Cyfres Seminarau Ymchwil Ar-lein yr Ysgol Reolaeth

Er gwaethaf ymchwil sylweddol i’r rhyngdoriad rhwng mamolaeth a chyflogaeth, ychydig iawn o sylw academaidd sydd wedi’i roi i’r camau cyn cenhedlu, a sut mae’r bobl sy’n cael trafferth beichiogi, neu aros yn feichiog, yn delio â’r materion hyn yn y gweithle. Mae’r seminar hon yn datgelu cipolygon allweddol o astudiaeth ddwy flynedd a ariannwyd gan Ymddiriedolaeth Leverhulme i ‘deithiau ffrwythlondeb cymhleth’ a chyflogaeth, a archwiliodd amrywiol brofiadau heriol gan gynnwys triniaeth ffrwythlondeb, colli baban a dod i delerau â bod yn ddi-blant.  Roedd y data’n cynnwys 80 cyfweliad manwl am brofiad personol; 20 cyfweliad gyda rheolwyr llinell a chwnselwyr ffrwythlondeb, ac adolygiad ar-lein. Yn ogystal â chyflwyno’r canfyddiadau allweddol, bydd y seminar yn sôn am sut gwnaeth yr ymchwilwyr ymgysylltu â’r amrywiol grwpiau rhanddeiliaid i ysgogi newid yn y gweithle.

Sut olwg sydd ar ddyfodol Technoleg Ariannol (FinTech)? Sut mae arloesi Technoleg Ariannol aflonyddol yn effeithio ar fy musnes ac yn ei lywio? Pa fath o fodelau a chymwysiadau busnes newydd fydd yn pennu oes nesaf technolegau ariannol? Sut gall Technoleg Ariannol ailosod dynameg gystadleuol ecosystem fy sefydliad? Sut mae Technoleg Ariannol, stiwardiaeth ESG a chynaliadwyedd corfforaethol yn mynd law yn llaw? Bydd y sesiwn yn datgelu’r rhesymeg gwerth a’r perthnasedd wrth wraidd oes newydd technolegau ariannol a’r symudiadau tectonig mewn dynameg fyd-eang a fydd yn llywio dyfodol mentro gan fusnesau. Bydd y cyflwyniad yn seiliedig ar gipolygon o ymchwil, diwydiant a chipolygon lefel polisi.

Mae mynd i’r afael â phrofiadau adfer yn hanfodol i weithredu yn y gwaith, yn enwedig yn ystod digwyddiadau a tharfu annisgwyl. Eto, mae’n syndod cyn lleied o ymchwil sydd wedi archwilio goblygiadau profiadau adfer i wydnwch unigolyn, hynny yw y gallu i ymdopi â newid ac anffawd yn y gwaith, sy’n gallu cyfrannu’n gadarnhaol at berfformiad unigol a pherfformiad y sefydliad mewn adfyd. Trwy fanteisio ar y Model Ymdrech-Adfer a’r Ddamcaniaeth Gwarchod Adnoddau, rydym yn cynnig bod profiadau adfer penodol yn cynyddu cyflwr gwydnwch trwy ymestyn ail-werthuso cadarnhaol a lleihau insomnia. Ar y cyfan, mae data a gasglwyd yn ystod pandemig byd eang ar adegau lluosog ymhlith entrepreneuriaid – unigolyn sy’n wynebu angen arbennig o gadarn i addasu i heriau a rheoli newid neu anffodion yn y gwaith – yn cefnogi ein model. Mae ein hymchwiliad yn datgelu dewislen o brofiadau adfer sy’n cynrychioli amrywiol lwybrau at fwy o wydnwch. Down i'r casgliad bod profiadau adfer yn cynnig ffynhonnell nerthol o berfformiad yn y gweithle trwy feithrin galluoedd gwydnwch unigolion ac yn cynnig goblygiadau ystyrlon i ymchwil i adfer a gwydnwch, yn enwedig mewn cyfnod o argyfyngau ysgubol eang, difrifol neu gyfnodau o newid dwys.

