Prif Radiograffydd Ymchwil

Y Brifysgol

Mae Prifysgol Abertawe'n brifysgol a arweinir gan ymchwil sydd wedi bod yn gwneud gwahaniaeth ers 1920. Mae cymuned y Brifysgol yn ffynnu ar archwilio a darganfod ac mae'n cynnig y cydbwysedd cywir o addysgu ac ymchwil rhagorol i gyd-fynd ag ansawdd bywyd ardderchog.

Mae ein campysau glan môr a'n cymuned amlddiwylliannol yn gwneud y Brifysgol yn weithle dymunol i gydweithwyr o bedwar ban byd. Mae ein cydnabyddiaeth a'n buddion, a'n ffyrdd o weithio, yn galluogi i bobl sy'n ymuno â ni i gael gyrfaoedd gwobrwyol, ar y cyd â chydbwysedd gwaith-bywyd rhagorol.

Y rôl

Dyma gyfle cyffrous i ymuno â Chyfleuster Delweddu arloesol sy'n integreiddio delweddu clinigol uwch ag ymchwil effaith uchel a threialon clinigol. Yn y rôl hon, byddwch yn cyflwyno archwiliadau CT ac MRI o safon ar draws lleoliadau clinigol, ymchwil ac arbenigol, gan gynnwys MRI cardiaidd. Byddwch yn rhoi gofal rhagorol i gleifion, gwirfoddolwyr a chyfranogwyr mewn treialon clinigol - yn cynnwys gwaith sgrinio diogelwch, cynnig esboniadau clir, monitro yn ystod triniaethau a sicrhau rhyddhau diogel a chefnogol. Byddwch hefyd yn gosod caniwla IV ac yn gweinyddu cynhyrchion fferyllol lle bo'n briodol.

Bydd gennych rôl allweddol wrth gynnal a gwella ansawdd delweddau, gan nodi a lleihau arteffactau MRI a gweithio'n agos gyda ffisegwyr MRI ar brotocolau uwch megis cynllunio radiotherapi a sbectrosgopeg. Byddwch yn cysylltu â gwerthwyr sganwyr, yn cefnogi gwaith hyfforddi i ddefnyddio'r pethau hyn ac yn sicrhau bod cyfarpar ategol yn ddiogel ac yn addas i'r diben.

Byddwch yn helpu i reoli'r llif gwaith dyddiol, yn cefnogi prosesau sicrhau ansawdd ac yn sicrhau cydymffurfiaeth â Gweithdrefnau Gweithredu Safonol (SOPs), fframweithiau llywodraethiant a pholisïau diogelwch. 

Fel Person Cyfrifol MR ar gyfer MRI a Goruchwyliwr Amddiffyn Rhag Ymbelydredd ar gyfer CT, byddwch yn arwain ar ddiogelwch, yn cynnal Rheolau Lleol ac yn cyfrannu at ddiwylliant diogelwch cryf a rhagweithiol.

Mae'r rôl hefyd yn cynnwys llawer o gyfrifoldebau hyfforddi a datblygu. Byddwch yn cefnogi gwaith sefydlu, hyfforddi a phrosesau arfarnu staff; yn goruchwylio radiograffwyr iau, myfyrwyr a staff ymchwil; ac yn cynnal cyfathrebu effeithiol ar draws y cyfleuster a chyda chydweithredwyr allanol.

Gan weithio gydag ymchwilwyr o Brifysgol Abertawe, Bwrdd Iechyd Prifysgol Bae Abertawe a phartneriaid ehangach, byddwch yn cyfrannu at ddatblygu protocol, sicrhau dogfennaeth gywir, cefnogi delweddu treialon clinigol a chynorthwyo wrth sicrhau cyllid ymchwil allanol.

Mae'r rôl hon yn cynnig cyfle rhagorol i ddatblygu arbenigedd arbenigol wrth gyfrannu at ganlyniadau clinigol ac ymchwil llawn effaith mewn amgylchedd arloesol a chydweithredol.

