.

Beirniadu a herio'r diffiniadau o ymarfer sefydliadol a'r damcaniaethau a ddefnyddir i'w strwythuro, ei arwain a'i lywio.

Gwneud a chyfiawnhau penderfyniadau ac argymhellion arloesol a wneir ar sail rhesymu moesegol, mewn cyd-destunau cymhleth, dynamig ac anrhagweladwy.

Myfyrio'n feirniadol yn barhaus ar ymarfer personol a sefydliadol.

Ymarferol

Dadansoddi a datrys problemau drwy nodi problemau, dadansoddi gwybodaeth a llunio atebion arloesol.

Arweinyddiaeth drwy esiampl, gan gynnwys mentora, hwyluso, dangos diffuantrwydd a hunan-fyfyrio.

Rheoli prosiectau drwy nodi nodau a thasgau, penderfynu ar flaenoriaethau a bod yn agored i gyd-destunau newidiol.

Meithrin perthnasoedd cydweithredol, gan ddangos ymddiriedaeth a dealltwriaeth o ganlyniadau a rennir.

Dangos agwedd a phriodweddau proffesiynol yn eu hymddygiad craidd yn y gweithle, gan werthfawrogi gwahaniaeth.

Trosglwyddadwy

Gweithio'n annibynnol ac yn gydweithredol i gyflawni nodau personol a sefydliadol.

Dangos y gallu i feddwl a gwerthuso'n annibynnol, yn feirniadol ac mewn modd myfyriol.

Defnyddio technoleg ddigidol briodol i ddadansoddi, dehongli, allosod a delweddu data.

Esbonio syniadau cymhleth yn effeithiol gan ddefnyddio amrywiaeth o ddulliau, gan gynnwys cyfryngau ysgrifenedig, llafar a digidol.

Dangos sgiliau rheoli amser, cyfrifoldeb, hyblygrwydd, cynllunio, arweinyddiaeth.

Gweithio'n gyfrifol gan roi sylw'n barhaus i faterion diogelwch, moeseg, cydraddoldeb ac amrywiaeth.

Monitro Cynnydd 

Caiff cynnydd ei fonitro yn unol â rheoliadau Prifysgol Abertawe. Drwy gydol y rhaglen, disgwylir i'r ymchwilydd DBA gwrdd yn rheolaidd â'i oruchwyliwr. Yn y rhan fwyaf o'r cyfarfodydd hyn, mae'n debygol y caiff cynnydd yr ymchwilydd doethurol ei fonitro'n anffurfiol a chaiff presenoldeb ei fonitro hefyd. Yn ddelfrydol, dylid cofnodi manylion y cyfarfodydd ar y system ar-lein. Mae'n ofynnol cynnal o leiaf bedwar cyfarfod goruchwylio bob blwyddyn, a chyflwynir adroddiadau am ddau ohonynt i'r Bwrdd Dilyniant a Dyfarniadau Ôl-raddedig. Yn ystod y cyfarfodydd goruchwylio hyn, trafodir cynnydd yr ymchwilydd a chofnodir hynny'n ffurfiol ar y system ar-lein. Gellir cynnal cyfarfodydd o bell, gan ddibynnu ar leoliad y myfyriwr.

Amgylchedd Ymchwil

Crynhoir nodweddion allweddol amgylchedd ymchwil yr Ysgol Reolaeth fel a ganlyn: 

