Yr Athro Simon Haslett

Dechreuodd yr Athro Haslett ddysgu daearyddiaeth ffisegol ddechrau'r 1990au, gan arbenigo ar geomorffoleg arfordirol, micropaleontoleg gwaternaidd a newid yn yr hinsawdd. Ef yw awdur y llyfr testun poblogaidd Coastal Systems, y mae'r 3ydd argraffiad allan ar hyn o bryd, a argraffwyd gan Wasg Prifysgol Cymru, ac roedd yn olygydd Quaternary Environmental Micropalaeontology a gyhoeddwyd gan Arnold. Mae e hefyd wedi ymrwymo i gyfathrebu gwyddoniaeth a gwaith allgymorth, gan gynnal nifer o ddarlithoedd cyhoeddus a gwneud rhaglenni dogfen i'r teledu ar gyfer y BBC. Mae'r Athro Haslett hefyd wedi goruchwylio myfyrwyr ôl-raddedig ym meysydd esblygiad arfordirol ac addysg ar gyfer datblygu cynaliadwy. Mae e hefyd yn angerddol am ymchwil israddedig ac mae'n gyd-sylfaenydd Cynhadledd Ymchwil Israddedig Prydain, a gynhelir yn flynyddol. Roedd e hefyd yn arloesi wrth ddefnyddio Google Earth wrth addysgu daearyddiaeth.

Mae'r Athro Haslett wedi cyhoeddi'n eang ym maes daearyddiaeth ffisegol, a gwyddorau'r ddaear a'r môr, gan gyhoeddi ei erthygl gyntaf ym 1990. Ar hyn o bryd mae'n Olygydd Cyswllt y Journal of Coastal Research. Mae ei brif gyrchfannau daearyddol yn cynnwys Maleisia a Borneo, de-ddwyrain Awstralia, ac arfordiroedd Celtaidd gogledd-orllewin Ffrainc a de-orllewin Prydain. Mae'n adnabyddus am gyd-ddatblygu'r ddamcaniaeth y gallai gorlanw arfordirol trychinebus, ym Môr Hafren ac Aber Hafren ym 1607, fod wedi ei achosi gan tswnami yn hytrach na storm. Naill ffordd neu'r llall, taniodd ei waith ymchwil ddiddordeb sylweddol yn y gorlanw hwn a oedd wedi mynd yn angof, ond ymddengys mai dyma’r drychineb naturiol waethaf i effeithio ar Brydain yn ein hanes mesuradwy, gan ladd amcanestyniad o 2,000 o bobl. Mae peth o'i ymchwil micropaleontolegol wedi defnyddio deunydd a gasglwyd o'r Prosiect Drilio'r Dyfnfor a Rhaglen Drilio'r Cefnfor, yn y Cefnfor Tawel, Cefnfor yr India a Chefnfor yr Iwerydd, gan wella dealltwriaeth o ddigwyddiadau hynafol El Niño. Mae e hefyd wedi cyfrannu at brosiectau amrywiol IGCP UNESCO.

A chanddo ddiddordeb mawr mewn dysgu ac addysgu, mae'r Athro Haslett hefyd wedi ymgymryd ag ymchwil a chyhoeddi yn y maes hwn, gan olygu’r llyfrau Linking Research and Teaching in Wales a Pedagogy of Climate Change ar gyfer yr Academi Addysg Uwch. Yn ddiweddar mae wedi datblygu diddordeb ymchwil i hanes addysg uwch hefyd.

Yn 2014, dyfarnwyd Prif Gymrodoriaeth yr Academi Addysg Uwch i'r Athro Hastlett ac mae'n Gymrawd y Gymdeithas Ddaearyddol Frenhinol, y Gymdeithas Ddaearegol, a'r Gymdeithas Frenhinol ar gyfer y Celfyddydau dros nifer o flynyddoedd.