Iechyd A Llesiant Y Boblogaeth

Y Ganolfan Ar Gyfer Iechyd Y Boblogaeth

Mae'r ganolfan hon, sy'n cwmpasu Cymru gyfan, yn canolbwyntio ar ddull gydol oes, ac mae iddi ddwy brif thema, sef Datblygiad Iach ac Oes Gweithio Iach. Rydym wedi cael mwy na £30m ar gyfer prosiectau gan gynnwys grymuso pobl ifanc yn eu harddegau i newid eu hardal leol (a ariennir gan Sefydliad Prydeinig y Galon), ymchwilio i effaith COVID-19 ar ysgolion cynradd (a ariennir gan y Cyngor Ymchwil Feddygol), gwella iechyd mewn cymunedau gwledig (a ariennir gan Sefydliad Nuffield), gan ddefnyddio dulliau dysgu datblygedig i wella'r amser a gymerir i wneud diagnosis o arthritis (UCB Pharma Limited). Rydym yn rhan o'r Astudiaethau Craidd Cenedlaethol sy'n mynd i'r afael â COVID-19 (y Cyngor Ymchwil Feddygol) ac yn gweithio ar lefel ryngwladol gyda Chanolfan Gydweithredu Sefydliad Iechyd y Byd (WHO).

Researchers looking at diabetes research

Canolbwynt Ymchwil Iechyd A Llesiant Y Boblogaeth

Mae ein hymchwil yn edrych ar ymyriadau sy'n cefnogi iechyd a llesiant pobl drwy gydol eu hoes. Er enghraifft, mae ein gwaith ym maes y blynyddoedd cynnar yn cynnwys Ganwyd yng Nghymru, sef astudiaeth carfan geni o blant a anwyd yn ystod COVID-19 athu hwnt; HAPPEN, sef rhwydwaith o ysgolion cynradd ledled Cymru, gyda mwy na 200 o ysgolion; ac ACTIVE, sy'n gweithio gyda phobl ifanc yn eu harddegau i wella llesiant a sicrhau bod amgylcheddau iach ac actif ar gael i bawb.

Datblygiad Iach

Mae'r rhaglen hon yn cynnwys deall yr hyn sy'n gweithio er mwyn gwella iechyd mamau a babanod ar sail ein hastudiaeth Ganwyd yng Nghymru, gwerthuso ymyriadau i gefnogi plant cyn oed ysgol, a'n rhwydwaith o ysgolion cynradd ledled Cymru (HAPPEN) er mwyn gwerthuso'r hyn sy'n gweithio mewn ysgolion cynradd i wella iechyd a llesiant.

Oes Gweithio Iach

Rydym yn ymchwilio i amrywiaeth o wahanol heriau i iechyd y mae oedolion yn eu hwynebu yn ystod eu hoes gweithio. Mae'r heriau hyn yn amrywio o gyflyrau iechyd cronig megis arthritis, asthma, anhwylderau cardiofasgwlaidd, heintiau ac anafiadau, i'r angen i gymryd meddyginiaeth a gofalu am gleifion. Rydym hefyd yn ymchwilio i'r ffordd orau o gefnogi grwpiau penodol megis athrawon, ffermwyr a phobl sy'n byw ac yn gweithio mewn cymunedau gwledig, y GIG a gweithwyr rheng flaen.

Gwella Iechyd y Cyhoedd a Llesiant ar gyfer y Boblogaeth

Mae'r Ganolfan yn gweithio mewn partneriaeth ag Iechyd Cyhoeddus Cymru er mwyn helpu i droi'r ymchwil a gynhelir yn welliannau i iechyd a llesiant pobl, ac i gyflymu'r broses hon o droi ymchwil yn fanteision yn y byd go iawn. Gwneir hyn drwy greu sail dystiolaeth ar gyfer polisïau, gwasanaethau ac ymyriadau ym maes iechyd y cyhoedd, a sicrhau bod cynifer o bobl â phosibl yn eu defnyddio, gyda'r nod o gael effaith ar lefel y boblogaeth.

Canlyniadau Ymchwil

Rydym ni’n defnyddio’r ymagwedd hon i helpu i ddyfnhau ein dealltwriaeth o sut y gallwn ddefnyddio “data mawr” i wella iechyd, cyfoeth a chyfleoedd y boblogaeth. Gan ddefnyddio data wedi’i anomeiddio, mae ein hymchwil o’r radd flaenaf yn ceisio gwella bywyd a lles poblogaeth y DU. Rydym ni wedi gweithio gyda’r gymuned ffermio yng Nghymru, yr Alban, Gogledd Iwerddon a Lloegr i wella ein dealltwriaeth o bwysau amgylcheddol, gan greu canlyniadau iechyd gwell a gwella incwm aelwydydd ffermio. Mae gennym lifau gwaith sylweddol â’r nod o wella iechyd mamau a babanod a gweithio tuag at ddealltwriaeth well o gyflyrau cronig hirdymor.

Gwella Bywydau Ffermwyr Y Du

Mae Ymchwil Data Gweinyddol y DU y Cyngor Ymchwil Economaidd a Chymdeithasol wedi buddsoddi £600,000 er mwyn deall aelwydydd ffermio'n well. Caiff data o'r sector cyhoeddus ledled y DU ar weithgareddau amaethyddol a defnydd tir eu cysylltu â data demograffig, addysgol ac iechyd i greu'r llwyfan data dienw DU-gyfan gyntaf sy'n canolbwyntio ar amaethyddiaeth. Ein nod yw darparu tystiolaeth a fydd yn helpu'r llywodraeth i gefnogi ffermwyr, eu haelwydydd a'u cymunedau, a datblygu'r gwaith ar y cyd â'r gymuned ffermio o ran y cwestiynau ymchwil a'r gwaith o ddehongli a chyfleu'r canfyddiadau. Bydd y gwaith hwn yn llywio penderfyniadau a wneir ar bolisi yn y dyfodol, gan arwain at ymatebion gwell i heriau megis ymateb i bwysau amgylcheddol, cynhyrchu canlyniadau iechyd gwell, a gwella incwm aelwydydd ffermio.

Effaith Ein Hymchwil

Cefnogwch ein hymchwil

Gadewch rodd er mwyn cefnogi ymchwil arloesol