Sefydlwyd Ysgoloriaeth Nawal Al Sharif (NAS) yn 2003, ac mae'n anrhydeddu gwaddol Nawal Al Sharif, ymarferydd datblygiad cymdeithasol arloesol yng Ngwlad yr Iorddonen, ac yn adlewyrchu ymrwymiad hirdymor Prifysgol Abertawe i gyfleoedd addysgol a datblygiad rhyngwladol.
Sefydlwyd yr ysgoloriaeth o ganlyniad i bartneriaeth rhwng Canolfan Astudiaethau Datblygu Prifysgol Abertawe ac Adran dros Ddatblygu Rhyngwladol y DU, yn dilyn cwblhau Prosiect Adeiladu Capasiti Datblygiad Cymdeithasol Gwlad yr Iorddonen yn llwyddiannus. Crëwyd gwaddol i gefnogi myfyrwyr dawnus o Wlad yr Iorddonen a Phalesteina i ymgymryd ag astudiaethau ôl-raddedig yn Abertawe.
Pan gaewyd y Ganolfan Astudiaethau Datblygu yn 2010, trosglwyddwyd yr ysgoloriaeth i Adran Gwleidyddiaeth, Athroniaeth a Chysylltiadau Rhyngwladol Prifysgol Abertawe, gan gryfhau ei chysylltiad ag agenda ymgysylltu byd-eang a datblygiad y Brifysgol. Wedi hynny, mae'r Brifysgol wedi dod yn rhan o raglen Cymorth Addysg Uwch i Balestiniaid (HESPAL) y British Council.
Ar ôl cyfnod o fod yn segur o ganlyniad i'r dirywiad ariannol byd-eang, mae’r gronfa ysgoloriaeth wedi'i hadfer, sy’n golygu bod modd ail-lansio’r rhaglen. O 2027 i 2030, bydd Prifysgol Abertawe yn cynnig hyd at bump ysgoloriaeth gradd Meistr wedi'u hariannu'n llawn bob blwyddyn yn yr Adran Gwleidyddiaeth, Athroniaeth a Chysylltiadau Rhyngwladol, gan greu cyfleoedd newydd i fyfyrwyr rhagorol o Balesteina i ddatblygu eu sgiliau, cael hwb i’w gyrfaoedd a chyfrannu at ddyfodol eu cymunedau.
