Canllawiau hygyrchedd newydd i drawsnewid hygyrchedd ym Mhrifysgol Abertawe
Mae Prifysgol Abertawe'n gweithio ochr yn ochr ag AccessAble i gyflwyno canllawiau hygyrchedd newydd ar gyfer yr adeiladau, y cyfleusterau a'r gwasanaethau ar ei champysau.
Mae’r canllawiau hyn, a ddatblygwyd mewn partneriaeth ag AccessAble, ac sydd wedi’u llywio gan adborth gan fyfyrwyr a chydweithwyr, yn darparu gwybodaeth fanwl ac ymarferol am hygyrchedd ar gyfer 76 o’r adeiladau academaidd, y gwasanaethau i fyfyrwyr, y preswylfeydd a’r cyfleusterau allweddol ar draw Campws y Bae, Campws Singleton a Pharc Chwaraeon Campws y Bae.
Maent yn cynnwys manylion megis y canlynol:
- meysydd parcio a mannau gollwng hygyrch
- mynediad a llwybrau heb risiau
- mynedfeydd adeiladau a derbynfeydd
- lifftiau a chylchredeg mewnol
- toiledau a chyfleusterau newid hygyrch
- mannau addysgu, astudio, chwaraeon a chymdeithasu
- nodweddion a chyfleusterau hygyrchedd eraill.
Mae canllawiau AbleAccess yn seiliedig ar ffeithiau ac yn fanwl iawn, gan symud ymhell y tu hwnt i ymadroddion diwerth megis “cwbl hygyrch” i roi manylion eglur ar yr hyn y gall myfyrwyr, staff ac ymwelwyr ei ddisgwyl.
Mae’r canllawiau am ddim wedi cael eu dylunio i gefnogi pobl ag amrywiaeth eang o anghenion hygyrchedd, gan gynnwys y rhai hynny sydd ag anghenion symudedd neu synhwyraidd a’r rhai hynny sy’n teimlo’n bryderus mewn amgylcheddau anghyfarwydd.
Gellir cyrchu’r canllawiau drwy wefan AccessAble, gan eu gwneud yn hawdd eu defnyddio i gynllunio ymweliad a phan fyddwch chi ar y campws hefyd.
Meddai Greg Ducie, Cyfarwyddwr Ystadau, Digidol a Gwasanaethau Campws , ‘‘Ym Mhrifysgol Abertawe, rydyn ni’n ymrwymedig i sicrhau bod ein campysau’n hygyrch, yn groesawgar ac yn gynhwysol i bawb. Bydd ein canllawiau hygyrchedd yn darparu gwybodaeth eglur ac ymarferol i helpu myfyrwyr, staff ac ymwelwyr i gynllunio eu teithiau a defnyddio ein cyfleusterau’n hyderus. Drwy wella mynediad at wybodaeth, rydyn ni’n helpu i ddileu rhwystrau a chreu amgylchedd lle gall pawb gyfrannu’n llawn ym mywyd y Brifysgol.’
Meddai Dr Gregory Burke, Sylfaenydd a Chadeirydd Gweithredol, AccessAble, “Gall dechrau yn y Brifysgol, ymweld â champws newydd a mynd i ddarlith am y tro cyntaf fod yn amser cyffrous ond heriol i bawb. I fyfyriwr neu aelod staff anabl, gallwch chi ddisgwyl i’r heriau hyn gynyddu. Mae’r Canllawiau Hygyrchedd Manwl hyn yn rhannu’r wybodaeth ymarferol y mae ei hangen ar bobl er mwyn iddyn nhw gynllunio gan ddiwallu eu hanghenion eu hunain a theimlo’n fwy hyderus pan fyddant yn cyrraedd. Maen nhw’n adlewyrchu profiadau pobl anabl a gwaith gofalus ein harolygwyr hyfforddedig.
“Mae Prifysgol Abertawe wedi mabwysiadu’r ymagwedd honno. Mewn llai na blwyddyn, rydyn ni wedi gweithio i greu 76 o Ganllawiau Hygyrchedd Manwl ar draws ei champysau a’i chyfleusterau. Mae gwneud y canllawiau hyn ar gael drwy wefan y Brifysgol yn amlygu gwybodaeth ymarferol am ddim lle mae pobl eisoes yn chwilio amdani. Mae hi wedi bod yn bleser gweithio gyda chydweithwyr ar draws y Brifysgol i wireddu hyn.”