Caffael Cynaliadwy

CENHADAETH MASNACH DEG YW PRISOEDD GWELL, AMODAU GWEITHIO DERBYNIOL, CYNALIADWYEDD AC AMODAU MASNACHU TEG I WEITHWYR YN Y BYD SY'N DATBLYGU.

Ni oedd y brifysgol gyntaf yng Nghymru i gael statws Masnach Deg. Mae gan ein tîm Gwasanaethau Arlwyo ymrwymiad cadarn i gynaliadwyedd, Masnach Deg a phrynu'n lleol.

Mae ein Grŵp Llywio Masnach Deg yn monitro arferion Masnach Deg ar y campws, gan gymryd yr awenau wrth gynllunio gweithgareddau mewn perthynas â Phythefnos Masnach Deg.

Ar draws ein campysau, rydym yn cynnig amrywiaeth wych o gynnyrch Masnach Deg, o suddau ffrwyth a choffi i ddanteithion a gwin. Mae ein siop ddillad ar y campws yn gwerthu amrywiaeth eang o nwyddau Prifysgol Masnach Deg o ffynonellau moesegol. Yn ogystal, mae ein Polisi Caffael Cynaliadwy yn ein hymrwymo i brynu cotwm Masnach Deg i wisgoedd neu ddillad ble bynnag y bo modd.

Rydym yn cefnogi Fforwm Masnach Deg Abertawe a sefydlwyd ym mis Medi 2002 sy'n rhwydwaith o grwpiau, busnesau ac unigolion busnes sy'n ymrwymedig i egwyddorion Masnach Deg.

Ni oedd y sefydliad cyntaf i fod yn gysylltiedig ag Electronics Watch.

Mae Electronics Watch yn sefydliad monitro annibynnol sy'n helpu prynwyr yn y sector cyhoeddus i weithio gyda'i gilydd i sicrhau y caiff hawliau gweithio a safonau diogelwch mewn ffatrïoedd lle cynhyrchir caledwedd TGCh eu parchu. Drwy weithredu ar sail gysylltiol, mae Electronics Watch yn galluogi prynwyr cyhoeddus i rannu'r gost o fonitro cyflenwyr â'r holl rwydwaith o gysylltiadau a chydlynu gweithgarwch diwydiannol. Fel sefydliad sy'n gysylltiedig ag Electronics Watch, rydym yn mwyafu effaith wrth leihau cost, gan fod o fantais i fwy o weithwyr yn ein cadwyn cyflenwi electronig nag y gallem fod ar ein pennau ein hunain.

Mae Electronic Watch yn gweithredu fel cynrychiolydd "yn y fan a'r lle" i aelodau cysylltiol, gan weithio gyda rhwydwaith byd-eang o fonitrwyr cymdeithas sifil cymwys i ddatgelu ac adrodd am broblemau hawliau gwaith a diogelwch mewn ffatrïoedd a mynd i'r afael â nhw'n brydlon ac yn effeithiol. Mae methodoleg fonitro Electronics Watch yn ein helpu ni i fod yn fwy ymwybodol o ymarferion sy'n groes i hawliau gwaith a safonau diogelwch yn ei gadwyn gyflenwi, cyfrannu at ddatrysiadau a defnyddio ein dulliau caffael mewn ffordd ddynamig yn unol â'n gwerthoedd fel prifysgol. Yn y tymor hir, mae Electronics Watch yn ein helpu i gyfrannu mwy at weithleoedd sy'n fwy parchus yn y diwydiant electroneg lle mae gan weithwyr lais cryf a gallant helpu i lywio gwelliannau cynaliadwy.

Rydym yn aelod cysylltiol swyddogol o'r Consortiwm Hawliau Gweithwyr (WRC), sef sefydliad monitro hawliau gwaith annibynnol ac anwleidyddol sy'n cydweithio â gweithwyr, sefydliadau anllywodraethol a phrifysgolion a cholegau eraill i wella amodau gweithwyr yn y diwydiant dillad.

Drwy fod yn gysylltiedig â'r WRC, rydym yn cytuno i fabwysiadu côd ymarfer sy'n ystyried materion megis cyflogau, oriau gwaith, iawndal am weithio oriau ychwanegol, rhyddid cysylltiadau, iechyd a diogelwch yn y gweithle, hawliau menywod, gwaith plant a gorfodol, aflonyddwch a cham-drin yn y gweithle a pheidio â gwahaniaethu.

Yma ym Mhrifysgol Abertawe, rydym yn defnyddio'r côd ymarfer o dan y gyfraith caffael cyhoeddus i helpu ein harbenigwyr caffael i ymgysylltu â chadwyni cyflenwi drwy ddatgelu lleoliadau ffatrïoedd dillad pob cyflenwr, contractwr ac is-gontractwr dillad yn y Brifysgol a'i rannu â'r WRC. Lle byddwn yn aelod o gonsortiwm, rydym yn ymdrechu i gael gwybodaeth gan gydweithwyr neu gyflenwyr.‌

Mae'n Polisi Caffael Cynaliadwy yn ein helpu i wreiddio'r mater o Hawliau Gweithwyr a chyflenwad dillad yn ein proses dendro.