TASS ac Ysgoloriaethau

Cynllun Ysgoloriaeth i Athletwyr Talentog

Mae Prifysgol Abertawe yn falch o fod yn arwain y ffordd o ran cefnogi athletwyr talentog sy'n derbyn eu haddysg yng Nghymru. Y brifysgol yw'r gyntaf i gael ei hachredu gan fenter newydd, sef y Cynllun Ysgoloriaeth i Athletwyr Talentog ("TASS").
Rydym wedi ennill Achrediad Gyrfa Ddeuol TASS, sy'n cydnabod yr ymrwymiad a ddangosir tuag at helpu myfyrwyr i ragori yn y byd academaidd ac ym myd y campau yn ystod eu cyfnod yn Abertawe.
Mae'r Achrediad Gyrfa Ddeuol, sy'n bartneriaeth unigryw rhwng gwasanaethau cymorth a staff academaidd ar draws y Brifysgol, yn dangos ein hymrwymiad i sicrhau bod llwybr gyrfa ddeuol ar gael i'r myfyrwyr hynny sydd hefyd yn athletwyr o fri. Drwy gynnig hyblygrwydd academaidd a'r amgylchedd a'r cymorth cywir, credwn y gall y myfyrwyr hynny ffynnu a chyflawni eu potensial ym maes addysg ac ym maes chwaraeon.

*Nodwch, er mwyn cofrestru am le TASS ym Mhrifysgol Abertawe bydd angen i chi gwblhau a chyflwyno Ffurflen Gais Ysgoloriaeth Chwaraeon sydd ar gael isod.

Ysgoloriaethau

Drwy ein cynlluniau ysgoloriaeth, ein nod yw cwmpasu'r sbectrwm eang o dalent y mae pobl ifanc yn ei dangos yn unigol ac wrth ymgymryd â chwaraeon tîm. Rydym yn chwilio am fyfyrwyr sydd nid yn unig yn bodloni'r gofynion academaidd arferol ond sydd hefyd wedi dangos gallu eithriadol ym maes chwaraeon.
Mae ein hysgoloriaethau chwaraeon a'n rhaglen bwrsariaethau yn ein galluogi i helpu athletwyr talentog i gyflawni eu potensial a'u nodau ym maes chwaraeon yn ystod eu cyfnod yn y Brifysgol.
Mae pedair lefel o ysgoloriaeth ar gael.
Cynigir hefyd amrywiaeth o fwrsariaethau chwaraeon os nad ydych wedi llwyddo i gael ysgoloriaeth.

Gweler yr opsiynau isod

Sut i wneud cais

Mae un ffurflen gais ar gyfer yr ysgoloriaethau. Caiff ei hasesu gan y panel dethol ac, os bydd eich cais yn llwyddiannus, cewch wybod pa ysgoloriaeth y byddwch yn ei chael.

Am fwy o wybodaeth cysylltwch a sportscholarships@swansea.ac.uk / I.J.Morrisson@swansea.ac.uk 01792 543571

Ceisiadau ar agor.

Dyddiad cau Dydd Gwener 28ain Chwefror

Telerau ac Amodau

Caiff ysgoloriaethau eu dyfarnu gan y Pwyllgor Recriwtio a Derbyniadau (y pwyllgor) yn seiliedig ar argymhellion y panel Dethol Ysgoloriaethau Mynediad ym maes Chwaraeon (y panel)
Caiff ysgoloriaethau eu dyfarnu i ymgeiswyr sydd, ym marn y panel, wedi dangos (i) bod ganddynt allu eithriadol mewn maes chwaraeon penodol a (ii) eu bod hefyd yn bodloni'r gofyniad derbyn ar gyfer y cynllun astudio yr hoffent eu dilyn.
Caiff pob ysgoloriaeth ei dyfarnu yn ôl disgresiwn y panel ac mae'n ddarostyngedig i gystadleuaeth gan ymgeiswyr eraill.
Dyfernir sawl categori o ysgoloriaeth sy'n werth uchafswm o £2,000 ynghyd â buddiannau ychwanegol posibl (a restrir ym mhroffiliau'r ysgoloriaethau ar wefan Prifysgol Abertawe). Y panel sy'n dewis y math o ysgoloriaeth a ddyfernir a swm y gynhaliaeth a roddir, yn seiliedig ar geisiadau unigol.
Gall y panel ddefnyddio pa ddull asesu bynnag sy'n briodol, yn ei farn ef, i benderfynu pa ymgeiswyr y dylid eu hargymell i'r pwyllgor ar gyfer ysgoloriaeth.
Gall yr ysgoloriaethau gael eu dyfarnu ar yr un pryd ag unrhyw ddyfarniad arall neu yn ychwanegol at unrhyw ddyfarniad arall y gall deiliad yr ysgoloriaeth ei gael gan gyrff addysg lleol a/neu gyrff dyfarnu grantiau eraill.
Pennir Goruchwylydd Ysgoloriaeth Chwaraeon i bob Ysgolor ar ddechrau ei gwrs. Caiff y dyfarniad ariannol ei dalu i'r Ysgolor mewn dau randaliad bob blwyddyn. Dim ond ar ôl cynnal cyfarfod cychwynnol i bennu targedau neu gyfarfodydd adolygu dilynol, ac ar ôl i'r taliad gael ei gymeradwyo gan y Goruchwylydd Ysgoloriaeth Chwaraeon, yn seiliedig ar gyflawniadau a nodau'r Ysgolor, y caiff y taliadau eu gwneud.

