Trosolwg
Yn Gymrawd etholedig y Sefydliad Marchnata Siartredig (FCIM) ac wedi derbyn statws Marchnatwr Siartredig CIM, mae Stephanie Lee'n dod â mwy na 30 mlynedd o brofiad a gwybodaeth mewn marchnata a rhyngwladoli i'w rôl fel Prif Swyddog Marchnata / Pennaeth y Gwasanaethau Marchnata, Cyfathrebu ac Ymgysylltu ar gyfer Gwyddor Data Poblogaethau (y Grŵp Gwybodeg Iechyd gynt) yn Ysgol Feddygaeth Prifysgol Abertawe, sy'n rhan o Gyfadran Meddygaeth, Iechyd a Gwyddor Bywyd, Prifysgol Abertawe.
Mae Stephanie wedi bod yn gweithio ym maes Gwybodeg Iechyd ers iddi gael ei chyflogi gan Brifysgol Abertawe yn 2000. Mae hi bellach yn arwain tîm y gwasanaethau marchnata, cyfathrebu ac ymgysylltu yng Ngwyddor Data Poblogaethau gan ddarparu gwasanaethau i randdeiliaid allanol o arianwyr, grwpiau academaidd amlddisgyblaethol, cyrff y sector cyhoeddus a phartneriaethau rhyngwladol yn y DU ac yn fyd-eang sy'n cynnwys dros 750 o ddefnyddwyr data mewn mwy na 100 o sefydliadau'n fyd-eang, yn ogystal â 250 o staff mewnol Gwyddor Data Poblogaethau.
Mae Stephanie'n gyfrifol am gyflwyniad llwyddiannus ei thîm o strategaethau marchnata, cyfathrebu ac ymgysylltu ar gyfer portffolios ymchwil a ariennir yn allanol gwerth £85m ar gyfer Gwyddor Data Poblogaethau yn y DU ac yn rhyngwladol, sy'n cynnwys 13 Canolfan Rhagoriaeth wedi'u hategu gan dechnoleg fewnol y Platfform e-ymchwil Diogel (SeRP). Mae hi hefyd yn rheoli rhaglen hyfforddiant a meithrin gallu Ymchwil ac Arloesi'r DU (UKR&I) ar gyfer Gwyddor Data Poblogaethau.
Ei phrif ffocws yw parhau i godi proffil Gwyddor Data Poblogaethau yn Ysgol Feddygaeth Prifysgol Abertawe, ac i gynyddu ei phresenoldeb byd-eang sy'n helpu i feithrin partneriaethau strategol a busnes rhyngwladol drwy arwain cyfres o raglenni allgymorth ac ymgysylltu byd-eang.
Stephanie yw Cyd-sefydlwr a Chyfarwyddwr Gweithrediadau International Journal of Population Data Science (IJPDS) a gafodd ei lansio yn 2017, ac fe'i gynhelir gan Wyddor Data Poblogaethau yn Ysgol Feddygaeth Prifysgol Abertawe. Mae wedi arwain IJPDS yn llwyddiannus, cyfnodolyn Mynediad Agored Aur, wrth gael cymeradwyaeth a sicrhau ei gynnwys ar gyfer mynegeio yn Scopus, PubMed, PubMed Central ac Europe PubMed Central yn 2020, a MEDLINE (Llyfrgell Meddygaeth Genedlaethol yr UD) yn 2021. Ychwanegiad o bwys at restr o dystlythyrau y cyfnodolyn a cham cadarnhaol arall ymlaen wrth ddatblygu'r maes Gwyddor Data Poblogaethau.