Cymrodoriaeth Arweinwyr y Dyfodol UKRI - Rownd 11

Mae Prifysgol Abertawe'n awyddus i gefnogi dawn ragorol sy'n datblygu mewn gwahanol feysydd ymchwil cyffrous. Disgwylir i   Rownd 11 Cymrodoriaeth Arweinwyr y Dyfodol UKRI agor ar 2 Chwefror 2026, a dyddiad cau UKRI fydd 16 Mehefin 2026. Mae'n cynnig cymorth hirdymor a hyblyg, gan gynnwys cyflog y cymrawd a chostau ymchwil, staff a hyfforddiant, yn ogystal â'r cyfle i gael swydd academaidd barhaol ar ôl cwblhau'r gymrodoriaeth yn llwyddiannus. Oherwydd natur hynod gystadleuol y cymrodoriaethau hyn a therfyn ar nifer y ceisiadau llawn y caiff pob sefydliad eu cyflwyno, mae'r Brifysgol yn cynnal galwad am Fynegiannau o Ddiddordeb gan aelodau staff mewnol ac allanol. 

Y dyddiad cau ar gyfer Mynegi Diddordeb yw 16 Ionawr 2026 (10:00).

Amcanion Cynllun Cymrodoriaeth Arweinwyr y Dyfodol yw:

Datblygu, cadw, denu a chynnal doniau ymchwil ac arloesi yn y DU:

• Meithrin llwybrau gyrfa ymchwil ac arloesi newydd gan gynnwys y rhai hynny sydd ar y ffiniau rhwng y byd academaidd/byd busnes a'r ffiniau rhyngddisgyblaethol, a hwyluso cyfleoedd i bobl symud rhwng sectorau
• Darparu cyllid ac adnoddau parhaus ar gyfer yr ymchwilwyr gyrfa gynnar a’r arloeswyr gorau
• Darparu cyllid hirdymor a hyblyg i fynd i'r afael â heriau anodd a newydd, a chefnogi rhaglenni anturus ac uchelgeisiol.

Beth mae'r Gymrodoriaeth yn ei gynnig

Buddsoddiad i gefnogi cymrodorion dros bedair blynedd, a'r gallu i estyn hynny hyd at saith mlynedd, a fydd yn galluogi'r genhedlaeth nesaf o ymchwilwyr ac arloeswyr i elwa o gymorth rhagorol i feithrin eu gyrfaoedd a gweithio ar heriau anodd a newydd.

Mae cynllun Cymrodoriaeth Arweinwyr y Dyfodol eisoes wedi ariannu cymrodoriaethau gwerth rhwng £300,000 a thros £2 filiwn, er nad oes terfynau isaf nac uchaf ac nid yw'n rhoi blaenoriaeth i geisiadau ar sail cost isel na chost uchel. Mae’r cyllid a gynigir yn hirdymor ac yn hyblyg, gyda saith mlynedd o gymorth ar gael ar fodel 4 (+3).

Mae UKRI yn croesawu ceisiadau gan ymgeiswyr o lwybrau gyrfa amrywiol, gan gynnwys y rhai sy'n dychwelyd ar ôl seibiant gyrfa neu'n dilyn amser mewn rolau eraill. Mae UKRI hefyd yn cynnig cymorth ychwanegol i ymgeiswyr y mae angen addasiadau rhesymol arnynt i ddatblygu eu cais, os cânt eu dewis gan y sefydliad lletyol i gyflwyno cais.   
Rydym yn croesawu’n arbennig ddatganiadau o ddiddordeb gan ymchwilwyr sy’n gweithio ar hyn o bryd o fewn sectorau eraill sy’n edrych i bontio i’r byd academaidd.

Bydd Prifysgol Abertawe'n cynnig cymorth ychwanegol sylweddol i gefnogi ymgeiswyr llwyddiannus, gan gynnwys

• Pecyn cymorth pwrpasol wedi'i deilwra i chi a'ch prosiect,
• Mentora a chymorth gan y Gyfadran a'r Gwasanaethau Proffesiynol, e.e. cymorth i ysgrifennu cais trwy gydol y broses gyfan o lunio eich cynnig 
• Llwybr gyrfa i swydd barhaol fel Uwch-ddarlithydd ar ddiwedd y Gymrodoriaeth, ynghyd â
• Mentora a datblygu gyrfa parhaus drwy gydol eich cymrodoriaeth

Rhaid i ymgeiswyr fod â chefnogaeth a gymeradwywyd gan yr adran letyol a rhaid iddynt ddangos tystiolaeth o hyn mewn datganiad cefnogi cymrodoriaeth fel rhan o'r ffurflen gais Mynegiant o Ddiddordeb.

