1. Hafan
  2. Y Brifysgol
  3. Chwaraeon Prifysgol Abertawe
  4. Cymerwch Ran

Cymerwch Ran

Students from sports clubs and programmes against a green background

Byddwch yn Ran Ohoni gyda Chwaraeon Prifysgol Abertawe

Cofrestrwch yn Swansea-union.co.uk

Croeso i Chwaraeon Prifysgol Abertawe!

Croeso i Abertawe! P'un a ydych chi'n athletwr profiadol, neu eisiau cadw'n actif neu'n gobeithio cwrdd â phobl newydd, mae lle i chi yma gyda Chwaraeon Prifysgol Abertawe. Mae mwy nag un ffordd o gymryd rhan: gallwch ddod yn aelod o glwb chwaraeon a chynrychioli Abertawe, chwarae'n gymdeithasol, cystadlu yn erbyn ffrindiau ar y campws, rhoi cynnig ar weithgaredd newydd neu'n syml, cadw'n heini a chael hwyl. Beth bynnag yw eich rheswm, rydyn ni eisiau i chi ymuno â ni a 'Bod yn Rhan Ohoni!'

Archwiliwch eich holl opsiynau isod

Byddwch yn Ran Ohoni gyda Chwaraeon Prifysgol Abertawe

Ymuno â Chlwb Chwaraeon

Tîm Clwb Hoci Prifysgol Abertawe’n cystadlu ar y cae hoci ym Mharc Chwaraeon Bae Abertawe

Gallwch gynrychioli Prifysgol Abertawe yng nghystadlaethau BUCS a chystadlaethau eraill, hyfforddi'n rheolaidd a dod yn aelod o un o’n 50 a mwy o glybiau chwaraeon i fyfyrwyr.

Perffaith ar gyfer: athletwyr cystadleuol, y rhai sy'n hoffi chwaraeon, neu unrhyw un sydd eisiau parhau â’i gamp neu ei datblygu *mae llawer o glybiau'n cynnig cyfleoedd i ddechreuwyr pur.

Cymryd Rhan Mewn Chwaraeon Mewnfurol

Un o gynghreiriau pêl-droed mewnfurol Prifysgol Abertawe’n chwarae wrth wisgo crysau gwyrdd.

Gyda'n rhaglen o chwaraeon mewnfurol, gallwch fwynhau cynghreiriau cyfeillgar, cystadleuol a thwrnameintiau yn erbyn myfyrwyr eraill yn Abertawe. Dim teithio. Dim pwysau. Dim ond cystadlu llawn hwyl ar y campws gyda ffrindiau.

Perffaith ar gyfer:  gwneud ffrindiau a mwynhau cystadlu rheolaidd, ar y campws ar draws ystod o chwaraeon.

Bod yn ACTIF

Grŵp mawr o fyfyrwyr yn gwisgo siwtiau gwlyb porffor o’r rhaglen gweithgarwch corfforol Bod yn ACTIF yn y dŵr bas ar draeth Caswell

Rhowch gynnig ar sesiynau am ddim ar y campws, cymerwch ran mewn gweithgareddau rhad oddi ar y campws, a mwynhau ychydig o weithgarwch corfforol llawn hwyl heb ymrwymo i glwb neu gynghrair.

Perffaith ar gyfer: dechreuwyr, cyfranogwyr achlysurol ac unrhyw un sydd eisiau cwrdd â myfyrwyr eraill, wrth gadw'n heini.

Chwaraeon Perfformiad

Aelod o raglen nofio perfformiad Prifysgol Abertawe ar ochr y pwll yn gwisgo cap nofio gwyrdd a gwisg nofio amryliw.

Os ydych chi'n cystadlu ar y lefel uchaf, mae ysgoloriaethau, gwasanaethau cymorth a rhaglenni perfformiad ar gael i chi.