1. Mae gan yr Ysgol strategaeth ymchwil glir sy'n cael ei chefnogi gan strwythur rheoli ymchwil sefydledig a chadarn iawn.
2. Caiff yr holl fyfyrwyr ymchwil ôl-raddedig gyfle i fynychu cynadleddau allanol a bydd cyllid ar gael i ariannu hyn.
3. Mae'r holl fyfyrwyr ymchwil ôl-raddedig yn cyflwyno yn y gynhadledd ymchwil ôl-raddedig fewnol a gynhelir yn flynyddol i ledaenu eu gwaith a derbyn adborth adeiladol.
4. Mae gan yr Ysgol ddwy lwybr a ariennir gan Bartneriaethau Hyfforddiant Doethurol yr ESRC.
5. Ceir saith canolfan ymchwil sefydledig sy'n croesawu myfyrwyr ymchwil ôl-raddedig, ond anogir gweithgarwch trawsddisgyblaethol.
6. Mae gan yr Ysgol strategaeth â ffocws clir i gefnogi ymchwilwyr gyrfa gynnar.
7. Mae'r Ysgol yn ymrwymedig i gydraddoldeb ac amrywiaeth yn ei staff ymchwil ac aelodaeth ei phwyllgorau, ac i alluogi arferion gwaith hyblyg.
8. Mae incwm ymchwil wedi cynyddu o tua £160,000 yn 2014 i dros £2.1 miliwn yn 2018.
9. Mae gan yr Ysgol bartneriaethau strategol â chyrff allweddol yn y sectorau preifat a chyhoeddus, megis Comisiwn Bevan, Fujitsu a Pfizer.
10. Mae'r adeilad newydd (cartref yr Ysgol ers 2015) wedi darparu cyfleusterau ardderchog, gan gynnwys ystafelloedd sylweddol wedi'u neilltuo i ymchwil ôl-raddedig.
11. Yn ogystal â chanolfannau ymchwil, caiff staff eu hannog i ffurfio grwpiau ymchwil anffurfiol.
12. Mae gan yr ysgol 55 o aelodau staff cyfwerth amser llawn sy'n ymgymryd ag ymchwil categori A.
13. Un o nodau strategol yr Ysgol yw harneisio ymchwil i gael effaith ar yr economi leol a byd-eang, â'r nod o gyflwyno'r nifer uchaf posib o achosion effaith i'r ymarfer REF sydd ar ddod.

Yr Ysgol Reolaeth

Mae'r Ysgol Reolaeth ymhlith y 30 o Ysgolion Busnes gorau yn y DU ac mae yn y 10 uchaf o ran effaith ymchwil, gyda 90% o gyflwyniadau'n ennill sgôr o 4*, sef o'r radd flaenaf ledled y byd, neu sgôr o 3*, sef rhagorol yn rhyngwladol (REF 2014).

Ein cenhadaeth yw creu ymchwil gydweithredol, arloesol ac amlddisgyblaethol drwy weithio gyda rhai o'r ymchwilwyr gorau a mwyaf disglair o bob cwr o'r byd. Rydym yn meithrin cysylltiadau gydol oes â'n cymuned ymchwil, cefnogwyr diwydiannol a myfyrwyr drwy ymgorffori gweithio mewn partneriaeth a chysylltiadau â chyn-fyfyrwyr. Rydym yn ymrwymedig i gyflawni a lledaenu ymchwil o'r radd flaenaf er mwyn meithrin gwybodaeth, sgiliau, dealltwriaeth ac effaith. Mae'r Ysgol Reolaeth yn cynnig amgylchedd cefnogol a chyfeillgar ar gyfer ein cymuned ffyniannus o fyfyrwyr doethurol o bob cwr o'r byd.

Mae'r dull strwythuredig a gynigir gan y DBA yn seiliedig ar chwe modiwl dros dair blynedd, lle byddwch yn cynnal cyfuniad o ddarlithoedd, sgyrsiau gwadd a thrafodaethau gweithdy.  Ar yr un pryd, byddwch yn datblygu eich traethawd ymchwil doethurol o dan arweiniad eich tîm goruchwylio DBA.

Bydd modiwlau a addysgir yn datblygu gallu cyfranogwyr i greu dealltwriaeth newydd o theori ac ymarfer drwy synthesis o'u hymchwil gyda theori sy'n bodoli eisoes, gan arwain at ddatganiadau clir o effaith a chyfraniad at wybodaeth.

Mae'r chwe modiwl a addysgir fel a ganlyn (sylwer, mae'r dyddiadau a amlinellir isod yn adlewyrchu dyddiad dechrau mis Hydref):

Mae’r broses gofrestru yn agor flynyddol ar 1 Hydref.

Bydd Modiwl Un y rhaglen (Introduction to Applied Doctoral Research) yn dechrau gydag amrywiaeth o weithgareddau paratoi ar ddiwedd mis Hydref. Cynhelir y gweithdy wyneb yn wyneb cyntaf tua phedair wythnos wedi hynny.