Canlyniadau a'ch penderfyniad terfynol ar gyfer astudiaethau israddedig

Myfyrwyr yn dathlu wrth chwarae pêl foli ar y traeth yn Abertawe

Cadarnhau eich Lle yn Abertawe

Cael eich Canlyniadau a Chadarnhau eich Lle

Gelwir y cyfnod ym mis Awst bob blwyddyn pan fydd prifysgolion yn derbyn canlyniadau arholiadau ar gyfer ymgeiswyr sy’n sefyll Safon Uwch, TGAU neu gymwysterau eraill yn “Confirmation” neu Gadarnhad.

Rydyn ni’n derbyn y rhan fwyaf o’r cymwysterau poblogaidd yn uniongyrchol drwy UCAS.

Gallwch ddod o hyd i restr o’r canlyniadau arholiadau a dderbyniwn yn uniongyrchol gan UCAS ar wefan UCAS - gwiriwch y rhestr, ac os nad yw’r cymhwyster rydych yn ei astudio wedi’i restru, bydd angen i chi anfon y canlyniadau atom cyn gynted ag y byddwch yn eu cael. Anfonwch PDF neu lun clir, darllenadwy i admissions@swansea.ac.uk, a bydd ein Tîm Derbyniadau yn ei drin cyn gynted â phosibl.

Canllawiau Defnyddiol ar gyfer Diwrnod Canlyniadau

Byddwch ar Gael a Gwiriwch eich E-bost

Mae'n rhaid i chi fod ar gael pan gyhoeddir y canlyniadau. Mae'n bosib y bydd rhaid i chi wneud penderfyniadau cyflym, ac efallai anodd, am eich dyfodol, felly byddwch yn barod i siarad â phrifysgolion a cholegau eich hun a pheidiwch â gadael hyn i rywun arall.

Byddwn yn anfon e-bost atoch ar fore Diwrnod Canlyniadau Safon Uwch i roi gwybod i chi a ydych wedi sicrhau eich lle, neu a ydym yn dal i ystyried eich cais. Byddwn hefyd yn rhoi gwybod i chi os ydym yn dal i aros am ganlyniadau cymwysterau gennych, neu os oes gennych amodau eraill i’w bodloni. Er eich lles chi, mae’n bwysig iawn eich bod yn anfon unrhyw wybodaeth sy’n dal ar goll atom i osgoi oedi wrth ddyrannu eich lle a’ch llety.

Gwiriwch Statws eich Cais

Gallwch wirio statws eich cais ar fore canlyniadau Safon Uwch ar eich Hwb UCAS.

Byddwn hefyd yn eich e-bostio cyn diwrnod y canlyniadau gyda manylion am sut i fewngofnodi i'n system gadarnhau i wirio statws eich cais - bydd hyn hefyd yn darparu manylion unrhyw gamau gweithredu mae angen i chi eu cymryd.

Os Byddwch yn Bodloni Telerau Eich Cynnig Amodol

Os oes gennych gynnig cadarn amodol gennym ac rydych yn bodloni’r gofynion, byddwch yn cael eich derbyn yn awtomatig i'ch rhaglen (bydd eich statws yn newid i Gadarn Diamod). Peidiwch â ffonio'r Brifysgol oni bai eich bod wedi edrych ar statws eich cynnig ar-lein yn gyntaf. Byddwn yn anfon gwybodaeth atoch yn eich croesawu i'r Brifysgol yn ystod yr wythnosau canlynol a bydd ar gael ar-lein.

Os Nad Ydych yn Bodloni Telerau Eich Cynnig

Os na chawsoch y graddau a ofynnwyd gennym yn eich arholiadau, byddwn yn ailystyried ein cynnig yng ngoleuni eich perfformiad gwirioneddol a pherfformiad eraill sy’n ceisio mynediad i’r un rhaglen.

Mewn rhai achosion, efallai y byddwn yn dal i allu eich derbyn neu gynnig lle i chi ar raglen amgen. Byddwn yn anfon e-bost atoch ar Ddiwrnod y Canlyniadau i roi gwybod i chi os ydych yn dod o dan y categori hwn. Ein nod yw gwneud penderfyniad ar achosion ar y ffin o fewn 48 awr i Ddiwrnod y Canlyniadau.

Os Byddwch yn Derbyn 'Cynnig Newid Cwrs'

Mae hyn yn golygu nad oedd modd i ni gadarnhau eich lle ar eich cwrs gwreiddiol gan na wnaethoch fodloni’r amodau gwreiddiol, ond rydym yn fodlon cynnig lle i chi ar gwrs gwahanol.

Gallwch ddewis derbyn neu wrthod y cynnig. Mae'n rhaid i chi ymateb ar UCAS - os oes gennych ddewis wrth gefn, gallwch ymateb ar ôl cael penderfyniad gan eich dewisiadau cadarn ac wrth gefn. Dim ond pum niwrnod sydd gennych i ateb i gynnig am gwrs sydd wedi'i newid ond dylech wneud hyn cyn gynted â phosib, oherwydd gall unrhyw oedi effeithio ar eich gallu i sicrhau llety.

Cwestiynau Cyffredin

Dyma atebion i rai o'r cwestiynau mwyaf cyffredin am sefyllfaoedd go iawn sy'n codi ar ddiwrnod y canlyniadau:

Pryd Byddaf yn Clywed am fy Llety?

Ni fydd y Tîm Llety yn cadarnhau eich dyraniad llety nes bod eich lle wedi dod yn ddiamod. I’r rhan fwyaf o fyfyrwyr, dylech ddisgwyl derbyn cynnig o lety Prifysgol o fewn 24 awr ar ôl Diwrnod y Canlyniadau.

Ydw i'n Gymwys i Gael Unrhyw Ysgoloriaethau?

Os ydych chi'n ennill AAA neu AAB ar Safon Uwch neu gyfwerth, efallai y byddwch yn gymwys i gael ysgoloriaeth oherwydd eich perfformiad academaidd cryf. Byddwn yn ysgrifennu atoch am hyn ar ôl diwrnod canlyniadau Safon Uwch.

Nid yw ysgoloriaethau yn berthnasol i bob cwrs, fodd bynnag, a gallwch weld rhagor o wybodaeth ar ein tudalennau Ysgoloriaethau a Bwrsariaethau.