Cynorthwyydd Ymchwil / Swyddog Ymchwil (SOLACE)

Y Brifysgol

Mae Prifysgol Abertawe'n brifysgol a arweinir gan ymchwil sydd wedi bod yn gwneud gwahaniaeth ers 1920. Mae cymuned y Brifysgol yn ffynnu ar archwilio a darganfod ac mae'n cynnig y cydbwysedd cywir o addysgu ac ymchwil rhagorol i gyd-fynd ag ansawdd bywyd ardderchog.

Mae ein campysau glan môr a'n cymuned amlddiwylliannol yn gwneud y Brifysgol yn weithle dymunol i gydweithwyr o bedwar ban byd. Mae ein cydnabyddiaeth a'n buddion, a'n ffyrdd o weithio, yn galluogi i bobl sy'n ymuno â ni i gael gyrfaoedd gwobrwyol, ar y cyd â chydbwysedd gwaith-bywyd rhagorol.

Y rôl

Mae hwn yn gyfle cyffrous i ymchwilydd uchelgeisiol helpu i ddatblygu’r genhedlaeth nesaf o dechnoleg ffotofoltäig drwy raglen SOLACE a ariennir gan UKRI. Gan weithio fel rhan o dîm ymchwil hynod ryngwladol, byddwch yn helpu i ddatblygu celloedd solar tandem holl-berofsgit effeithlonrwydd uchel sydd wedi’u prosesu’n gyfan gwbl o doddiant. Bydd y gwaith yn cyfuno dealltwriaeth sylfaenol o ddeunyddiau a pherfformiad dyfeisiau â dulliau y gellir eu trosglwyddo yn y pen draw i weithgynhyrchu graddadwy.

Bydd deiliad y swydd yn defnyddio dulliau nodweddu ffotoffisegol ac optoelectronig uwch i ganfod y mecanweithiau sy’n cyfyngu ar berfformiad dyfeisiau, ac yn defnyddio’r mewnwelediadau hyn i lywio datblygiad deunyddiau, rhyngwynebau a chelloedd solar tandem gwell. Bydd y technegau’n cynnwys ffotolymwelliant cyflwr sefydlog ac wedi’i ddatrys yn ôl amser, cynnyrch cwantwm ffotolymwelliant, electrolymwelliant a dargludedd microdon wedi’i ddatrys yn ôl amser, ynghyd â dadansoddiad meintiol o ailgyfuniad a chludiant gwefr.

Uchelgais allweddol y rôl yw trosglwyddo’r ddealltwriaeth hon y tu hwnt i ddyfeisiau ar raddfa labordy. Bydd yr ymgeisydd llwyddiannus yn helpu i ddatblygu dulliau prosesu o doddiant sy’n berthnasol i ddiwydiant, gan gynnwys cotio slot-dei, cotio â llafn, argraffu sgrin a chwistrellu, gyda ffocws ar atgynyrchioldeb, graddadwyedd a’r gallu i weithgynhyrchu.

Byddwch yn ymuno ag amgylchedd ymchwil ffotofoltäig hynod gydweithredol sydd â chysylltiadau rhyngwladol ym Mhrifysgol Abertawe, gan weithio ochr yn ochr â thimau sy’n weithgar ym maes technolegau solar cenhedlaeth nesaf, gweithgynhyrchu cynaliadwy a thrawsnewid mynediad at ynni. Mae’r rôl yn cynnwys cydweithio agos â phartneriaid yn Kenya, Rwanda a Tanzania, gan gynnwys cyfnewidiadau ymchwilwyr a gweithgareddau hyfforddi, ac mae’n cyfrannu at waith ehangach Cadair UNESCO Prifysgol Abertawe mewn Technolegau Ynni Cynaliadwy.

Bydd yr ymgeisydd llwyddiannus yn cael cefnogaeth i ddatblygu ei broffil ymchwil drwy gyhoeddiadau, cydweithio rhyngwladol, goruchwylio ôl-raddedigion a gweithgareddau ymchwil yn y dyfodol. Rydym yn croesawu’n arbennig geisiadau gan ymgeiswyr sydd ag arbenigedd mewn nodweddu uwch, ffotofoltäeg neu ddyfeisiau lled-ddargludyddion wedi’u prosesu o doddiant. Nid oes disgwyl profiad o bob techneg.

Cydraddoldeb, Amrywiaeth a Chynhwysiant

Mae'r Brifysgol yn ymrwymedig i gefnogi a hyrwyddo cydraddoldeb ac amrywiaeth yn ei holl arferion a gweithgareddau. Rydym yn ymdrechu i greu amgylchedd cynhwysol a chroesawn geisiadau gan ymgeiswyr amrywiol o'r grwpiau nodweddion gwarchodedig canlynol: oedran, anabledd, ailbennu rhywedd, priodas a phartneriaeth sifil, beichiogrwydd a mamolaeth, hil (gan gynnwys lliw croen, cenedligrwydd, tarddiad ethnig a chenedlaethol), crefydd a chred, rhyw, tueddfryd rhywiol.

Sgiliau Cymraeg

Lefel y sgiliau Cymraeg sydd ei hangen ar gyfer y rôl hon yw Lefel 1 - Ychydig. Bydd deiliad y swydd yn gallu ynganu geiriau Cymraeg, ateb y ffôn yn Gymraeg, a defnyddio geiriau ac ymadroddion sylfaenol bob dydd (diolch, os gwelwch yn dda). Gellir cyrraedd lefel 1 o gwblhau cwrs hyfforddi un awr.

Mae’r Brifysgol yn sefydliad dwyieithog balch, ac mae Strategaeth Gymraeg y Brifysgol yn amlinellu ein dyheadau i hyrwyddo’r iaith a galluogi ein staff i ddod i gyswllt â’r iaith fel sgil ychwanegol yn y gweithle ac fel porth i gyfleoedd diwylliannol a chymdeithasol newydd. Croesewir ceisiadau yn y Gymraeg ac ni chaiff cais a gyflwynir yn y Gymraeg ei drin yn llai ffafriol na chais a gyflwynir yn Saesneg. Mae gan siaradwyr Cymraeg yr hawl i gael cyfweliad yn Gymraeg. Disgwylir i ymgeiswyr ar gyfer rôl lle mae sgiliau Cymraeg yn hanfodol gyflwyno’u cais yn Gymraeg, a bydd y cyfweliad yn Gymraeg, os byddwch yn cyrraedd y rhestr fer.

Gwybodaeth Ychwanegol

Gallwch gyflwyno CV a llythyr eglurhaol ar gyfer y swydd hon.

Nid oes angen tystysgrif DBS foddhaol ar gyfer y rôl hon.

Mae’r rôl hon yn cynnwys teithio rhyngwladol i sefydliadau partner yn Kenya, Rwanda a Tanzania. Dylai ymgeiswyr fod yn fodlon ac yn gallu teithio’n rhyngwladol fel rhan o weithgareddau meithrin gallu a hyfforddi’r prosiect.

Ymholiadau anffurfiol: Yr Athro Matthew Davies, m.l.davies@swansea.ac.uk, neu’r Athro Trystan Watson, T.M.Watson@Swansea.ac.uk

Rhannu Lawrlwytho Logo UKRI Lawrlwytho Disgrifiad Swydd Argraffu'r dudalen hon Yn ôl at y rhestr