Mae’r papur hwn yn archwilio’r potensial am wrthwynebiad ymhlith entrepreneuriaid sy’n ffoaduriaid benywaidd yn y DU, sy’n gorfod llunio hunaniaethau newydd yn y wlad sy’n eu lletya. Trwy gynnwys safbwyntiau ffeministaidd ôl-drefedigaethol a damcaniaeth marronage, mae’n adeiladu ar waith blaenorol ar safleoldeb ac entrepreneuriaeth i gysyniadoli ymhellach faterion strwythur a galluedd, gormes a’r potensial am drawsnewid fel y bônt yn bodoli ar gyfer y rhai sydd wedi’u dadleoli’n orfodol o Dde’r Byd i Ogledd y Byd wrth iddynt lunio hunaniaethau entrepreneuraidd.

Mae’r ymchwil yn cynnwys yr astudiaethau a gyflawnwyd cyn argyfwng pandemig COVID-19 ac yn ystod y pandemig (y cyfnod clo llwyr cyntaf a’r ail gyfnod clo rhannol). Fe wnaeth pandemig COVID-19 hybu trawsnewid digidol llawer o wasanaethau. Datblygwyd llawer o blatfformau ar-lein i ddarparu ar gyfer anghenion cleifion. Yn ein hymchwil, i ddechrau, ymchwiliom i’r amgyffrediad o wasanaethau telefeddygol yn 2018 cyn argyfwng y pandemig, ond yn syth ar ôl i yswiriant meddygol Ffrainc gymeradwyo cynnwys gwasanaethau o’r fath. Archwiliodd astudiaethau pellach y ffactorau sy’n rhagfynegi’r bwriad i ddefnyddio tele-ymgynghori meddygol yn rhyngwladol (cymhariaeth rhwng Ffrainc, yr Eidal, Tsieina a’r DU) yn ystod y cyfnod clo llwyr cyntaf. A chyflwynodd yr astudiaeth olaf arolwg o gleifion Ffrengig a oedd wedi defnyddio platfform tele-ymgynghori yn ystod y pandemig. Fe wnaeth un o’r astudiaethau mwyaf, gyda sampl o 1233 o ymatebwyr a gasglwyd gan y prif blatfform tele-iechyd, ymestyn theori unedig derbyn a defnyddio technoleg (UTAUT2) gyda thri dimensiwn ymddiried, credoau a hunaneffeithlonrwydd. Mae canfyddiadau’r holl astudiaethau yn cyfrannu at theori ac ymarfer ymgynghori telefeddygol.

Mae gwerthoedd a moeseg yn bwysig mewn ymchwil ac, yn y cyd-destun hwn, mae sicrhau bod ymchwil yn gynhwysol yn ystyriaeth ganolog. Yn y cyflwyniad hwn, byddaf yn trafod cynwysoldeb ymchwil a’m dehongliad o hynny fan hyn yw gweithio gyda grwpiau sydd wedi cael eu tangynrychioli yn draddodiadol, ac ar eu rhan, fel bod pobl â phrofiadau personol yn gallu cael llais dilys wrth lywio’r broses ymchwil. Rwy’n trafod heriau a chyfleoedd ymchwil gynhwysol, gan gynnwys rôl emosiynau ac atgyrchedd, cymhlethdodau sydd ynghlwm â chroestoriadedd, rhwystrau strwythurol a thueddiadau systemig, ac effeithiau natur disgyblaeth. 

