Deall Hunan-niweidio a Hunanladdiad: Tystiolaeth a Dealltwriaeth o Ymchwil

Mae hunan-niweidio a hunanladdiad yn bryder hollbwysig o ran iechyd y cyhoedd, gyda dros 720,000 o bobl ledled y byd yn rhoi diwedd ar eu bywydau eu hunain bob blwyddyn.

Mae Llywodraeth Cymru yn cydnabod bod atal hunanladdiad yn flaenoriaeth o bwys, gan dynnu sylw at yr angen i ddatblygu cynllun gweithlu a hyfforddiant ar gyfer staff gwasanaethau perthnasol.

Gyda hyn mewn golwg, mae'r modiwl cyfunol hwn wedi'i lunio i ddatblygu ymwybyddiaeth a dealltwriaeth o hunan-niweidio a hunanladdiad.

Y modiwl hwn yw'r unig raglen Lefel 7 yng Nghymru sydd wedi'i llunio'n benodol i wella ymwybyddiaeth, dealltwriaeth a sgiliau cyfathrebu o ran hunanladdiad a hunan-niweidio. Mae'n canolbwyntio ar ddatblygu eich sgiliau cyfathrebu effeithiol a gwerthuso ymyriadau presennol yn feirniadol, gan ddyfnhau eich dealltwriaeth o sut y cynhelir ymchwil i hunan-niweidio a hunanladdiad.

Mae 65% o'r cynnwys yn cael ei gyflwyno ar-lein, gyda 35% yn digwydd wyneb yn wyneb. Mae'r dysgu ar-lein yn cynnwys 9 darlith wedi'u recordio, sy'n cael eu rhyddhau mewn 4 bloc, a 6 seminar fyw sy'n cael eu cynnal ar Microsoft Teams. Cynhelir y gweithgareddau ar-lein yn ystod wythnosau 1–6, gydag egwyl yn wythnos 7 i weithio ar eich asesiad cyntaf, ac yna'r elfen wyneb yn wyneb; gweithdy dulliau ymchwil deuddydd, a gynhelir yn wythnos 8. Mae cynnwys a strwythur llawn y rhaglen wedi'u rhestru isod.

Fel cwrs byr, mae'r modiwl hwn yn cynnig datblygiad proffesiynol hyblyg a phenodol sy'n hygyrch i weithwyr proffesiynol, gan gynnal y trylwyredd academaidd a ddisgwylir ar Lefel 7.

Sylwer: Bydd arweiniad at gymorth ar gael drwy gydol y modiwl hwn ar gyfer unrhyw unigolion sy'n gweld y pynciau a'r cynnwys yn heriol neu'n gynhyrfiol.

Manylion Allweddol y Cwrs

Manteision y rhaglen

• Gwella eich ymwybyddiaeth a'ch dealltwriaeth o'r ffactorau seicolegol, cymdeithasol a biolegol sy'n dylanwadu ar brofiadau o hunanladdiad a hunan-niweidio.
• Datblygu a mireinio eich strategaethau cyfathrebu ar gyfer ymgysylltu ag unigolion sy'n profi meddyliau hunanladdol neu'n hunan-niweidio, gan addasu eich dull gweithredu i ddiwallu anghenion amrywiol poblogaethau sydd mewn perygl.
• Gwerthuswch effeithiolrwydd, cyfyngiadau ac ystyriaethau moesegol atal hunanladdiad – trwy strategaethau ymyrryd ac ôl-ymyrryd mewn lleoliadau clinigol, cymunedol ac ym maes polisi – gan ddefnyddio'r rhain i ddylanwadu ar eich ymarfer eich hun.
• Datblygwch eich dealltwriaeth o ddulliau ymchwil gwahanol, a sut y gellir eu defnyddio i hyrwyddo ymchwil i atal hunanladdiad a hunan-niweidio.
• Datblygwch eich hyder drwy gymryd rhan mewn dysgu cydweithredol, datblygu sgiliau cyfathrebu effeithiol gyda chydweithwyr, ymchwilwyr a'r rhai sy'n profi hunan-niweidio a hunanladdiad.

Yn addas i

Mae hunan-niweidio a hunanladdiad yn faterion iechyd cyhoeddus arwyddocaol ac eang, sy'n cael effeithiau sylweddol a pharhaus ar draws gofal iechyd, yn ogystal â llawer o sectorau a gwasanaethau eraill. Gan y gall unigolion sy'n profi trallod hunanladdol ddod i gysylltiad ag ystod eang o weithwyr proffesiynol, mae'r rhaglen wedi'i llunio i fod yn gynhwysol ac yn ddefnyddiol ar draws amrywiaeth o rolau, gan gynnwys:

• • Gweithwyr proffesiynol iechyd a gofal cymdeithasol
  • Gweithwyr proffesiynol meddygol
  • Gweithwyr y trydydd sector
  • Unrhyw un sy'n dymuno gwella eu dealltwriaeth o hunanladdiad a hunan-niweidio

Yr addysgu

Mae'r modiwl wedi'i gynllunio, a chaiff ei gyflwyno, gan arbenigwyr sy'n cael eu cydnabod yn rhyngwladol ym maes hunan-niweidio a hunanladdiad, gyda mewnbwn uniongyrchol gan y Ganolfan Genedlaethol ar gyfer Ymchwil i Atal Hunanladdiad a Hunan-niweidio a grŵp cynghori'r Ganolfan sy'n cynnwys pobl â phrofiad bywyd. Mae'r dull hwn yn sicrhau bod eich dysgu yn gadarn yn academaidd, wedi'i seilio ar egwyddorion moesegol a’i lywio gan safbwyntiau o'r byd go iawn.

Bydd angen gradd israddedig ar gyfranogwyr, ac oherwydd yr elfennau wyneb yn wyneb sy'n ofynnol ar gyfer y rhaglen, bydd angen iddynt fod wedi'u lleoli yn y DU.

Dylid cyflwyno ceisiadau ar-lein.

Os oes gennych gwestiynau, cysylltwch â ni.

Croeso i Brifysgol Abertawe

Mae Prifysgol Abertawe'n brifysgol a arweinir gan ymchwil sydd wedi bod yn gwneud gwahaniaeth ers 1920. Mae ein cymuned amrywiol a chroesawgar yn ffynnu ar archwilio a darganfod, a cheir cydbwysedd o addysgu ac ymchwil rhagorol, ynghyd ag ansawdd bywyd gwych. Mae myfyrwyr sy'n astudio yma yn mwynhau, yn cael eu hysbrydoli ac yn cyflawni - sydd oll yn rhoi cyfle gwell iddynt sicrhau rhagolygon cyflogaeth rhagorol.

Mae ein cymuned amlddiwylliannol yn cynnig safbwynt byd-eang, gan alluogi'r rhai sy'n ymuno â ni i ddatblygu'r sgiliau a'r wybodaeth a fydd yn eu rhoi ar ben ffordd tuag at yrfaoedd llwyddiannus a gwerthfawr.