Gadewch rodd yn eich Ewyllys i Brifysgol Abertawe

I gofio’r Brifysgol yn eich Ewyllys, bydd angen rhif a chyfeiriad cofrestredig yr elusen arnoch:

Cyfeiriad elusen a rhif elusen gofrestredig

Cyfeiriad: Prifysgol Abertawe, Parc Singleton, Abertawe SA2 8PP, Cymru

Rhif Elusen Gofrestredig: Rhif 1138342

Diffinio sut caiff eich Cymynrodd ei Defnyddio

Drwy addo i gefnogi'r Angen Mwyaf, bydd gan y Brifysgol ragor o hyblygrwydd i ddefnyddio'ch rhodd lle caiff yr effaith fwyaf ar yr adeg honno. Neu bydd rhai buddiolwyr yn dewis rhoi rhodd i Brifysgol Abertawe at ddiben penodol neu bydd ganddynt faes penodol yr hoffent ei gefnogi. Yn yr achos hwn, gallwch ddewis ysgrifennu Llythyr Dymuniadau i fynd gyda'ch ewyllys. Mae hyn yn golygu wrth i amgylchiadau newid dros amser, gall y Brifysgol barhau i ddefnyddio'r rhodd i gefnogi'r Brifysgol, ac ym mhob achos gwnawn ein gorau i anrhydeddu'ch dymuniadau.

Cymal Pwysig - ar gyfer pob math o Gymynrodd, mae'n bwysig y caiff y cymal canlynol ei gynnwys yn yr ewyllys: 'Rwyf yn datgan y bydd derbyniad y sawl sy'n honni mai ef/hi yw Cyfarwyddwr Cyllid neu Drysorydd neu swyddog priodol arall y Brifysgol ar y pryd, yn rhyddhad digonol i'm (Hymddiriedolwyr) (Hysgutorion). Rwyf yn datgan ymhellach fel a ganlyn: os, cyn fy marwolaeth (neu ar ôl fy marwolaeth ond cyn bod fy (Ymddiriedolwyr) (Ysgutorion) wedi rhoi'r rhodd dan sylw ar waith) bydd unrhyw gorff elusennol neu gorff arall y rhoddir rhodd iddo yn yr ewyllys hon, sef fy ewyllys i, yn newid ei enw neu’n cyfuno â chorff arall neu’n trosglwyddo ei holl asedau i gorff arall yna bydd fy (Ymddiriedolwyr) (Ysgutorion) yn rhoi’r rhodd hon ar waith fel pe bai wedi'i gwneud (yn yr achos cyntaf) i'r corff o dan ei enw newydd (neu yn yr ail achos) i'r corff sy'n deillio o'r fath gyfuno neu y trosglwyddwyd yr asedau iddo.'

Rhodd Ariannol o unrhyw faint (Ariannol) 
Yn gyffredinol dyma'r gymynrodd symlaf. Mae'n caniatáu i chi adael swm penodol o arian i fuddiolwr penodol. Gall y rhodd fod yn swm penodol nad yw'n newid dros amser, neu gallwch gyfarwyddo'ch ymddiriedolwyr i ystyried effaith chwyddiant.

Unrhyw gyfran neu ganran neu ffracsiwn o ystad (Gweddilliol)
Mae rhodd weddilliol yn cyfeirio at rodd sy'n berthnasol i werth gweddilliol eich ystad pan fydd yr holl ddyledion, ffioedd ac unrhyw gymynroddion ariannol wedi'u talu. Gallwch ddewis rhoi'r holl ystad weddilliol neu ganran ohoni i un unigolyn neu sefydliad, neu gallwch ddewis rhannu'r ystad weddilliol rhwng nifer o fuddiolwyr.

Rhodd Anariannol
Yn ogystal â rhoddion ariannol, gellir gadael cymynroddion anariannol i'r Brifysgol, er enghraifft, eiddo, stociau, gwaith celf, refeniw hawlfraint neu fath arall o eitem werthfawr. Mae angen adolygu ewyllysion sy'n cynnwys cymynroddion o'r fath bob tro y gwerthwch asedau a restrir yn eich ewyllys.

Rhodd Refersiynol
Mae cymynrodd refersiynol yn caniatáu i chi adael eich ystad, neu asedau penodol yn eich ystad, i unigolion a enwir a fydd yn elwa drwy gydol eu bywyd. Yn dilyn eu marwolaethau, trosglwyddir yr ystad gyfan neu ran ohoni i'r buddiolwyr a nodir yn y gymynrodd refersiynol. Er enghraifft, gallech adael eiddo i'ch priod am weddill ei oes/ei hoes, ac yna ei roi i'r Brifysgol mewn cymynrodd ar ôl marwolaeth eich priod.

Fel elusen gofrestredig, mae rhoddion i Brifysgol Abertawe wedi'u heithrio o dreth etifeddiaeth a threth enillion cyfalaf yn y DU. Hefyd gallwn hawlio treth incwm. Gall y rheolau hyn fod yn gymhleth felly argymhellwn eich bod yn ceisio cyngor cyfreithiol.

Mae rhodd yn eich ewyllys yn benderfyniad pwysig a phersonol iawn. Mae'n fynegiant o'ch gwerthoedd a'r egwyddorion sy'n bwysig i chi. Rydym bob amser yn argymell eich bod yn ceisio cyngor cyfreithiol wrth ddrafftio neu ddiweddaru'ch ewyllys neu ychwanegu codisil. Os penderfynwch roi cymynrodd i Brifysgol Abertawe, gellir defnyddio'r geiriad canlynol yn eich ewyllys:

Cymynrodd Ariannol:

"Rwyf yn rhoi'r swm di-dreth gwerth £__________ i  Brifysgol Abertawe, Parc Singleton, Abertawe SA2 8PP (Rhif Elusen Gofrestredig 1138342) i'w ddefnyddio at ddibenion cyffredinol y Brifysgol yn llwyr."  

"Rwyf yn rhoi'r swm di-dreth gwerth £__________ i Brifysgol Abertawe, Parc Singleton, Abertawe SA2 8PP (Rhif Elusen Gofrestredig 1138342) a mynegaf fy nymuniad (ond heb osod rhwymedigaeth rwymol) y defnyddir yr arian at ddiben...... (manylion y diben arfaethedig).”

Rhoddion Anariannol:
"Rwyf yn rhoi fy _________ (disgrifiad llawn o'r eitem a'i lleoliad) i Brifysgol Abertawe, Parc Singleton, Abertawe SA2 8PP (Rhif Elusen Gofrestredig 1138342)."

Rhoddion Gweddilliol a Refersiynol
O ystyried cymhlethdod cymynroddion gweddilliol a refersiynol, argymhellwn eich bod yn ceisio cyngor cyfreithiol wrth ystyried y math hwn o gymynrodd.