Mae technolegau digidol wedi bod yn trawsnewid y gweithle traddodiadol ac yn llunio o’r newydd y ffordd y mae gwaith yn cael ei ddylunio, ei gyflawni a’i reoli mewn sefydliadau. O’r herwydd, mae deall gwaith digidol a’i effaith ar berfformiad mewn swydd yn hanfodol bwysig. Mae’r astudiaeth hon yn ymchwilio i effaith gwaith digidol ar berfformiad mewn swydd mewn sefydliadau o safbwynt darpariaeth technoleg. Cynhaliwyd adolygiad cynhwysfawr o’r llenyddiaeth gysylltiedig, gan arwain at ddatblygu model cysyniadol ar gyfer archwilio effaith gwaith digidol ar berfformiad mewn swydd o safbwynt darpariaeth technoleg. Yna, caiff model o’r fath ei brofi a’i ddilysu gan ddefnyddio modelu hafaliad strwythurol ar ddata’r arolwg a gasglwyd yn Awstralia. Mae’r astudiaeth yn dangos bod defnyddio technolegau digidol yn gwella cydlyniad ac yn gwella rhannu gwybodaeth rhwng unigolion yn sylweddol, gan arwain at gydbwysedd gwell rhwng bywyd a gwaith a pherfformiad gwell mewn swydd. At hynny, mae’r astudiaeth yn datgelu nad yw defnyddio technolegau digidol a all wella cyfathrebu a gwneud penderfyniadau yn cael dylanwad sylweddol ar gydbwysedd rhwng bywyd a gwaith a pherfformiad mewn swydd mewn gwaith digidol. Mae’r astudiaeth hon yn cyflwyno ymchwiliad cynhwysfawr o effaith gwaith digidol ar berfformiad mewn swydd mewn sefydliadau o safbwynt darpariaeth technoleg. Mae’n archwilio rôl newidiol gwaith digidol wrth drawsnewid arferion gweithio presennol mewn sefydliadau, a sut gall gwahanol ddarpariaethau technoleg mewn gwaith digidol gael eu gwireddu i wella’r cydbwysedd rhwng bywyd a gwaith a pherfformiad mewn swydd mewn amgylchedd gweithio digidol.

Rydym yn archwilio ymgysylltiad rhanbarthol prifysgolion mewn rhanbarthau nad ydynt yn rhanbarthau craidd yng nghyd-destun De’r Byd ac yn datgelu sut mae prifysgolion newydd yn llunio ac yn sefydliadu clymau rhanbarthol. Trwy astudiaethau achos ar 5 prifysgol newydd yn India, nodwn dri llwybr – personol, sefydliadol a llwybr wedi’i frocera – y mae prifysgolion newydd yn llunio clymau rhanbarthol drwyddynt, a phedwar rhesymeg – graddoliaeth, cyfrifoldeb cymdeithasol, cyfiawnhad, a rhesymoliad – y mae’r clymau hyn yn gwreiddio drwyddynt. Rydym yn dadansoddi ac yn cyfuno’r tri llwybr a’r pedwar rhesymeg yn fframwaith sy’n esbonio sut mae clymau newydd yn cael eu llunio a’u datblygu rhwng prifysgol newydd a’i rhanbarth cyfagos di-graidd.

Ar ôl bod yn ymchwilydd meintiol am bron y cyfan o’m gyrfa, rwy’ wedi bod yn cyflwyno mwy a mwy o amrywiaeth i’m gwaith. Gan ddefnyddio fy nghyhoeddiadau blaenorol a’m prosiectau presennol, mae’r seminar hon yn canolbwyntio ar elfennau allweddol ymchwil dulliau cymysg. Mae’n ateb rhai o’r cwestiynau canlynol: Pam ymchwil dulliau cymysg? Ym mha drefn? Beth ddylech ei ddisgwyl o’r adolygwyr? Beth mae dyfodol ymchwil rheoli yn ei gynnwys ynghylch ymchwil dulliau cymysg?