Perffaith ar gyfer: Myfyrwyr sy'n athletwyr sydd eisiau cydbwyso chwaraeon elît ag astudiaethau academaidd

Parc Chwaraeon Bae Abertawe (gan gynnwys y gampfa)

Tri myfyriwr yn gwisgo cit chwaraeon Prifysgol Abertawe yn cerdded ar hyd y coridor i’r Neuadd Chwaraeon a’r gampfa ar Lôn Sgeti – mae logo mawr Parc Chwaraeon Bae Abertawe ar wal y coridor

Cartref Chwaraeon Prifysgol Abertawe

Yn gartref i gyfleusterau rhagorol gan gynnwys campfeydd, pwll 50 metr, neuaddau chwaraeon, cyrtiau a chyfleusterau athletau, Parc Chwaraeon Bae Abertawe yw cartref chwaraeon yn Abertawe.Dewch i archwilio yn ystod yr Wythnos Groeso a darganfod popeth sydd gan y cyfleuster i'w gynnig.

Mae mwy nag un ffordd o Fod yn Rhan Ohoni!

Dechreuwch Eich Taith yn ystod yr Wythnos Groeso

Yr Wythnos Groeso (o 21 Medi) yn amser gwych i ddarganfod popeth sydd gan Chwaraeon Prifysgol Abertawe i'w gynnig.

P’un a oes gennych ddiddordeb mewn clybiau chwaraeon, Chwaraeon Mewnfurol neu ein rhaglen Bod yn ACTIF, byddwn ni yno i gynnig cyngor ac arweiniad, i drafod yr holl opsiynau sydd ar gael i chi ac i’ch helpu i gymryd eich cam cyntaf.

Dewch i’n gweld ni yn Ffair y Glas

Os ydych chi'n newydd i Abertawe, peidiwch â cholli Ffair y Glas. Dyma brif ddigwyddiad y Glasfyfyrwyr lle gallwch archwilio'r holl gyfleoedd sydd ar gael i chi yn Abertawe!

Siaradwch ag aelodau clybiau chwaraeon, clywch pam y gwnaethon nhw ymuno â Chwaraeon Prifysgol Abertawe, a darganfyddwch fwy am ymuno â’n cyfleoedd chwaraeon cymdeithasol, gan gynnwys ein rhaglen gweithgarwch corfforol arobryn – Bod yn ACTIF.

Lleoliad: Campws y Bae

Dyddiad: Dydd Mercher 23 a dydd Iau 24 Medi

Amser: 10am - 4pm

Darganfyddwch fwy am Ffair y Glas ar wefan Undeb y Myfyrwyr.

Awgrymiadau gwych i Fod yn Rhan Ohoni

  • Peidiwch â phoeni os nad ydych chi wedi cymryd rhan yn y gamp o'r blaen. Mae llawer o'n clybiau'n croesawu dechreuwyr, ac mae llawer o fyfyrwyr yn rhoi cynnig ar gamp am y tro cyntaf yn y brifysgol.
  • Yn y bôn, mae pedair rhan i'n harlwy chwaraeon - Bod yn ACTIF, Chwaraeon Mewnfurol (cynghreiriau a thwrnameintiau), Clybiau, a Chwaraeon Perfformiad.
  • Dechreuwch bori ein 50 a mwy o glybiau chwaraeon nawr - gyda Chwaraeon Mewnfurol a Bod yn ACTIF hefyd, mae rhywbeth at ddant pawb.
  • Dewch i ddweud helô - dewch o hyd i ni ar y campws yn ystod yr Wythnos Groeso. Rydyn ni’n eich annog i ofyn llawer o gwestiynau er mwyn i chi ddod o hyd i'r cyfle perffaith i chi.
  • Gofynnwch unrhyw beth i ni – does dim cwestiynau twp - cofiwch, roedden ni yn eich esgidiau chi ychydig amser yn ôl, ac rydyn ni eisiau eich helpu chi i ddod o hyd i'ch ffordd!
  • Mae croeso i chi gysylltu â ni - os nad ydych chi'n siŵr, gallwch chi e-bostio'r clybiau'n uniongyrchol - mae'r holl glybiau'n cyhoeddi eu manylion cyswllt ar-lein.
  • Dilynwch Chwaraeon Prifysgol Abertawe ar y cyfryngau cymdeithasol am newyddion, awgrymiadau a diweddariadau, treialon a sesiynau rhagflas ac unrhyw gyfleoedd munud olaf.
  • Gall rhai clybiau a gweithgareddau lenwi'n gyflym, felly os ydych chi eisoes yn sicr sut rydych chi eisiau Bod yn Rhan Ohoni - cofrestrwch nawr.