Cymhwysedd:

Mae'r cymrodoriaethau hyn ar gyfer academyddion gyrfa gynnar ac arloeswyr sy'n pontio i fod yn annibynnol neu'n sefydlu hynny. Dylai ymgeiswyr ddefnyddio'r Fanyleb Person yn y canllawiau i'r alwad - Atodiad A - i asesu a chyfiawnhau eu haddasrwydd am y cynllun gan gyfeirio at amcanion y rhaglen. 

Disgwylir i ymgeiswyr feddu ar ddoethuriaeth erbyn dyddiad dechrau'r gymrodoriaeth NEU allu dangos profiad cyfwerth o ymchwil/arloesi a/neu hyfforddiant.   Nid oes rheolau cymhwysedd sy'n seiliedig ar flynyddoedd ers ennill PhD, neu a yw'r ymgeisydd yn meddu ar swydd neu rôl academaidd barhaol/benagored ar hyn o bryd. Serch hynny, dylai ymgeiswyr sydd â swydd barhaol:

• Ddangos nad yw eu swydd bresennol yn dangos eu bod wedi cyflawni annibyniaeth mewn ymchwil/arloesi ac arweinyddiaeth feddwl
• Rhoi rhesymeg eglur pam byddai Cymrodoriaeth Arweinwyr y Dyfodol yn wahanol i'w rôl bresennol.  
• Datgan yn eglur y byddai eu holl amser gwaith sydd wedi’i gynnwys yng nghyllideb y Gymrodoriaeth yn cael ei glustnodi ar gyfer y Gymrodoriaeth honno er mwyn canolbwyntio ar ymchwil/arloesi, a'i warchod rhag ymrwymiadau proffesiynol eraill.
• Dangos mai Cymrodoriaeth Arweinwyr y Dyfodol fyddai'r ffordd orau o ategu eu nodau gyrfa hirdymor a'r llwybr gyrfa o'u dewis.   Ni fydd ymgeiswyr yn gymwys am gymrodoriaeth os byddant eisoes wedi cyflawni annibyniaeth ymchwil/arloesi (er enghraifft, drwy sicrhau cyllid ar gyfer y cam gyrfa hwn). 

Ni chaniateir ceisiadau gan uwch-academyddion nac uwch-arloeswyr.

Pam dewis Prifysgol Abertawe?

Yn asesiad diweddaraf Fframwaith Rhagoriaeth Ymchwil 2021, dyfarnwyd bod 86% o ymchwil gyffredinol y Brifysgol yn ymchwil sy'n arwain y byd neu'n rhagorol yn rhyngwladol - i fyny o 80% yn yr ymarfer REF blaenorol yn 2014. Gellir dod o hyd i uchafbwyntiau ymchwil Prifysgol Abertawe yma. 

Rydyn ni'n parhau i gael ein cydnabod am effaith ein hymchwil sy'n gwneud gwahaniaeth gwirioneddol, cadarnhaol i fywydau pobl ledled y byd. Mae 86% o'n hymchwil, a ddyfarnwyd gan banel o arbenigwyr REF, yn cael effaith eithriadol a sylweddol iawn o ran cyrhaeddiad ac arwyddocâd, ar lefel leol, ranbarthol a byd-eang.

Ystyrir bod 91% o'n hamgylchedd ymchwil yn arwain y byd ac yn ardderchog yn rhyngwladol (sef cynnydd o 6% ers ymarfer REF 2014).   Mae hyn yn atgyfnerthu bod Prifysgol Abertawe'n amgylchedd rhagorol i gynnal ymchwil fel myfyriwr neu academydd, a bod ein hymchwil yn gwneud gwahaniaeth gwirioneddol yn y byd.

Rydym yn gweithio gyda phartneriaid a chydweithwyr ar draws y byd. Mae ein hymchwil yn cyflawni effaith economaidd a chymdeithasol sylweddol, barhaus a gwerthfawr yng Nghymru, yn y DU ac yn rhyngwladol. Mae Prifysgol Abertawe wedi ymrwymo i ddarparu amgylchedd diogel a chynhwysol sy'n gwella amrywiaeth ac yn galluogi holl gymuned y Brifysgol i gyflawni ei photensial. Adlewyrchir hyn wrth i'r Brifysgol dderbyn nifer o siarteri sy'n gysylltiedig â chydraddoldeb, gan gynnwys dyfarniad Arian Athena SWAN ar lefel y Brifysgol (rhywedd) a safle ymysg y 50 prifysgol orau ym Mynegai Cydraddoldeb yn y Gweithle Stonewall. Felly, rydym wedi ymrwymo i sicrhau bod pob ymgeisydd, beth bynnag ei hil, ei ryw, ei rywioldeb neu ei allu, yn cael cymorth llawn drwy gydol y broses ymgeisio.

