Mae Ysgol Reolaeth Prifysgol Abertawe yn gweithio mewn partneriaeth â chwmni ymgynghoriaeth yn y DU Libra Europe i gyflwyno 2026 Diseño Argentino Exponencial — Creative Bootcamp, rhaglen entrepreneuriaeth ryngwladol sy'n cefnogi darpar entrepreneuriaid ar draws sectorau dylunio a chreadigol yr Ariannin.
Wedi'i gyd-greu gan Fundación Bunge y Born a'r British Council, mae'r bŵtcamp yn dod â phymtheg darpar entrepreneur ynghyd am raglen hybrid dros chwe mis sy'n canolbwyntio ar arloesedd, datrys problemau mewn ffordd greadigol a thwf busnes cynaliadwy.
Bellach yn ei phedwaredd flwyddyn, mae'r fenter yn rhan o ymdrech ehangach i gryfhau cydweithio rhwng yr Ariannin a'r DU yn yr economi greadigol.
Gan adeiladu ar y genhadaeth hon, mae rhifyn 2026 yn cyflwyno modiwlau newydd sy'n adlewyrchu anghenion datblygol y diwydiant, gan gynnwys:
- Deallusrwydd artiffisial o ran prosesau creadigol a rheoli
- Marchnata ar gyfer gwerthiannau
- Prisiau
Bydd cyfranogwyr yn archwilio sut gall technolegau digidol gyflymu datblygiad cynnyrch a chefnogi gwneud penderfyniadau ar sail data mewn marchnadoedd sy'n newid yn gyflym.
Gan ddefnyddio arbenigedd yr Ysgol Reolaeth mewn arloesi ac entrepreneuriaeth a gallu Libra Europe i gysylltu technoleg ag arfer gweithredol, mae'r rhaglen yn cefnogi cyfranogwyr i ddatblygu modelau busnes cynaliadwy ar raddfa ehangach drwy gyfuniad o ddosbarthiadau meistr, gweithdai ymarferol a mentora.
Meddai'r Athro Andrew Thomas, Pennaeth yr Ysgol Reolaeth: “Rwyf wrth fy modd bod yr Ysgol Reolaeth yn cael y cyfle i weithio gyda phartneriaid ar Argentine Exponential Design – Creative Bootcamp 2026, ac rydym yn gyffrous i gael cefnogi gwaith creadigol ac arloesol entrepreneuriaid”
Mae'r bŵtcamp ar gyfer entrepreneuriaid sy'n gweithio yn y sectorau a arweinir gan ddylunio megis:
- Dylunio diwydiannol a chynnyrch
- Dillad, nwyddau ac ategolion lledr
- Datblygu bioddeunyddiau
- Crefftau cyfoes
- Cynnyrch tecstilau
Yn ogystal â hyfforddiant sy'n benodol i'r sector, bydd cyfranogwyr yn ymuno â rhwydwaith rhyngwladol cynyddol o weithwyr proffesiynol creadigol, ac yn cael mynediad at gyfleoedd i gydweithio ac ennill gwybodaeth arbenigol.
Ychwanegodd Rob Baldwin, Cyfarwyddwr Atebion Libra Europe: "Rydym yn falch o fod yn gweithio gyda British Council yr Ariannin a Phrifysgol Abertawe i gyflwyno bŵtcamp DAE Creative 2026. Rydym yn cefnogi busnesau creadigol drwy weithdai cymhwysol a chydweithio rhyngwladol".
Drwy gyfuno arbenigedd rhyngwladol â dealltwriaeth leol ddofn, mae'r bartneriaeth yn adlewyrchu ymrwymiad a rennir at feithrin arlosedd, ehangu cyfleoedd a grymuso'r genhedlaeth nesaf o entrepreneuriaid o'r Ariannin i ffynnu mewn economi fyd-eang a arweinir yn fwyfwy gan dechnoleg.
Gallwch gyflwyno ceisiadau ar gyfer Diseño Argentino Exponencial — Creative Bootcamp 2026 yn awr a bydd yn cau ddydd Gwener 27 Mawrth.
Gall entrepreneuriaid cymwys gyflwyno cais drwy wefan y rhaglen.