Ymchwil Gofal Sylfaenol A Gofal Brys

Astudio Effeithiolrwydd, Trefniadau A Darpariaeth Gofal

Mae dros 90% o'r cysylltiadau â chleifion a wneir yn y GIG yn digwydd ym maes gofal sylfaenol, gofal brys neu ofal mewn argyfwng, ac mae'r galw yn cynyddu. Rydym yn defnyddio dulliau meintiol ac ansoddol o ymchwilio i'r ffordd y gall y rhan hon o'r system gofal iechyd fod mor effeithiol, effeithlon a chynaliadwy â phosibl. Rydym yn cydweithio â phartneriaid yn y GIG i ymgymryd ag ymchwil sy'n ymateb i heriau go iawn – ymchwil sy'n berthnasol i bolisïau, sy'n canolbwyntio ar y claf ac sy'n cael effaith. Mae Canolfan PRIME wedi cael mwy na £4.8m mewn cyllid seilwaith.

3 ambulances with Mountains in the Background

Meysydd Sy'n Ganolbwynt I'n Hymchwil

Mae ein holl ymchwil yn canolbwyntio'n gryf ar y claf, ac rydym yn gweithio gyda chleifion a'r cyhoedd, o ddatblygu syniadau i fod yn gynigion, drwy ymgymryd ag ymchwil ac yna ddosbarthu canfyddiadau er mwyn sicrhau'r effaith fwyaf yn y byd go iawn.

Yn rhychwantu'r holl themâu hyn mae ymrwymiadau i ddulliau ymchwil newydd, yn enwedig y defnydd o ddata cysylltiedig dienw, ac i weithio gyda chleifion a defnyddwyr gwasanaethau wrth gynllunio ac ymgymryd ag ymchwil.

Triniaethau newydd mewn gofal gwasanaeth ambiwlans brys

Mae gwasanaethau ambiwlans brys yn darparu mwy a mwy o ofal clinigol i gleifion yn uniongyrchol, a'r nod yw cadw cleifion allan o'r ysbyty lle y bo'n bosibl. Mae ein hastudiaethau ymchwil presennol yn cynnwys TIME, treial ymarferoldeb naloxone i'w ddefnyddio gartref ar gyfer gorddosau o opioid mewn gofal cyn ysbyty (NIHR HTA); PHECG2, astudiaeth dulliau cymysg o'r defnydd o electrocardiogram 12-lîd cyn ysbyty a'i effaith (Sefydliad Prydeinig y Galon); a RAPID2, treial o analgesia cyn ysbyty ar gyfer cleifion sydd wedi torri clun (NIHR HTA).

Ymateb i ddefnyddwyr dwys iawn o ofal cyn ysbyty

Mae cyfran fach o bobl sy'n ffonio gwasanaethau ambiwlans brys yn gwneud defnydd arbennig o uchel o'r gwasanaeth, yn aml oherwydd anghenion hirdymor nad ydynt wedi cael eu datrys fel arall. Mae ein hastudiaeth STRETCHED yn gwerthuso dulliau rheoli achosion o ran darparu gofal i'r grŵp hwn o gleifion (NIHR HS&DR). Nod yr astudiaeth INFORM yw deall mwy am bwy yw'r cleifion hyn a beth sy'n eu hysgogi i ffonio (HCRW).

Darparu gofal iechyd yn ystod pandemig COVID-19

Yn 2020, cyflwynodd gwasanaethau ambiwlans ledled y DU brotocolau pandemig – ffyrdd o flaenoriaethu galwadau i wneud yn siŵr bod y rhai sydd ei angen fwyaf yn cael y gofal sydd ei angen arnynt. Mae'r astudiaeth TRIM yn gwerthuso'r modelau brysbennu a gyflwynwyd o dan y protocolau hyn, i weld beth yw'r ffordd fwyaf diogel ac effeithiol i wasanaethau ambiwlans ymateb. Mae EVITE Immunity yn archwilio effaith y rhaglen warchod ar gyfer pobl sy'n agored i niwed.