Mae tagfeydd cyson mewn porthladdoedd cynwysyddion wedi tarfu’n ddifrifol ar gadwyni cyflenwi byd eang yn enwedig ers COVID-19. Mae dwysedd uchel iardiau a thagfeydd mewn porthladdoedd yn galw ar frys am weithrediadau mwy effeithlon mewn porthladdoedd môr. Mesur lliniaru pwysig yw rhagfynegi terfynfeydd allan cynwysyddion pan fyddant yn cael eu rhyddhau o longau fel y gellir rheoli’r cynwysyddion yn fwy effeithlon trwy gydol proses logisteg y porthladd. I ymateb i gais porthladd morgludiant am adnodd rhagfynegi i ddosbarthu cynwysyddion i derfynfeydd allan arfaethedig, datblygom fframwaith methodolegol arloesol yn integreiddio pedair elfen allweddol: defnyddio data wedi’i strwythuro a heb ei strwythuro, peirianneg nodweddion wedi’i llywio gan ymarfer a gwybodaeth, modelau dosbarthu seiliedig ar ddysgu peirianyddol esboniadol, a dadansoddiad costau a luniwyd trwy fodel. Trwy ymchwil empirig mewn porthladd yng ngorllewin Ewrop, dangosir y gall y fframwaith rhagfynegol arwain at arbed tua 10.42% ~ 20.65% mewn costau o gymharu â senario busnes yn ôl yr arfer. At hynny, gall y fframwaith rhagfynegol gael ei integreiddio’n hawdd i’r system weithredu bresennol gyda bach iawn o risg. Hefyd, mae gan y fframwaith methodolegol arfaethedig gymwysiadau ehangach y tu hwnt i’r diwydiant morgludo. Gall pob un o’r pedair elfen allweddol gyfrannu at ddatblygu a defnyddio’r fframwaith rhagfynegol mewn sectorau diwydiant eraill.

Mae'r seminar hwn yn cyflwyno rôl techneg achosion critigol fel dull casglu a dadansoddi effeithiol ar gyfer cynnal ymchwil busnes ansoddol. Caiff ychydig o'r heriau wrth ddefnyddio CIT eu trin a thrafod, a rhennir enghreifftiau. Byddai'r seminar hwn o ddiddordeb arbennig i ymchwilwyr ansoddol sydd am ehangu ansawdd y naratif a chael dealltwriaeth wrth fynd i'r afael â heriau wrth gyflwyno eu canfyddiadau ansoddol mewn astudiaethau ymchwil.

Mae’r diwydiant deallusrwydd artiffisial (A.I.) wedi pweru realiti o flaen yr oes o geir yn gyrru’u hunain a chynorthwywyr llais yn ein helpu gyda bron pob angen. Fodd bynnag, mae’r diwydiant A.I. wedi creu heriau systematig hefyd. Er enghraifft, er iddo arwain at blatfformau lle y mae gweithwyr yn labelu data i wella algorithmau dysgu peirianyddol, mae fy ymchwil wedi datgelu bod y gweithwyr hyn yn ennill llai na’r isafswm cyflog. Hefyd, rydym yn gweld ymchwydd yn nifer yr algorithmau A.I. sy’n breinio rhai poblogaethau ac yn eithrio eraill yn hiliol. Petaem ni’n gallu datrys yr heriau hyn, gallem greu mwy o gyfiawnder cymdeithasol a galluogi deallusrwydd artiffisial sy’n mynd i’r afael ag anghenion pobl yn well, yn enwedig grwpiau rydym wedi’u heithrio’n draddodiadol.

Yn yr anerchiad hwn, byddaf yn trafod rhai o’r problemau byd eang dybryd hyn yn y diwydiant deallusrwydd artiffisial y mae fy ymchwil wedi’u datgelu. Byddaf yn cyflwyno sut y gallwn ddechrau mynd i’r afael â’r problemau hyn trwy fy fframwaith arfaethedig, “Deallusrwydd Artiffisial er Budd”. Mae fy fframwaith yn defnyddio dylunio sensitif i werth i ddeall gwerthoedd pobl ac unioni niwed. Byddaf yn cyflwyno astudiaethau achos lle byddaf yn defnyddio’r fframwaith hwn i ddylunio systemau A.I. sy’n gwella amodau gwaith y gweithwyr sy’n gweithredu yn y cefndir yn ein diwydiant A.I. Gorffennaf trwy gyflwyno agenda ymchwil ar gyfer astudio effaith A.I. mewn cymdeithas, ac ymchwilio i ddatrysiadau cymdeithasol-dechnegol effeithiol o blaid gweithwyr.

