Ar ôl i chi wneud cais

Byddwn yn anfon neges e-bost atoch i gydnabod ein bod wedi cael eich cais. Er ein bod yn cael cannoedd o geisiadau bob wythnos yn ystod y cyfnodau prysuraf, unwaith y byddwn wedi cael yr holl ddogfennaeth ategol, rydym yn anelu at eich hysbysu am ein penderfyniad (neu gyflwyno gwahoddiad i chi ddod am gyfweliad) o fewn 9 diwrnod gwaith o'r dyddiad y byddwn yn cydnabod ein bod wedi cael eich cais. Wedyn, bydd y Swyddfa Derbyn yn cynnal gwiriadau ar bob cais ac yn tynnu sylw at y wybodaeth bwysig i Ddetholwyr Derbyn ei hystyried (e.e. p'un a ydych yn debygol o fodloni gofynion mynediad y Brifysgol/eisoes wedi'u bodloni, p'un a oes gennych unrhyw ofynion penodol ac ati).

Os na fyddwch wedi cynnwys gwybodaeth allweddol fel rhan o'ch cais, megis trawsgrifiad academaidd, byddwn yn gohirio'r cais ac yn cysylltu â chi drwy e-bost er mwyn gofyn am y ddogfen goll. Mae rhai cyrsiau Meistr (yn enwedig yn yr Adran Iaith a Llenyddiaeth Saesneg) yn ei gwneud yn ofynnol i ymgeiswyr ddarparu gwaith ysgrifenedig ychwanegol i ategu cais.

Unwaith y bydd yr holl wiriadau wedi'u cwblhau ac y bydd y dogfennau allweddol wedi'u hatodi, caiff eich cais ei anfon i Ddetholwr Derbyn yr Ysgol/Coleg i'w ystyried.

Mae gan bob Ysgol/Coleg Ddetholwr Derbyn a fydd yn adolygu eich cais ac yn ystyried amrywiaeth o feini prawf megis:

• eich perfformiad academaidd presennol a blaenorol;
• dysgu blaenorol drwy brofiad;
• cyrsiau astudio presennol;
• asesiadau gan ganolwyr;
• cofnodion cyflawniad;
• tystiolaeth o ymrwymiad a chymhelliant;
• ansawdd gwaith ysgrifenedig;

Bydd y Detholwyr hefyd yn ystyried eich gallu i gyfrannu at fywyd diwylliannol, chwaraeon neu gymdeithasol y Brifysgol a'r gymuned.

Os ydych yn ymgeisydd ag anabledd difrifol neu gyflwr meddygol cronig neu os oes gofynion cymorth sylweddol gennych, yna byddwn yn anfon holiadur atoch er mwyn asesu eich anghenion cymorth ac mae'n bosibl y bydd angen i chi gael cyfweliad gan Swyddog Anabledd a/neu Gyfarwyddwr Iechyd Galwedigaethol y Brifysgol ar ôl i'r penderfyniad academaidd gael ei wneud.

Gwneir hyn er mwyn sicrhau ein bod yn ymwybodol o unrhyw amgylchiadau a allai effeithio ar eich derbyn i'r Brifysgol a'ch astudiaethau dilynol ac er mwyn sicrhau y gallwn roi unrhyw systemau cymorth ar waith y gallai fod eu hangen arnoch.

Unwaith y bydd y Detholwr Derbyn wedi ystyried eich cais yn llawn, anfonir y penderfyniad atoch drwy e-bost. Cewch eich hysbysu naill ai:

• Ein bod yn cynnig lle i chi, wedi'i lofnodi gan y Detholwr Derbyn perthnasol ar ran Cofrestrydd y Brifysgol. Os yw eich cynnig yn amodol, bydd yn cynnwys y gofynion academaidd y mae'n rhaid eu bodloni cyn dechrau'r flwyddyn academaidd. Nid ystyrir bod unrhyw gynigion derbyn a wneir drwy unrhyw gyfrwng arall yn gyfreithiol gyfrwymol. Ni ddylid ystyried bod awgrym y cewch eich derbyn gan aelod o staff unrhyw adran yn cyfateb i gynnig lle, ac ni ddylid ystyried bod unrhyw awgrym o'r fath yn gyfrwymol mewn unrhyw ffordd, tan y byddwch wedi derbyn cynnig ffurfiol gan y Swyddfa Derbyn.
• Ein bod yn eich gwahodd am gyfweliad.
• Na allwn gynnig lle i chi

Fel arfer, dylai ymgeiswyr gael penderfyniad o fewn 9 diwrnod gwaith. Noder: os na fydd eich cais yn gyflawn, caiff penderfyniad ar eich cais ei ohirio.

Fel arfer, byddwch yn cael llythyr penderfyniad drwy e-bost o fewn 2 ddiwrnod gwaith o gael yr e-bost "Decision Finalised". Mae'r e-bost "Decision Finalised" yn golygu bod y Detholwr Derbyn wedi gwneud penderfyniad ond mae'n rhaid prosesu a gwirio'r penderfyniad hwn o hyd. Os na fyddwch wedi cael llythyr penderfyniad AR ÔL dau ddiwrnod gwaith llawn, dylech anfon e-bost at y tîm derbyn ôl-raddedig. 

Gallwch drefnu lle ar ddiwrnod agored drwy ein tudalen Diwrnodau Agored Ôl-raddedig.