Yn ychwanegol at hyn, bydd y Goruchwylydd Ysgoloriaeth Chwaraeon yn gwneud y canlynol

Yn negodi rhaglen chwaraeon briodol gyda phob Ysgolor sy'n cynnwys nodau ac amcanion y cytunir arnynt ar y cyd.
Yn anfon copi o'r rhaglen i'r pwyllgor bob blwyddyn, ynghyd ag adroddiad ar gynnydd academaidd yr Ysgolor a'i gynnydd ym maes chwaraeon.
Yn cynnal asesiad o gynnydd yr Ysgolor ar ddiwedd pob tymor ac yn awdurdodi unrhyw daliadau fel y bo'n briodol.
Mae ysgoloriaethau ar gael i ymgeiswyr sy'n gwneud cais am gyrsiau Israddedig ac ôl-raddedig llawn amser a rhan amser.
Os bydd y panel o'r farn bod ymgeiswyr penodol wedi cyrraedd yr un lefel o ran cyrhaeddiad, ceidw'r hawl i rannu dyfarniad.
Gall yr ysgoloriaethau a ddyfernir eu hadnewyddu ar gyfer pob blwyddyn o'r cwrs a ddewisir gan y myfyriwr, yn amodol ar berfformiad chwaraeon ac academaidd boddhaol, fel y'i dyfernir gan y pwyllgor yn seiliedig ar argymhellion y Goruchwylydd Ysgoloriaeth Chwaraeon.
Os bydd angen i Ysgolor ailadrodd blwyddyn astudio, ni wneir unrhyw daliadau yn ystod y cyfnod hwn.
Lle y bo'n briodol, disgwylir i Ysgolorion gynrychioli'r brifysgol yn ystod tymor arfer y brifysgol. Yn dibynnu ar yr ysgoloriaeth a ddyfernir, gellir nodi sawl gwaith y disgwylir i'r Ysgolor gynrychioli'r brifysgol wrth bennu ei dargedau. Gall y taliadau gael eu hatal nes bod y targedau hyn wedi'u cyflawni. Mewn unrhyw gystadlaethau agored, dylai'r Ysgolor gynrychioli'r Brifysgol cyn iddo fynd ati i gynrychioli unrhyw glybiau neu sefydliadau eraill.
Mae'n rhaid i Ysgolorion ymddwyn mewn ffordd sy'n gydnaws â'u statws breintiedig ac enw da Prifysgol Abertawe.
Os bydd y Goruchwylydd Ysgoloriaeth Chwaraeon yn ystyried bod cynnydd Ysgolor, neu ei ymddygiad, yn anfoddhaol, gellir terfynu'r ysgoloriaeth neu ei atal am gyfnod penodol. Os bydd Ysgolor o'r farn nad yw'r penderfyniad i derfynu neu atal ei ysgoloriaeth yn gyfiawn, gall apelio yn ysgrifenedig i gadeirydd y pwyllgor.
Ceidw'r Senedd yr hawl i greu, diwygio, gohirio, canslo neu dynnu'r rheoliadau hyn yn ôl ynghyd â rheoliadau eraill o'r fath a allai fod ar waith o bryd i'w gilydd heb rybudd a bydd penderfyniadau o'r fath yn derfynol.
Cytunir ar becynnau ariannol a buddiannau unigol gyda'r Ysgolor yn y cyfarfod cychwynnol gyda'r Goruchwylydd Ysgoloriaeth Chwaraeon, yn seiliedig ar anghenion yr Ysgolor.

Dewch i gwrdd â rhai o'n HYSGOLORION chwaraeon

Lewis Fraser

Nofio – Peirianneg Sifil Ail Flwyddyn

Cyflawniadau uchaf:

Pencampwr Gemau Ieuenctid y Gymanwlad.
Medal Efydd yn y Bahamas 2017.
Rwyf wedi cyrraedd rownd derfynol iau Ewrop ddwywaith ac mae gennyf 2 wobr uwch yng Nghymru.

Chloe Davies Cai Davies Rhian Evans Ioan Wall

Angen rhagor o wybodaeth?

Os oes gennych gwestiwn neu gŵyn sy'n ymwneud â'r ffordd y caiff yr Ysgoloriaethau a'r Bwrsariaethau Mynediad Chwaraeon eu gweithredu neu unrhyw agwedd arall arnynt, dylech anfon y cwestiwn neu'r gŵyn yn ysgrifenedig at Alun Davies, Pentref Chwaraeon, Prifysgol Abertawe, Parc Singleton, Abertawe, SA2 8PP

Os oes gennych gwestiwn am gymhwysedd neu'r hyn y mae bod yn Ysgolor Chwaraeon yn ei olygu, cysylltwch â Alun Davies, Swyddog Cefnogi Athletwyr, Alun.Davies@swansea.ac.uk