Gweld yr Amserlen Groeso

Sut Gallaf Gofrestru?

Mae gan weithgareddau gwahanol brosesau cofrestru gwahanol, ond maen nhw i gyd yn dechrau yn yr un lle:

  • Cam 1 - Dewiswch y gweithgaredd neu'r gweithgareddau yr hoffech chi fod yn rhan ohonynt.
  • Cam 2- Ewch i wefan Undeb y Myfyrwyr - ac ewch i’r dudalen "Get Involved ".
  • Cam 3 - Dilynwch y cyfarwyddiadau cofrestru ar gyfer eich gweithgaredd dewisol.

Aelodaeth Chwaraeon Prifysgol Abertawe

  • Bydd angen aelodaeth Chwaraeon Prifysgol Abertawe arnoch chi i fod yn rhan o unrhyw glwb. Ewch i’r  dudalen Club Sport  ar wefan Undeb Myfyrwyr Prifysgol Abertawe a dewiswch aelodaeth.
  • Bydd angen i chi gofrestru ar gyfer Bod yn ACTIF gyda'ch cyfeiriad e-bost Prifysgol Abertawe, ond mae am ddim. Ychwanegwch "Student Registration " at eich basged, ewch i'r adran dalu, atebwch ychydig o gwestiynau byr a chadarnhau*
  • Ar gyfer Chwaraeon Mewnfurol, cer i wefan Undeb y Myfyrwyr, cer i’r adran fewnfurol ac yna dewisa’r gynghrair mae gennyt ddiddordeb ynddi a chwblha’r ffurflen mynegiant o ddiddordeb ar-lein. Byddi di’n cael dy ychwanegu at grŵp WhatsApp lle byddi di’n cael diweddariadau am dy gais.

*Sylwer: mae'r rhan fwyaf o sesiynau Bod yn ACTIF ar y campws am ddim neu'n rhad iawn. Ar gyfer sesiynau oddi ar y safle megis syrffio a heicio, rydyn ni’n codi ffi fach i dalu am gostau’r sesiwn.

Pam Bod yn Rhan Ohoni?

Mae chwaraeon yn Abertawe'n llawer mwy na chystadlu.

Mae myfyrwyr sy'n cymryd rhan yn dweud wrthym eu bod...

  • Yn gwneud ffrindiau o'r diwrnod cyntaf
  • Yn teimlo'n rhan o gymuned Abertawe
  • Yn gwella eu lles corfforol a meddyliol
  • Yn dysgu sgiliau newydd ac yn meithrin hyder
  • Yn dod o hyd i gydbwysedd gwych rhwng bywyd cymdeithasol ac astudiaethau
  • Yn gwella eu canlyniadau academaidd
  • Yn creu atgofion y byddan nhw'n eu cofio’n hir ar ôl graddio

Efallai eich bod am ymuno unwaith yr wythnos, sawl gwaith y mis neu bob dydd, drwy Chwaraeon Prifysgol Abertawe, byddwch yn ymgartrefu ym mywyd y Brifysgol ac yn dod o hyd i’ch criw chi.

Defnyddiwch y ddolen isod i'n dilyn ni ar y cyfryngau cymdeithasol a Bod yn Rhan Ohoni!

Ewch i wefan Undeb y Myfyrwyr i gofrestru a Bod yn Rhan Ohoni