Dychmygwch eich bod yn paratoi ar gyfer taith rafftio. Bydd yr antur yn herio’ch gallu i hwylio dyfroedd garw. Wrth i chi bacio, rydych chi’n meddwl tybed a fyddwch chi’n gallu osgoi, neu o leiaf ddod dros y cwympiadau sy’n digwydd oherwydd troeon yr afon. Cyn i’r daith ddechrau, rydych yn meddwl tybed sut byddwch chi’n ymdopi â llanw a thrai’r afon. Yn debyg i daith rafftio, mae’r rhan fwyaf o weithwyr sefydliad yn hwylio adfyd yn gysylltiedig â thechnoleg (Fletcher & Sarkar, 2013), a ddiffinnir fel y caledi a’r dioddefaint sy’n gysylltiedig â tharfu yn yr amgylchedd TG yn y gwaith, fel prosesau gweithio wedi’u galluogi gan TG sy’n newid yn gyflym (Vial, 2019). Mae adfyd yn gofyn bod gweithwyr yn newid eu hymddygiad, eu nodau neu eu credoau. Bydd rhai gweithwyr yn hwylio adfyd yn llyfn, bydd eraill yn cael trafferth ag ef.

Mae’r llenyddiaeth seicoleg ac ymddygiad sefydliadol wedi astudio sut mae gweithwyr yn delio ag adfyd. Yn aml, mae’r astudiaethau hyn y tu hwnt i’r parth TG yn cyfeirio at wydnwch, sef gallu rhywun i amddiffyn rhag adfyd a dod drosto, fel adleoli neu farwolaeth rhywun arwyddocaol (Mitchell et al., 2019; Yi-Feng Chen et al., 2021). Yn y papur hwn, awgrymwn y gall gwydnwch digidol helpu gweithwyr i lywio’r adfyd disgwyliedig (e.e. gweithredu prosiect TG) neu annisgwyl (e.e. defnyddio TG o ganlyniad i Covid-19) a geir yn eu hamgylchedd TG yn y gwaith.

Mae rhaglenni adbrynu pwyntiau (PRPs) wedi dod yn gynyddol boblogaidd ymhlith platfformau e-fasnach, gan eu bod yn rhoi cymhelliad cryf i gwsmeriaid brynu dro ar ôl tro. Fodd bynnag, mae llawer o blatfformau PRP yn perfformio’n wael, ac mae’r rhesymau dros eu methiant yn aneglur o hyd i ymarferwyr marchnata ac ymchwilwyr. Credwn mai un o’r rhwystrau allweddol rhag casglu gwybodaeth am effaith PRPs yw’r ffaith bod dyluniadau adbrynu pwyntiau yn amrywio, sy’n ein hatal rhag deall y dulliau a ddefnyddir gan PRPs i ddylanwadu ar ganlyniadau a ddymunir. Hyd eithaf ein gwybodaeth, mae tri dyluniad gwahanol yn bodoli ar gyfer adbrynu pwyntiau mewn ymarfer marchnata hyd yma. Galwn y dyluniad cyntaf yn wobrwyo sefydlog, sy’n hysbysu’r defnyddiwr am yr union swm y gall ei gronni yn gyfnewid am nifer benodol o bwyntiau, e.e., "450.47 o bwyntiau oes am $4.49". Cyfeiriwn at yr ail ddyluniad fel tanwobrwyo, lle mae’r platfform adbrynu’n dangos terfyn uchaf y swm y gellir ei adbrynu, e.e., “byddwch yn cael hyd at $4", ond mae’r swm gwirioneddol a dderbynnir wrth adbrynu yn is na $4. Gelwir y trydydd dyluniad yn wobrwyo i fyny, lle y cyflwynir y terfyn isaf i’r defnyddiwr, e.e., “byddwch yn cael $2 o leiaf", ond mae’r swm gwirioneddol a dderbynnir yn uwch na $2. Er y defnyddir y dyluniadau hyn yn aml yn ymarferol, mae gweithiau ysgolheigaidd hyd yma wedi anwybyddu effaith bosibl y gwahaniaethau hyn rhwng swm gwobr a nodwyd i ddechrau a’r gwerth gwirioneddol a dderbynnir wrth adbrynu, a elwir fel arall yn newidiadau mewn gwobrwyo.