Mae croeso i bob ymgeisydd ymweld â'r Brifysgol yn annibynnol ar unrhyw adeg gan nad oes unrhyw gyfyngiadau ar fynediad i'r Brifysgol. Fodd bynnag, dylech drefnu apwyntiad gyda'ch coleg os hoffech edrych o amgylch yr Ysgol/Coleg a chyfarfod ag aelod penodol o'r staff.

Os hoffech edrych ar lety'r Brifysgol hefyd, dylech drefnu hyn ymlaen llaw drwy anfon e-bost i Wasanaethau Preswyl. 

Cysylltwch â'r Swyddfa Derbyn drwy e-bost neu drwy ffonio: +44 (0) 1792 295358 a gallwch roi cyngor pellach i chi.

Mae cynnig amodol yn golygu eich bod wedi cael eich derbyn ar gwrs astudio ôl-raddedig AR YR AMOD y byddwch yn bodloni'r meini prawf a ddynodwyd yn eich llythyr derbyn ffurfiol.

Ceir rhestr o'r profion a dderbynnir gennym ar ein tudalen gofynion iaith Saesneg.

Preswylwyr o'r DU: Os yw eich cwrs yn cynnwys lleoliad lle y byddwch yn gwirfoddoli neu'n gweithio gydag oedolion agored i niwed neu blant, yna bydd angen i chi gael datgeliad troseddol uwch gan y Gwasanaeth Datgelu a Gwahardd (DBS).

Bydd y Swyddfa Derbyn yn anfon dolen i chi wneud cais am eich gwiriad DBS ar-lein o'r mis Ebrill cyn dyddiad dechrau eich cwrs. Dylech sicrhau eich bod wedi cwblhau eich cais ymhell cyn dyddiad dechrau eich cwrs. Darllenwch ein canllawiau DBS cyn dechrau cwblhau eich cais.

Gofynnir i ymgeiswyr o'r UE a thramor ddarparu dogfen wreiddiol gan awdurdod yr heddlu (neu awdurdod perthnasol arall) yn eich gwlad breswyl yn nodi statws eich cofnod troseddol. Mewn sawl gwlad, cyfeirir at y ddogfen hon fel "Tystysgrif Dim Collfarn Droseddol", "Tystysgrif Ymddygiad Da" neu "Dystysgrif Clirio gan yr Heddlu".

Os nad ydych yn siŵr ble i gael eich dogfennau, rhowch gynnig ar y canlynol:

• Cysylltwch â'ch gorsaf heddlu leol neu'ch awdurdod lleol.
• Cysylltwch â'r llysgenhadaeth neu'r conswl cyffredinol yn eich gwlad breswyl neu yn y Deyrnas Unedig. Ceir manylion llysgenadaethau yn y Deyrnas Unediar wefan y Swyddfa Dramor a'r Gymanwlad.
• Edrychwch ar y rhyngrwyd - defnyddiwch chwiliad geiriau megis "Criminal background check in country of residence".

Os ydych o'r farn nad oedd penderfyniad y Brifysgol i beidio â chynnig lle i chi yn briodol, anfonwch e-bost at y Swyddfa Dderbyn i gael adborth am y rhesymau dros eich gwrthod.

Os ydych yn anfodlon o hyd, gallwch apelio yn erbyn penderfyniad i beidio â chynnig lle i chi o dan yr amgylchiadau canlynol:

a) lle ceir gwybodaeth newydd o bwys, na ddatgelwyd am reswm da naill ai ar y cais gwreiddiol neu yn ystod y broses ddethol, a lle mae'r wybodaeth newydd honno o bwys ac yn uniongyrchol berthnasol i'r penderfyniad gwreiddiol; neu

b) os ydych o'r farn bod egwyddorion a gweithdrefnau derbyn y Brifysgol a/neu adran wedi cael eu rhoi ar waith mewn modd anghyson neu anghywir.

Ceir manylion llawn y weithdrefn apelio i ymgeiswyr yn ein Polisi Cwynion ac Apeliadau.

Os nad ydych yn fodlon ar y ffordd yr ymdriniwyd â'ch cais neu'ch ymholiad i'r Brifysgol, anfonwch e-bost i'r Swyddfa Dderbyn yn y man gyntaf.

Ar ôl trafod y mater gyda'r Swyddfa Derbyn, os byddwch yn anfodlon o hyd, gallwch wneud cwyn ffurfiol. Ceir manylion llawn y weithdrefn apelio i ymgeiswyr yn ein Polisi Cwynion ac Apeliadau.

Gweler ein tudalen dyddiadau Semester a Thymhorau.

Mae gan y Brifysgol adran Gwasanaethau Cymorth i Fyfyrwyr integredig a phroffesiynol sy'n canolbwyntio ar y myfyrwyr, gan gynnig gwybodaeth, cyngor, arweiniad a chymorth er mwyn i bob myfyriwr allu datblygu a chyflawni ei lawn botensial. I gael gwybodaeth fanwl, ewch i'n tudalennau Gwasanaethau i Fyfyrwyr.

Mae'r Gwasanaethau i Fyfyrwyr yn cynnig y gwasanaethau canlynol:

• Swyddfa Anabledd a Llesiant 
• Cyngor a Chymorth Ariannol 
• Y Gwasanaeth Cynghori Myfyrwyr Rhyngwladol