Sylwer bod y dudalen hon wedi cael ei harchifo ac nid yw'n cael ei diweddaru mwyach.
Mae byd llenyddiaeth yn galaru dros un o awduron gorau Cymru, Nigel Jenkins, a fu farw yn oriau mân 28 Ionawr, yn 64 oed.
Yr Athro Cysylltiol Jenkins oedd Cyfarwyddwr Rhaglen Gradd Feistr Ysgrifennu Creadigol Prifysgol Abertawe, y dysgodd er 2003.
Roedd yn fardd ac awdur creadigol a ffeithiol arobryn, yn ogystal â newyddiadurwr, golygydd a darlledwr.
Magwyd Nigel Jenkins ar fferm yng Ngŵyr a bu'n byw yn y Mwmbwls. Ysgrifennodd am ei gariad at yr ardal yn ei lyfrau 'Real Swansea' (Llyfrau Seren, 2008), 'Real Swansea 2', a 'Gower' (Gomer, 2009).
Meddai'r Is-ganghellor, yr Athro Richard Davies, "Teimlwyd presenoldeb awdurdodol Nigel yn y Brifysgol ym mhell y tu hwnt i'w adran. Er enghraifft, ysgrifennodd gerdd ddathlu ar gyfer diwrnod graddio, a daeth yn rhan annatod o'n seremonïau graddio. Pan fyddai'n darllen y gerdd ei hun, roedd yn ddrama afaelgar."
Disgrifiodd y nofelwr, yr Athro Stevie Davies, cyd-sylfaenydd MA Ysgrifennu Creadigol Abertawe, Nigel Jenkins fel "athro ysbrydoledig, awdur eithriadol a gwir ffrind i awduron, beirdd, dramodwyr ac artistiaid o bob math ledled Cymru a'r tu hwnt.
"Roedd y staff a'r myfyrwyr, presennol ac yn y gorffennol, yn dwlu arno, a byddwn yn gweld ei eisiau'n fawr."
Nigel Jenkins oedd cyd-olygydd Gwyddoniadur Cymru yr Academi Gymreig (Gwasg Prifysgol Cymru, 2008). Enillodd wobr Llyfr y Flwyddyn Cyngor Celfyddydau Cymru ym 1996 gyda'i lyfr teithio, 'Gwalia in Khasia'.
Mae ei weithiau barddoniaeth a rhyddiaith lu yn cynnwys:
Remember Tomorrow (Beekman, 1997)
Ambush (Gwasg Gomer, 1998)
Footsore on the Frontier - Selected Essays and Articles (Gwasg Gomer, 2001)
Through the Green Door: Travels among the Khasis (Penguin, 2001)
Blue (Planet, 2002)
Hotel Gwales (Gwasg Gomer, 2006)
O For a Gun (Planet, 2007)
Ym 1997, cyflwynodd raglen deledu BBC Wales, Kardomah Boys, am Dylan Thomas a'i gyd-artistiaid yn Abertawe.
Fel darlithydd a thiwtor gweithiodd i nifer o sefydliadau, gan gynnwys Coleg y Drindod, Caerfyrddin; Cymdeithas Addysgol y Gweithwyr; a Thŷ Newydd, Canolfan Awduron Genedlaethol Cymru yng Ngwynedd.
Bu farw Nigel Jenkins yn Nhŷ Olwen wedi salwch byr.
Bydd ysgrif goffa a manylion ei angladd i ddilyn.
- Dydd Gwener 7 Chwefror 2014 17.00 GMT
- Dydd Gwener 7 Chwefror 2014 16.48 GMT
- Swansea University