Gan ddefnyddio’r ddamcaniaeth bodlonrwydd newid mewn arenillion, archwiliwn effeithiau newidiadau mewn gwobrwyo (h.y., gwobrwyo sefydlog, tanwobrwyo, a gwobrwyo i fyny) ar degwch a bodlonrwydd canfyddedig. Yn ogystal, ymchwiliwn i amodau ffiniol yr effeithiau hyn. Gwnaethom gynnal dau arbrawf ar-lein. Canfu astudiaeth 1 fod tanwobrwyo’n lleihau tegwch a bodlonrwydd canfyddedig cyfranogwyr o gymharu â gwobrwyo sefydlog a gwobrwyo i fyny. Mewn cyferbyniad, prin yw arwyddocâd y gwahaniaethau rhwng gwobrwyo sefydlog a gwobrwyo i fyny. Yn astudiaeth 2, canfyddwn fod cynyddu optimistiaeth sefyllfaol cyfranogwyr yn gallu gwanhau effeithiau negyddol tanwobrwyo ar degwch a bodlonrwydd canfyddedig. Mae’r effeithiau hyn yn fwy amlwg ymhlith cyfranogwyr ag optimistiaeth gronig uwch. Yn bwysicach, canfyddwn fod y teimlad o siom yn esbonio’r effeithiau rhyngweithiol rhwng newid mewn gwobrwyo, optimistiaeth sefyllfaol, ac optimistiaeth gronig. Nesaf, bydd astudiaeth EEG yn cael ei chynnal i ddatgelu cydberthnasoedd niwral y dyluniadau adbrynu gwobrwyo hyn.

Bywgraffiad y Siaradwr: 

Mae Dr. Oteng Ntsweng yn gymrawd ymchwil yn yr Adran Systemau Gwybodaeth a Dadansoddeg ym Mhrifysgol Genedlaethol Singapore (NUS). Derbyniodd ei Ph.D. mewn Systemau Gwybodaeth a Dadansoddeg gan NUS. Mae ganddi BSc (Anrh) mewn Diogeledd Cyfrifiadurol o Brifysgol Swydd Stafford. Mae gwaith ymchwil Oteng yn canolbwyntio ar y rhyngweithio rhwng pobl a chyfrifiaduron a’r rhyngweithio rhwng pobl a deallusrwydd artiffisial yng nghyd-destun systemau addasol cymhleth fel technolegau gwybodaeth iechyd, technolegau wedi’u gemeiddio, a thechnolegau addysgol, gyda diddordeb arbennig mewn sut mae’r ffordd y defnyddir y technolegau hyn yn effeithio ar ganlyniadau a ddymunir. Mae Dr. Ntsweng yn frwd ynglŷn ag ymgymryd â phrosiectau ymchwil sy’n cael effaith fuddiol ar gymwysiadau byd go iawn. Felly, mae hi’n cydweithio â diwydiant mewn prosiectau sy’n ymwneud ag ymyriadau digidol ym maes gofal iechyd ac addysg. Mae ei gwaith ymchwil wedi cael ei enwebu am wobr papur gorau mewn cynhadledd academaidd flaenllaw – y Gynhadledd Ryngwladol ar Systemau Gwybodaeth (ICIS). 

Dros yr ychydig ganrifoedd diwethaf, mae arloesedd ariannol wedi profi i fod yn rhan allweddol o’r cyd-destun economaidd, gan ddemocrateiddio cyfranogiad economaidd a ffurfio llawer o systemau ariannol, ac mae’n parhau i greu lliaws o gynhyrchion neu wasanaethau a phrosesau ariannol.

