Ein Gwasanaethau Llyfrgell Cynhwysol

Mewn cydweithrediad ag Ymarferwyr Cyflwr Sbectrwm Awtistig Prifysgol Abertawe, mae Gwasanaethau Gwybodaeth a Systemau wedi creu Canllaw Hygyrch i Llyfrgell Parc Singleton ac un ar gyfer Llyfrgell y Bae. Mae'r canllawiau wedi'u hysgrifennu ar gyfer unrhyw un sydd efallai yn poeni am ddod i'r llyfrgell. Mae hefyd yn amlygu agweddau ar yr adeiladau a allai fod yn her i fyfyrwyr ar y sbectrwm awtistig.

Mae canllaw Llyfrgell Parc Singleton ar gael yma ar ffurf PDF.

Mae canllaw Llyfrgell y Bae ar gael yma ar ffurf PDF. 

Mae rhai desgiau y gellir addasu eu huchder ar gael yn Llyfrgell y Bae a Llyfrgell Parc Singleton. Gallwch addasu uchder y desgiau'n electronig i greu man astudio mwy cyffyrddus a hygyrch. Mae gan ddefnyddwyr anabl flaenoriaeth i'r desgiau hyn. Gofynnwch wrth y ddesg fenthyca lle mae'r desgiau hyn.

Ar gael trwy drefnu apwyntiad: sesiwn hyfforddiant gan eich Llyfrgellydd Pwnc ar ddefnyddio e-adnoddau a sgiliau ymchwil ar gyfer eich pwnc.

Cysylltwch â Tîm Gwasanaeth Cwsmer i drefnu apwyntiad. Mae canllawiau pwnc a gwybodaeth ar-lein hefyd ar gael trwy libguides.swansea.ac.uk.

Mae sgwrs fyw ar-lein Holi Llyfrgellydd ar gael o ddydd Llun i ddydd Gwener 9am-5pm.

Caiff y rhan fwyaf o eitemau eu hadnewyddu'n awtomatig ar eich cyfer, oni bai bod rhywun arall wedi gwneud cais amdanynt. Ewch i'n tudalen benthyca, adnewyddu a chadw eitemau am wybodaeth lawn.

Sylwer, ni chaiff eitemau benthyciad byr, benthyciadau 24 awr, traethodau ymchwil, benthyciadau o liniaduron, neu unrhyw eitemau sydd wedi'u fenthyg gan fenthycwyr allanol eu hadnewyddu yn awtomatig. Gall eithriadau eraill hefyd fod yn berthnasol.

Mae gliniaduron ar gael yn Llyfrgelloedd y Bae a Singleton y gall unrhyw fyfyriwr eu benthyg am gyfnod benthyca pythefnos o hyd, gan ddibynnu ar argaeledd. Gweler ein tudalen ar Fenthyca, Adnewyddu a Gofyn am Eitemau’r Llyfrgell am ragor o wybodaeth am Fenthyg Gliniadur. Sylwer, ni ellir adnewyddu benthyciadau gliniaduron.

Mae gennym nifer o gasgliadau e-lyfrau ar gael ym Mhrifysgol Abertawe. Mae ein holl e-lyfrau’n ymddangos yn iFind, catalog y llyfrgell.

Mae gennym ganllaw ar gael sy’n egluro sut i ganfod a chael mynediad at yr e-lyfrau drwy iFind. Yn ogystal mae’r canllaw hefyd yn edrych ar nodweddion ein tri phrif ddarparwr e-lyfrau – VLE Books,  EBSCO eBooks a ProQuest Ebook Central.

Mae e-lyfrau’n cynnig mynediad oddi ar y campws cyfleus i fyfyrwyr sydd ddim yn gallu ymweld â’r llyfrgell yn rheolaidd. Gellir arbed neu argraffu nifer cyfyngedig o dudalennau o bob e-lyfr (cyfyngiadau oherwydd deddfwriaeth hawlfraint). Mae ein prif lwyfannau e-lyfrau yn cynnig y gallu i chwilio o fewn testun y llyfr a gwneud nodiadau ar gyfer y dyfodol.

Mae gennym gasgliad arbennig o lyfrau bibliotherapi wedi'u dethol gan y Gwasanaeth Lles. Mae'r llyfrau'n cynnig hunangymorth arbenigol ar amrywiaeth eang o broblemau. Mae'r Casgliad Lles ar gael i bob myfyriwr ac aelod o staff. Gallwch ddod o hyd i'r llyfrau yn yr Ardal Astudio ar Lefel 1 - Gorllewin yn Llyfrgell Parc Singleton ac yn y Gornel Les gerllaw'r pod astudio grŵp yn Llyfrgell y Bae. Hefyd, mae fersiynau e-lyfr ar gael i rai ohonynt.

Mae rhestr lawn o deitlau'r Casgliad Lles ar gael ar-lein. Gallwch:

• bori yn ôl categori
• gwirio lleoliad y llyfr ac os yw ar gael drwy glicio ar y teitl
• defnyddio'r dull Gwneud Cais i gasglu llyfr o lyfrgell wahanol ym Mhrifysgol Abertawe
• darllen e-lyfr drwy glicio ar y ddolen i weld y Testun Llawn

Yn ogystal â'r Casgliad Lles, mae detholiad o deitlau ffuglen. Gall darllen er pleser fod yn ffordd effeithiol o leddfu straen. Am rhagor o wybodaeth am fuddion darllen er pleser, gweler ein tudalennau Darllen yn well.