Ac fel y nodir uchod, bydd Prifysgol Abertawe yn cynnig cymorth ychwanegol sylweddol i ymgeiswyr llwyddiannus. 

Sut i gyflwyno cais:

Bellach, croesewir mynegiannau o ddiddordeb gan ymgeiswyr sydd am gael eu cefnogi gan Brifysgol Abertawe. Mae hyn yn berthnasol i ymgeiswyr mewnol ac allanol.

Y dyddiad cau ar gyfer Mynegi Diddordeb yw 16 Ionawr 2026 (10:00).

I ddechrau dylai unigolion gadarnhau bod eu hymchwil yn cyd-fynd â'r Strategaeth Ymchwil ac Arloesii ac uchelgeisiau ymchwil y Cyfadrannau - archwiliwch ein hymchwil yma.  Defnyddir proses ddethol dryloyw a chynhwysol i sicrhau bod Prifysgol Abertawe'n dewis yr ymgeiswyr gorau i'w cefnogi hyd at y cam cais llawn. Bydd hyn yn cynnwys panel adolygu mewnol yn craffu ar fynegiant o ddiddordeb drafft, CV ac allbynnau pob ymgeisydd. 

Cais

Newydd ar gyfer Rownd 11: Arweinwyr Clinigol y Dyfodol- Mae UKRI wedi cyhoeddi ei fod yn cryfhau cymorth i feddygon, deintyddion a gweithwyr gofal iechyd proffesiynol eraill ar gyfer y rownd hon. Byddant yn gallu dilyn gyrfaoedd ymchwil ochr yn ochr â'u hymarfer clinigol, yn enwedig yn y byd academaidd lle gall llwybrau gyrfa fod yn dameidiog. Am ragor o fanylion, gweler - https://www.ukri.org/news/mrc-nihr-and-cruk-enhance-support-for-clinical-research-leaders/ 

Rhaid i ymgeiswyr fod â chefnogaeth wedi'i chymeradwyo gan y Gyfadran letyol a rhaid darparu tystiolaeth o hyn drwy ddatganiad cefnogi cymrodoriaeth fel rhan o'r ffurflen gais Mynegiant o Ddiddordeb.  

Os oes gennych gwestiynau am y broses hon a'r cynllun ariannu, gweler ein Cwestiynau Cyffredin yma. Os nad yw'r Cwestiynau Cyffredin yn darparu'r wybodaeth y mae ei hangen arnoch, e-bostiwch ni yn fellowships@abertawe.ac.uk. 

Adnabod Talent

Mae proses ddethol Datganiad o Ddiddordeb Cymrodoriaethau Arweinwyr Clinigol y Dyfodol (FLF) wedi bod yn ffordd ardderchog i Brifysgol Abertawe nodi talent eithriadol nid yn unig ar gyfer rhaglen FLF, ond ar gyfer gwobrau cystadleuol a mawreddog eraill.Rydym wedi defnyddio proses ddethol fewnol FLF yn fwyfwy i nodi talent ar gyfer cynlluniau eraill ac yn disgwyl  gwneud hynny eto yn ystod proses ddethol FLF sydd ar ddod.Rydym wedi gweld canlyniadau cadarnhaol i ymgeiswyr mewn llawer o achosion lle rydym wedi mabwysiadu'r dull hwn.
 
Cofiwch, wrth gyflwyno Datganiad o Ddiddordeb, efallai y byddwn yn cynnig y cyfle i chi wneud cais am gynlluniau amgen neu ychwanegol, os cânt eu hystyried yn addas i chi, eich cam gyrfa a'ch ymchwil.Rhai enghreifftiau o ble mae ymgeiswyr wedi cael gwahoddiad i gyflwyno, yn ogystal â neu fel dewis arall i gynllun FLF:

• Gwobrau Datblygu Gyrfa Ymddiriedolaeth Wellcome
• Ymddiriedolaeth Leverhulme: Gwobr Ymchwil Arweinwyr 
• Grant Cychwyn neu Gydgrynhoi y Cyngor Ymchwil Ewropeaidd
• Cyfleoedd cymrodoriaeth eraill UKRI

Mae'r holl gynlluniau hyn wedi'u trefnu i gefnogi ymchwilwyr eithriadol sydd ar ddechrau neu yng nghanol eu gyrfa ond byddwn yn gweithio gydag ymgeiswyr unigol i gadarnhau eu bod yn gymwys ar gyfer  argymhellion cynlluniau amgen.