Pwyslais cyntaf y gwaith ymchwil hwn yw deall ac amlygu’r arloesiadau ariannol mwyaf perthnasol yn y diwydiant ariannol. Yr ail bwyslais yw archwilio’r effaith y mae’r arloesiadau ariannol hyn wedi’i chael ar swyddogaethau craidd y system ariannol, effaith yr arloesiadau hyn ar berfformiad a strwythur y diwydiant ariannol, a chymharu, yn ei hanfod, y nodweddion hyn yn y gwledydd BRICS â rhai’r gwledydd G7. Ac yn olaf, ond nid lleiaf, gwasanaethau ariannol yw un o’r diwydiannau mwyaf rheoleiddiedig mewn unrhyw economi ac mae arloesiadau ariannol wedi bod yn offeryn defnyddiol yn hanesyddol wrth geisio osgoi rheoleiddio darbodus, felly nid yw’n syndod na ddylai rheoleiddio fyth aros yn llonydd.

Bywgraffiad y Siaradwr:

Mae Dr. Jihane Aayale yn Athro Cyswllt yn Adran Economeg “Groupe Institut Supérieur de Commerce et d’Administration des Entreprises” (ISCAE). Mae hi’n aelod o’r Labordy Ymchwil ar gyfer Materion Cyllid ac Economaidd (LAREF), Canolfan Ymchwil Hubei ar gyfer Arloesedd Gwyddonol a Thechnolegol a Datblygu Economaidd, yn ogystal ag aelod gweithredol o’r Sefydliad Peirianneg a Thechnoleg Rhyngwladol sydd wedi’i leoli yn Wuhan. Mae ei diddordebau academaidd ac ymchwil yn cynnwys Economeg Arloesedd, Arloesiadau Ariannol, Marchnadoedd Cyfalaf, Cryptoarian a Deallusrwydd Artiffisial, ac Arloesedd Gwyddonol a Thechnolegol ar gyfer Datblygu Economaidd.

Mae cystadleurwydd cynaliadwy cenhedloedd a phontio ganddynt tuag at arferion mwy cynaliadwy yn faterion sydd wedi denu sylw byd-eang. Mae’r materion hyn yn gofyn bod cenhedloedd yn mynd ar drywydd strategaethau twf sy’n sicrhau datblygiad economaidd, amgylcheddol a chymdeithasol. Mae pontio yn gysylltiedig â chynaliadwyedd yn cynnwys cyfres o ryngweithiadau cymhleth rhwng ffactorau niferus, gan gynnwys technoleg, polisi, economeg a marchnadoedd. O fewn y cwmpas hwn, mae cyflwyno digideiddio a hyrwyddo eco-arloesi, y camu tuag at ddatblygiad ariannol ac ymddangosiad arferion ariannol amgen fel cyllido torfol, ynghyd â mabwysiadu systemau economaidd mwy rhydd, yn alluogwyr credadwy y pontio cynaliadwy. Fodd bynnag, prin yw’r wybodaeth am sut mae’r cysyniadau hyn yn gyrru’r pontio hwn ac yn cyfrannu at gystadleurwydd cynaliadwy cenhedloedd. Mae’r anerchiad hwn yn cyflwyno canfyddiadau deublyg gwaith ymchwil cysylltiedig sy’n llenwi’r bwlch hwn. Mae’r cyntaf yn cyflwyno canfyddiad cymhwyso theori cymhlethodd i set ddata sy’n rhychwantu 18 gwlad dros gyfnod pedair blynedd i gipio ffurfwedd posibl y ffactorau dethol, fel digideiddio, cyllido torfol, datblygiad ariannol ac eco-arloesi, sy’n caniatáu i wledydd gyflawni pontio yn gysylltiedig â chynaliadwyedd a gwireddu cystadleurwydd cynaliadwy. Mae’r ail yn asesu goblygiadau posibl arferion cynaliadwy, fel economi rannu, i ddatblygiad economaidd cynaliadwy ac effeithlonrwydd ynni. Diweddwn yr anerchiad hwn gyda thrafodaeth agored ar ymdrechion yn y dyfodol tuag at gystadleurwydd cynaliadwy.