Gwasanaethau i fyfyrwyr gydag anableddau, cyflwr meddygol neu unrhyw anghenion eraill

Ein nod yw sicrhau bod ein gwasanaethau llyfrgell yn gynhwysol i bawb, ond sylweddolwn fod rhai myfyrwyr yn elwa o gyfleusterau penodol y gallwn eu cynnig yn ôl yr angen. Gellir cynnig y gwasanaethau a’r cyfleusterau a fanylir arnynt isod i fyfyrwyr sydd ag anghenion neilltuol a adnabuwyd yn dilyn asesiad gan Disability@CampusLife. Gadewch i ni wybod os credwch y gallech chi elwa o un o’r opsiynau isod, neu os allwn ni helpu mewn unrhyw ffordd arall. Gallwch e-bostio customerservice@swansea.ac.uk, ffonio 01792 29550 neu fynd i unrhyw un o’n Desgiau Gwybodaeth yn y llyfrgell yn bersonol.

Fformatau gwahanol

Os oes gennych anabledd print (gwybyddol neu gorfforol), efallai bod gennych hawl i gael mynediad at lyfrau, nodiadau darlithoedd a deunyddiau eraill mewn fformat gwahanol. Er enghraifft, efallai y rhoir copi PDF o lyfr i chi os oes gennych anabledd sy'n eich atal rhag trin copi print, neu os oes gennych anhawster dysgu penodol sy'n golygu y byddech yn elwa o allu ddefnyddio meddalwedd darllen sgrin gyda'r testun. Darperir fformatau gwahanol gan y Ganolfan Drawsgrifio, ond y Gwasanaeth Anableddau sy'n awdurdodi'r gwasanaeth. Cysylltwch â'r Gwasanaeth Anableddau os credwch y byddech yn elwa o'r gwasanaeth hwn.

Gweler ein gwybodaeth am dechnoleg gynorthwyol am fanylion meddalwedd darllen yn uchel ac offer defnyddiol eraill sydd ar gael i bawb ar gyfrifiaduron mynediad agored ar y campws.

Cyfarpar arbenigol i'w benthyca

Gallwch fenthyg y cyfarpar canlynol o'r Ddesg Wybodaeth yn y Llyfrgell. Efallai na fydd y llyfrgell ar eich campws chi yn cadw rhai o'r eitemau, ond os oes eitemau sydd ar gael gan ein llyfrgelloedd eraill byddwn yn trefnu i’w hanfon.

• Recordwyr Llais Digidol
• Dolenni clyw is-goch
• Camerâu Flip

Efallai bydd modd i chi fenthyg gliniadur hefyd yn unol ag un o'n cynlluniau penodol. Gweler yr adran ynghylch Gliniaduron am ragor o wybodaeth.

Bydd angen cerdyn adnabod y brifysgol a ffurflen wedi’i chwblhau gan y Gwasanaeth Anableddau arnoch i fenthyg gliniaduron a recordwyr llais digidol am gyfnod estynedig a bydd yn rhaid i chi gwblhau Cytundeb Benthyg Cyfarpar. Os nad yw’r darn o gyfarpar y mae ei angen arnoch ar gael yn llyfrgell y campws, gall staff drefnu iddo gael ei drosglwyddo i chi.

Defnyddio ystafelloedd adnoddau nam ar y golwg

Mae man astudio benodedig ar gael ar Lefel 2 Llyfrgell Parc Singleton lle gall myfyrwyr a'u cynorthwywyr weithio. Rhaid bod cerdyn y myfyrwyr wedi'i raglennu i alluogi mynediad i'r ystafell. Ewch i'r Ddesg Wybodaeth yn y Llyfrgell i raglennu'ch cerdyn.

Yn Llyfrgell y Bae, mae man astudio benodedig ar gyfer myfyrwyr â nam ar eu golwg yn yr Ystafell Astudio Ôl-raddedig yn Adain y De. Rhaid bod cerdyn y myfyrwyr wedi'i raglennu i alluogi mynediad i'r ystafell. Ewch i Ddesg Wybodaeth Llyfrgell y Bae i wneud hyn.

Loceri

Mae loceri ar gael i fyfyrwyr sydd wedi nodi angen yn eu hasesiad. Mae loceri yn Ystafell Astudio Llyfrgell Parc Singleton a ger y fynedfa i Adain y Gogledd yn Llyfrgell y Bae. Ewch i'r Ddesg Wybodaeth yn Llyfrgell Parc Singleton neu Lyfrgell y Bae gyda'r ffurflen o'r Gwasanaeth Anableddau er mwyn neilltuo locer ar eich cyfer.

Aelodaeth o'r Llyfrgell i gynorthwywyr

Gall cynorthwywyr gael cyfleusterau benthyca eu hunain yn y Llyfrgell. Ewch i'r Ddesg Wybodaeth yn Llyfrgell Parc Singleton neu Lyfrgell y Bae i drefnu hyn.