Rolau newydd i barafeddygon mewn gofal sylfaenol

Mae parafeddygon yn ymuno â thimau gofal sylfaenol i ddod â'u sgiliau unigryw i ddarparu gofal rhagweithiol yn y gymuned. Mae astudiaeth PARE yn archwilio'r fenter Pacesetter yng Ngogledd Cymru sy'n cylchdroi uwch-ymarferwyr parafeddygol rhwng gofal sylfaenol a rolau yn y gwasanaeth ambiwlans. Mae astudiaeth ARRIVE, gyda Gwasanaeth Ambiwlans Cymru, yn archwilio ymarferoldeb cynnal gwerthusiad ar raddfa fwy o effaith parafeddygon sy'n gweithio mewn gofal sylfaenol.

Mae ein rhaglen ymchwil wedi arwain at:

Effaith ar bolisi ac ymarfer yn y byd go iawn, e.e. gofal 999 ar gyfer pobl sydd wedi cwympo; gofal cyn ysbyty ar gyfer cleifion â chnawdychiad myocardaidd; osgoi derbyniadau brys
Datblygiad methodolegol – yn benodol, gweithio gyda HDRUK a thîm SAIL, ymgorffori canlyniadau cysylltiedig dienw mewn astudiaethau ymchwil arbrofol a lled-arbrofol gan gynnwys SAFER 2, PRISMATIC, TIME, STRETCHED
Meithrin gallu a datblygu gyrfa yn nhîm Ymchwil Gwasanaethau Iechyd Abertawe ac mewn gwasanaethau ambiwlans. Rydym wedi cefnogi'r Fforwm Ymchwil EMS 999 ers dros 20 mlynedd, ac rydym yn trefnu cynhadledd flynyddol â chyflwyniadau agored a adolygwyd gan gymheiriaid gan ymchwilwyr sy'n gweithio mewn gofal cyn ysbyty brys
Ymchwil yn ymwneud â chanlyniadau

Denu cyllid seilwaith a phrosiect sylweddol i Brifysgol Abertawe drwy Ganolfan PRIME Cymru ac astudiaethau cysylltiedig.

Llywio Buddsoddiad Darbodus Mewn Gofal Sylfaenol

Llywio Buddsoddiad Darbodus Mewn Gofal Sylfaenol

Mae clinigwyr gofal sylfaenol wedi cael eu hannog i ddefnyddio meddalwedd haenu risg rhagfynegol i'w helpu i dargedu gofal a thrwy hynny leihau derbyniadau brys i'r ysbyty. Gwnaeth ein hastudiaeth werthuso'r dull hwn mewn un ardal yng Nghymru, a nodwyd ei fod yn arwain at fwy o dderbyniadau a chostau uwch. O ganlyniad, newidiodd polisi yng Nghymru, felly nid yw haenu risg rhagfynegol yn cael ei annog mewn gofal sylfaenol, gan arbed £200 miliwn y flwyddyn, yn ôl yr amcangyfrif, drwy osgoi derbyniadau i'r ysbyty, dyddiau a dreulir yn yr ysbyty a chysylltiadau eraill â gofal iechyd.

Gwella Gofal Brys I Bobl Wedi Torri Clun

Mae'r Athro Helen Snooks wedi gweithio gyda Gwasanaeth Ambiwlans Cymru a Bwrdd Iechyd Prifysgol Bae Abertawe i ddatblygu proses i barafeddygon roi ataliad (anaesthetig) i'r fascia iliaca er mwyn lleddfu poen ar safleoedd galwadau 999 i bobl yr amheuir eu bod wedi torri clun, a phrofi pa mor ddiogel ac ymarferol ydyw. Mae treial dichonoldeb RAPID, a ariannwyd gan Ymchwil Iechyd a Gofal Cymru (£230,000) ac a gynhaliwyd yn ardal Abertawe, wedi arwain at ddatblygu ac ariannu treial hapsamplu aml-ganolfan mawr penodol gyda phum safle gwasanaeth ambiwlans ac Adran Brys leded Cymru a Lloegr. Dyfarnwyd £1.8 miliwn i dîm a arweinir gan yr Athro Snooks ac a gefnogir gan Uned Dreialon Abertawe, gan y Sefydliad Cenedlaethol ar gyfer Ymchwil Iechyd drwy ei raglen Asesu Technoleg Iechyd i gynnal treial RAPID 2 dros y pedair blynedd nesaf. Mae'r rhaglen waith hon hefyd wedi cynnwys hyfforddiant ac astudiaethau doethurol, gan arwain at ddyfarnu PhD i Dr Jenna Jones yn 2021.