Dod yn Bydwraig

Mae bydwragedd yn gweithio yn y gymuned ac mewn ysbytai. Maent yn meithrin perthnasoedd â menywod a’u teuluoedd ar draws y cyfnod cyn-geni, yn ystod yr enedigaeth ac ar ôl geni.  Mae bydwragedd yn gyfrifol am gefnogi menywod trwy addysg, sgrinio a gofal clinigol. Mae'n broffesiwn crefftus iawn. Mae’r fydwraig wedi’i hyfforddi i arbenigo mewn ffisioleg arferol beichiogrwydd, sy'n golygu ei bod mewn sefyllfa dda i ganfod unrhyw newid neu abnormaleddau o ran ffisioleg beichiogrwydd arferol. Bydd y fydwraig bob amser yn darparu gofal o safon uchel, ar y cyd â staff proffesiynol eraill lle bo angen.

Y cyflog cychwynnol ar gyfer Bydwraig yw £28,834 ac mae hyn yn cynyddu i £35099 o fewn y 2 flynedd gyntaf o gymhwyso. Yn ogystal, gall Bydwraig ddisgwyl tâl ychwanegol am oriau anghymdeithasol.

*Roedd yr holl raddfeydd cyflog yn gywir ar adeg cyhoeddi ym mis Chwefror 2024

Mae bydwreigiaeth yn broffesiwn crefftus iawn. Mae Bydwragedd yn gweithio 'gyda menywod’, ac maent yn eiriolwyr dros gynnig dewis i fenywod. Mae bydwragedd yn ymarferwyr ymreolus sy'n cynnig gwybodaeth ar sail tystiolaeth i fenywod a'u teuluoedd, gan eu cefnogi i greu cynlluniau gofal unigol.  Bydwragedd yw’r prif ymarferwyr ar gyfer menywod sydd â beichiogrwydd, genedigaethau a chyfnodau ôl-eni didrafferth. Rydym hefyd yn gweithio mewn timoedd amlddisgyblaethol os oes gan fenywod anghenion gofal ychwanegol.

Fodd bynnag, mae nyrsys yn gweithio gyda chleifion sy'n dioddef afiechyd, gan weithio gyda gweithwyr meddygol proffesiynol eraill fel rhan o dîm datrys problemau.

I fod yn fydwraig bydd angen gradd Bydwreigiaeth Cyn-gofrestru o sefydliad achrededig arnoch.

Bydd hefyd angen i chi fodloni ein gofynion mynediad er mwyn gallu astudio'r cwrs. Bydd hyn yn cynnwys cymhwyster Safon Uwch, Mynediad at Addysg Uwch, BTEC neu gymhwyster cyfwerth a gydnabyddir gan Brifysgol Abertawe. Gall Myfyrwyr nad ydynt yn bodloni'r gofynion Safon Uwch neu gymwysterau cyfwerth wneud Tystysgrif Addysg Uwch mewn Gofal Mamolaeth.

I allu cymhwyso fel bydwraig bydd hefyd angen 5 TGAU gradd C/4-5 neu uwch, neu 3 TGAU gradd C/4-5 a chymhwyster BTEC Dwbl. Rhaid i ymgeiswyr hefyd fod â chymwysterau TGAU gradd C/4-5 mewn Saesneg, Mathemateg a Gwyddoniaeth. 

Mae'r cyrsiau gradd Bydwreigiaeth yn 3 blynedd o hyd, ac ar ddiwedd y radd bydd graddedigion yn derbyn BMID (Anrhydedd). Mae Bydwreigiaeth yn broffesiwn cofrestredig ac ar ôl gorffen y cwrs byddwch yn fydwraig gofrestredig.

I fod yn fydwraig yn y Deyrnas Unedig mae'n rhaid bod â gradd o raglen achrededig a bydd angen astudio Bydwreigiaeth yn y Brifysgol er mwyn gwneud hyn. Gallwch gael rhagor o wybodaeth am ein gradd Bydwreigiaeth ar dudalen y cwrs.

Os ydych yn benderfynol ac yn angerddol dros y proffesiwn bydwreigiaeth byddwch yn gallu gwireddu eich breuddwyd. Yn hanesyddol bu ceisio cael lle ar raglenni bydwreigiaeth yn heriol, ond dros y blynyddoedd diwethaf mae'r nifer o lefydd wedi cynyddu.

Ym Mhrifysgol Abertawe rydym yn derbyn bron i 600 o geisiadau ar gyfartaledd bob blwyddyn am tua 40 o lefydd. Gall hyn olygu bod y broses ymgeisio yn hynod  gystadleuol. Fel rhan o'r broses ymgeisio, mae gennym nifer o ffyrdd i ehangu mynediad a gwella cynwysoldeb, ac i’r rhai sy'n dymuno ychwanegu at eu cymwysterau a'u dealltwriaeth o fydwreigiaeth rydym yn cynnig Tystysgrif Addysg Uwch mewn Gofal Mamolaeth. Bydd y cwrs hwn yn helpu myfyrwyr i atgyfnerthu eu sgiliau a'u dealltwriaeth o fydwreigiaeth a gofal iechyd a gall fod yn gam tuag at wneud

Ar ddiwrnod y cyfweliad byddwn yn gofyn amrywiaeth o gwestiynau i'n helpu ni i asesu a ydych yn addas, yn barod ac â'r ymrwymiad sydd ei angen i fod yn Fydwraig. Bydd ein cwestiynau yn asesu eich gwybodaeth a'ch dealltwriaeth ynghylch y proffesiwn ac yn asesu eich rhinweddau gofalgar a’ch sgiliau cyfathrebu.

Rydym yn edrych am fyfyrwyr sydd:

• â gwybodaeth am y proffesiwn
• yn arddangos gwerthoedd y GIG
• â sgiliau trosglwyddadwy o brofiad bywyd neu brofiad gwaith y gellir eu defnyddio yn y rôl fydwraig.
• â'r cymhelliad sydd ei angen i ymdopi â gofynion sylweddol y cwrs a gwaith bydwraig.

I baratoi am eich cyfweliad Bydwreigiaeth bydd angen i chi gael dealltwriaeth ddofn o'r proffesiwn a bod wedi darllen tipyn amdano a gwneud ymchwil i wella eich dealltwriaeth. Gallwch ddod o hyd i wybodaeth ddefnyddiol ar dudalen Gyrfa mewn Bydwreigiaeth GIG Cymru.

Dylai fod gan ymgeiswyr syniad clir o realiti'r rôl a holl gyfrifoldebau’r Fydwraig. Byddwn yn edrych am ymgeiswyr sy'n ymgorffori gwerthoedd y GIG, ac sy'n angerddol dros weithio gyda menywod a'u teuluoedd.  Un o rinweddau pwysig bydwraig, er mwyn sicrhau'r lefel orau o ofal i fenywod, yw peidio â beirniadu.