Mr Richard Neylon gydag enillwyr gwobrau HFW: Savas Yilmaz, Aslihan Asman ac Yarkin Koc
Mae HFW yn gwmni cyfreithiol masnachol rhyngwladol blaenllaw, sydd ag enw da arbennig yn y sectorau sy'n sail i fasnach fyd-eang.
Fe'i sefydlwyd yn Llundain ym 1883, ac ers hynny mae wedi datblygu'n gwmni byd-eang gyda 22 o swyddfeydd ledled Ewrop, y Dwyrain Canol, Asia a'r Môr Tawel, a'r Amerig.
Rydym yn falch iawn bod HFW yn parhau i gynnal perthynas agos â'r Sefydliad Cyfraith Llongau a Masnach Ryngwladol ym Mhrifysgol Abertawe, gan ddyfarnu tair gwobr bob blwyddyn i fyfyrwyr ar ein rhaglenni LLM i gydnabod eu rhagoriaeth academaidd.
Eleni, dyfarnwyd gwobrau HFW i'r myfyrwyr canlynol:
- Aslihan Asman – Gwobr HFW Cludo Nwyddau ar y Môr, ar y Tir ac yn yr Awyr
- Yarkin Koc – Gwobr HFW Cyfraith Morlys
- Savas Karer Yilmaz – Gwobr HFW Olew a Nwy: Contractau ac Atebolrwydd
Cyflwynwyd y gwobrau gan Richard Neylon, Partner yn HFW, sy'n gyn-fyfyriwr nodedig Ysgol y Gyfraith Prifysgol Abertawe ac yn Ddoethur er Anrhydedd y Brifysgol. Yn dilyn y seremoni wobrwyo, cafodd enillwyr y gwobrau gyfle i gwrdd â Richard a hyfforddeion HFW mewn derbyniad, lle buont yn trafod gyrfaoedd ym maes cyfraith fasnachol a morwrol ac yn dysgu mwy am y cyfleoedd sydd ar gael yn y cwmni.
Wrth fynychu'r dathliadau, dywedodd yr Athro George Leloudas:
"Mae'n uchafbwynt bob blwyddyn academaidd i ddathlu talent eithriadol a gwaith caled ein myfyrwyr. Mae Aslihan, Yarkin a Savas wedi gosod safon newydd gyda'u llwyddiannau eleni. Rydym yn hynod falch ohonynt ac yr un mor ddiolchgar i Richard Neylon a HFW am eu partneriaeth amhrisiadwy a'u hymrwymiad parhaus i gefnogi ein graddedigion wrth iddynt gychwyn ar eu gyrfaoedd yn y sector morwrol."