Ers ei sefydlu yn 2004, mae'r Ysgol Feddygaeth wedi rhoi pwyslais ar gael effaith ar ymarfer clinigol ac iechyd. Rydym yn gwneud hyn drwy arloesi, technoleg a rhagoriaeth ymchwil. Mae ein hymagwedd yn rhyngddisgyblaethol wrth reddf ac mae hyn wedi cael effaith ar iechyd, lles a chyfoeth byd-eang, fel y dengys canlyniadau REF2014.
Cyflwyno’r cysyniad o lefelau 'diogel' o gysylltiad â genowenynau a sut mae hyn wedi bod o fudd i gleifion a'r diwydiant fferyllol
Rydym wedi dangos nad yw lefelau isel iawn o gysylltiad â chyfryngau sy’n niweidio DNA (carsinogenau) yn berthnasol o safbwynt biolegol bob amser oherwydd ein mecanweithiau amddiffynnol cynhenid. Mae hyn yn golygu nad yw lefelau isel iawn o halogiad carsinogenaidd yn peri pryder mawr o safbwynt iechyd, a bod hyn â goblygiadau pwysig ar gyfer datblygu cyffuriau. Mae’r darganfyddiadau hyn yn adlewyrchu’r ffaith ein bod yn byw mewn amgylchedd lle mae lefel isel o gyfryngau sy’n niweidio DNA, megis ocsigen, golau haul a chyfryngau deietegol ac yn y blaen, o'n cwmpas ym mhobman.
Lleihau derbyniadau brys i'r ysbyty ar gyfer cleifion, gofalwyr a darparwyr iechyd, drwy wella gofal y tu allan i’r ysbyty.
O ganlyniad i fabwysiadu ymchwil i weithdrefnau eraill yn lle anfon ambiwlans a chludo claf i’r ysbyty, llwyddwyd i leihau derbyniadau brys i’r ysbyty ac arbed costau, heb beryglu profiad, diogelwch nac ansawdd gofal cleifion.
Dylanwadu ar bolisi cenedlaethol er mwyn gwella trefniadau ar gyfer darparu gwasanaeth a gofal cleifion ym maes gastroenteroleg
Mae’r astudiaeth achos effaith hon yn dangos effeithiolrwydd clinigol a chost-effeithiolrwydd dau ddatblygiad newydd yn Abertawe: mynediad agored i wasanaethau ysbyty i gleifion â chlefyd llid y coluddyn; a mwy o gyfrifoldeb i nyrsys, yn enwedig fel endosgopyddion.
Datblygu a gweithredu safonau cenedlaethol i wella strwythur a chynnwys cofnodion cleifion
Mae cofnodion cleifion yn ategu'r gwaith o ddarparu gofal iechyd. Maent yn cynnwys gwybodaeth sy’n sail i ddarparu gwasanaeth, archwilio ac ymchwil. Dangosodd astudiaethau a gynhaliwyd yn Abertawe rhwng 2000 a 2011 am y tro cyntaf fod cofnodion y GIG yn gyfyngedig o ran ansawdd a defnydd. Buom yn cydweithio wedyn â Choleg Brenhinol y Meddygon i ddatblygu safonau cenedlaethol ar gyfer strwythur a chynnwys cofnodion cleifion.
.jpg)