Mae Dr Gemma Morgan, Uwch Ddarlithydd mewn Troseddeg wedi ennill Ysgoloriaeth Fulbright ar gyfer 2023, sy'n cael ei hystyried fel y rhaglenni ysgolheictod mwyaf mawreddog a dethol sy'n gweithredu'n fyd-eang.
Bydd yr Ysgoloriaeth yn ei galluogi i ddatblygu ei hymchwil arloesol yn y Ganolfan Hyrwyddo Rhagoriaeth Cywirol ym Mhrifysgol George Mason, Virginia. Dewisir cyfranogwyr Rhaglen Fulbright am eu rhagoriaeth academaidd, gweithgareddau cymunedol a'u potensial i arwain – a chynigir cyfle iddynt astudio, addysgu a chynnal ymchwil o dan y cynllun.
Mae'r wobr wedi'i rhoi i Dr Morgan am ddatblygu ap unigryw sy'n ceisio cefnogi'r rhai sy'n gadael carchar i roi'r gorau i droseddu yn y DU ac UDA.
Mae'r ap My Journey, a grëwyd ar y cyd â Labordy Arloesi Cyfreithiol Cymru a Include UK, yn ap ar y we sy'n cefnogi'r rhai sy'n gadael carchar i ailintegreiddio i gymdeithas trwy eu galluogi nhw a gweithwyr cyfiawnder troseddol proffesiynol i nodi eu hanghenion, cael mynediad at gymorth wedi'i deilwra a'u cysylltu â chymorth arbenigol yn y gymuned.
Mae'r ap eisoes wedi'i wreiddio o fewn Include UK ac mae'n cael ei dreialu gyda'r rhai sy'n gadael carchar yn Ne Cymru - mae Dr Morgan bellach yn gobeithio mynd â'i hymchwil i gynulleidfa ryngwladol.
Roedd gan Gemma hyn i'w ddweud am yr Ysgoloriaeth:
"Rwyf wrth fy modd fy mod wedi ennill Ysgoloriaeth Fulbright. Mae'n anrhydedd anhygoel, ac rwy'n hynod ddiolchgar i Gomisiwn Fulbright am y cyfle hwn. Mae ymrwymiad Fulbright i feithrin cydweithredu byd-eang a hyrwyddo newid cadarnhaol yn cyd-fynd yn berffaith â'm dyheadau a'm hymchwil.
Rwy'n edrych ymlaen at weithio gyda'r Ganolfan Hyrwyddo Rhagoriaeth Cywirol (ACE!) ym Mhrifysgol George Mason a chymryd rhan mewn ymchwil ystyrlon a fydd yn cael effaith bendant ar y byd. Rwy'n gobeithio y bydd hyn yn ddechrau partneriaeth hirdymor a fydd yn helpu i leihau aildroseddu a chefnogi canlyniadau cadarnhaol i bobl yn y cyfiawnder troseddol yn y DU, yr Unol Daleithiau ac yn fyd-eang."
Yn gyn-enillydd gwobr Seren Rising ym Mhrifysgol Abertawe ar gyfer 2022 ac yn rownd derfynol Gwobrau y Gynghrair Cyfiawnder Troseddol am 'Unigolyn Eithriadol', mae gwaith Dr Morgan yn ceisio deall a chefnogi profiadau'r rhai sy'n gadael carchar.
Dywedodd yr Athro Ryan Murphy, Deon Gweithredol a Dirprwy Is-Ganghellor Cyfadran y Dyniaethau a'r Gwyddorau Cymdeithasol:
"Mae ymchwil a chyflawniadau rhyfeddol Gemma yn destun balchder mawr i'r Adran Troseddeg, Cymdeithaseg a Pholisi Cymdeithasol, a Chyfadran y Dyniaethau a'r Gwyddorau Cymdeithasol yn ehangach.
Mae ei dull cydweithredol o ymchwilio – ar ôl ymgysylltu â sefydliadau lleol a chenedlaethol fel Include UK – yn crynhoi ein hethos yn y gyfadran. Credwn fod ymchwil i'r dyniaethau a'r gwyddorau cymdeithasol gryfaf o'i gynnal mewn cydweithrediad ag adrannau a sefydliadau academaidd eraill, gan sicrhau bod ein hymchwil yn cael effaith yn y byd go iawn, hirdymor i gymunedau."
Mae rhagor o wybodaeth am Dr Gemma Morgan ac ysgolheigion eraill Fulbright ar gyfer 2023, ar gael yma: https://fulbright.org.uk/our-community/meet-our-fulbrighters/