Ymchwil ac Arloesi 2026 - dathliad o gydweithrediadau a phartneriaethau

Gan archwilio themâu rhyng-gysylltiedig iechyd, lles ac arloesedd ar draws y cylch bywyd, bydd y sesiynau'n rhoi pwyslais ar bwysigrwydd cydweithio rhwng ymchwilwyr academaidd, partneriaid y GIG, a byd diwydiant wrth fynd i'r afael â heriau allweddol, gan gynnwys heneiddio’n iach, diagnosteg uwch, a gwella canlyniadau iechyd meddwl.

Trwy integreiddio ymchwil arloesol ag arbenigedd clinigol a datblygiad technolegol, byddwn yn amlygu sut gall canfod yn gynnar, gofal personol, a dulliau ataliol wella lles corfforol a meddyliol. Bydd yn arddangos sut mae partneriaethau ar draws sectorau'n cyflymu'r gwaith o drosi darganfyddiad yn ymarfer, gan arwain at ymyriadau mwy effeithiol a phrofiadau gwell i gleifion.

Trwy'r cydweithrediadau hyn, rydym yn dangos ymrwymiad a rennir i gefnogi bywydau iachach a hirach, a meithrin cymunedau mwy gwydn ac iach.

Gan ganolbwyntio ar arddangos sut mae arloesi a arweinir gan ymchwil yn galluogi'r trawsnewidiad i ddiwydiannau carbon isel, gwerth uchel, sy'n gystadleuol yn fyd-eang, bydd y sesiwn yn amlygu cydweithrediadau hirdymor, strategol Prifysgol Abertawe â byd diwydiant, cadwyn gyflenwi sy'n tyfu, a rhwydwaith o gwmnïau  deunyddiau lled-ddargludyddion uwch ac electroneg pŵer i dechnolegau hydrogen, adnewyddadwy a systemau ynni gwasgaredig, ac adeiladau sy'n creu ynni'n effeithlon. Mae ein partneriaethau'n sail i ymchwil sy'n mynd i'r afael â heriau datgarboneiddio diwydiannol, trydaneiddio, galw am ynni deallusrwydd artiffisial, digideiddio, ac effeithlonrwydd ynni yn uniongyrchol, gan alinio â Sero Net Cymru a blaenoriaethau cenedlaethol.

Beth sy’n gwneud i le deimlo fel cartref? Mae'r sesiynau hyn yn dathlu'r bobl, y lleoedd, yr hanes a'r diwylliannau sy'n creu'r bobl rydym ni, wrth archwilio sut gall y cryfderau hyn helpu i greu dyfodol gwell. Trwy gymysgedd bywiog o sgyrsiau gwib, cyflwyniadau a thrafodaethau prosiect, byddwn yn trafod materion sy'n bwysig mewn sawl lleoliad gwahanol - diogelwch ar-lein, strydoedd mwy diogel, ac ymddygiad pleidleisio i amddiffyn yr amgylchedd, treftadaeth leol a darganfyddiadau sy'n dod â'r gorffennol yn fyw. Byddant hefyd yn amlygu gwaith cydweithredol gydag amrywiaeth eang o bartneriaid, gan ddangos sut gall ymchwil gefnogi cymunedau cryfach, gwell ymdeimlad o berthyn a chysylltiadau mwy cyfoethog â'r byd o'n cwmpas.

Mae nifer cynyddol o ysgolheigion a newyddiadurwyr yn disgrifio'r foment hanesyddol hon fel "polygreisis". Y syniad yw ein bod ni'n wynebu sawl her sylweddol ar yr un pryd sy'n ymwneud â newid yn yr hinsawdd, ansefydlogrwydd geo-wleidyddol, marweiddio economaidd, a newid technolegol sydd oll yn bygwth lles dynol. Ond wrth fynd ymhellach, mae'r polygreisis yn awgrymu bod yr heriau hyn yn croesi mewn ffyrdd peryglus, a hefyd efallai'n atgyfnerthu ei gilydd mewn dolen adborth sy'n gwaethygu. Un o effeithiau'r gyfres hon o argyfyngau sy’n croesi yw’r ymdeimlad cynyddol o gymhlethdod ac ansicrwydd mewn systemau cymdeithasol, gwleidyddol a bioffisegol. Un peth sy'n ymddangos yn sicr yw na fydd modd dod o hyd i unrhyw le ar y ddaear na fydd yn cael ei effeithio gan yr heriau newydd hyn.

Yn ogystal â thrafod sut mae'r polygreisis yn effeithio ar ein rhanbarth lleol, nod y sesiynau hyn yw ystyried, os nad dathlu, sut mae datrysiadau sy’n croesi, yn rhyngddisgyblaethol, ac yn gydweithredol yn gwneud gwahaniaeth wrth adeiladu Cymru wydn ar gyfer y dyfodol. Mewn geiriau eraill, ein nod yw amlygu'r problemau sy’n hunan-atgyfnerthu, ond hefyd y ffyrdd y gall datrysiadau cydweithredol atgyfnerthu ei gilydd.