Yn y rôl radiograffeg ddeinamig hon, byddwch yn defnyddio technoleg CT ac MRI flaenllaw - gan gynnwys meysydd arbenigol megis MRI cardiaidd - i gyflwyno delweddu rhagorol i gleifion, gwirfoddolwyr ymchwil a chyfranogwyr mewn treialon clinigol.   Bydd gennych ran allweddol wrth ddatblygu protocolau uwch, gwella ansawdd delweddu a chefnogi gwaith ymchwil arloesol ym Mhrifysgol Abertawe ac ym Mwrdd Iechyd Prifysgol Bae Abertawe.

Fel Person Cyfrifol MR a Goruchwyliwr Amddiffyn Rhag Ymbelydredd, byddwch yn arwain ar ddiogelwch, llywodraethiant ac arfer gorau, gan hyrwyddo diwylliant o ddiogelwch cadarnhaol ar draws y cyfleuster. Byddwch hefyd yn cefnogi hyfforddiant, yn mentora staff iau ac yn cydweithio â ffisegwyr, clinigwyr ac ymchwilwyr i ddatblygu delweddu.

Os ydych yn llawn ysgogiad, yn chwilfrydig ac yn barod i ehangu eich arbenigedd mewn amgylchedd ymchwil sy'n symud yn gyflym, dyma eich cyfle i greu effaith go iawn.

 

Cydraddoldeb, Amrywiaeth a Chynhwysiant

Mae'r Brifysgol yn ymrwymedig i gefnogi a hyrwyddo cydraddoldeb ac amrywiaeth yn ei holl arferion a gweithgareddau. Rydym yn ymdrechu i greu amgylchedd cynhwysol a chroesawn geisiadau gan ymgeiswyr amrywiol o'r grwpiau nodweddion gwarchodedig canlynol: oedran, anabledd, ailbennu rhywedd, priodas a phartneriaeth sifil, beichiogrwydd a mamolaeth, hil (gan gynnwys lliw croen, cenedligrwydd, tarddiad ethnig a chenedlaethol), crefydd a chred, rhyw, tueddfryd rhywiol.

Sgiliau Cymraeg

Lefel y sgiliau Cymraeg sydd ei hangen ar gyfer y rôl hon yw Lefel 1 - Ychydig. Bydd deiliad y swydd yn gallu ynganu geiriau Cymraeg, ateb y ffôn yn Gymraeg, a defnyddio geiriau ac ymadroddion sylfaenol bob dydd (diolch, os gwelwch yn dda). Gellir cyrraedd lefel 1 o gwblhau cwrs hyfforddi un awr.

Mae’r Brifysgol yn sefydliad dwyieithog balch, ac mae Strategaeth Gymraeg y Brifysgol yn amlinellu ein dyheadau i hyrwyddo’r iaith a galluogi ein staff i ddod i gyswllt â’r iaith fel sgil ychwanegol yn y gweithle ac fel porth i gyfleoedd diwylliannol a chymdeithasol newydd. Croesewir ceisiadau yn y Gymraeg ac ni chaiff cais a gyflwynir yn y Gymraeg ei drin yn llai ffafriol na chais a gyflwynir yn Saesneg. Mae gan siaradwyr Cymraeg yr hawl i gael cyfweliad yn Gymraeg. Disgwylir i ymgeiswyr ar gyfer rôl lle mae sgiliau Cymraeg yn hanfodol gyflwyno’u cais yn Gymraeg, a bydd y cyfweliad yn Gymraeg, os byddwch yn cyrraedd y rhestr fer.

Gwybodaeth Ychwanegol

Gallwch gyflwyno CV a llythyr eglurhaol ar gyfer y swydd hon.

Nodwch eich rhif cofrestru HCPC yn y cais.

Rhaid darparu gwiriad DBS boddhaol (gwiriad uwch gyda gwiriad o restrau gwahardd oedolion a phlant) cyn y gellir cadarnhau dyddiad dechrau.

Rhannu Lawrlwytho Disgrifiad Swydd Argraffu'r dudalen hon Yn ôl at y rhestr