Wrth i'ch myfyrwyr agosáu at ddyddiad cau UCAS ar 31 Ionawr, efallai eu bod yn pendroni beth sy'n digwydd nesaf. Darperir y rhan fwyaf o gynigion erbyn mis Mai, ond nid yw hynny'n golygu bod rhaid iddynt groesi bysedd ac aros yn dawel.
Er mwyn helpu myfyrwyr i ddeall beth fydd yn digwydd nesaf, dechreuwch egluro'r gwahaniaeth rhwng cynigion amodol a diamod. Cynigion amodol sydd fwyaf cyffredin, sy’n golygu bod myfyriwr wedi’i dderbyn ar gwrs ar yr amod ei fod yn derbyn y graddau a nodir yn y cynnig. Fel arall, mae cynigion diamod yn gadarnhad ar unwaith o le ar gwrs, a all fod yn seiliedig ar botensial academaidd, cymwysterau a enillwyd eisoes neu amgylchiadau esgusodol. Bydd angen iddynt ddeall mai dim ond dau gynnig y gellir eu dewis; eu dewis cyntaf yw eu dewis cadarn, a'u hail ddewis yw eu dewis yswiriant. Rwy’n argymell bod myfyrwyr yn rhoi cynnig cyraeddadwy fel eu dewis yswiriant, fel y gallant ddisgyn yn ôl ar hyn os na chaiff graddau cynnig cadarn mwy uchelgeisiol eu cyflawni.
I helpu gyda’r penderfyniad hwn, bydd prifysgolion yn cynnal diwrnodau agored yn nhymor y Gwanwyn lle gall myfyrwyr glywed sgyrsiau gan academyddion, ymweld â chyfleusterau’r campws a sgwrsio â myfyrwyr presennol. Rwy’n cynghori myfyrwyr yn gryf i ymweld â diwrnodau agored ar gampws lle bo modd i gael teimlad o amgylchedd y brifysgol ac ymweld â’r ardal leol. Gall myfyrwyr hefyd gael eu gwahodd i ddiwrnodau ymweld ymgeiswyr rhwng Chwefror ac Ebrill gan brifysgolion y maent yn derbyn cynigion ganddynt. Mae'r ymweliadau hyn yn rhoi golwg fanylach ar yr adran a gallant gynnwys darlithoedd rhagflas a seminarau yn eu pynciau. Os na chaiff myfyrwyr eu gwahodd i ddiwrnod ymgeiswyr, gallant barhau i chwilio am sesiynau blas ar-lein i gael profiad o addysgu ar lefel prifysgol. Yn Abertawe, rydym yn cynnal Cyfres Dosbarthiadau Meistr yn nhymhorau'r Gwanwyn a'r Hydref, lle gall myfyrwyr wrando ar ein hacademyddion a chael atebion uniongyrchol i unrhyw gwestiynau gan yr adran.
Rhwng Ionawr a Mawrth, bydd myfyrwyr sy’n gwneud cais am raddau proffesiynol (meddygaeth, nyrsio, gwaith cymdeithasol, addysg) a graddau seiliedig ar dalent (celf, cerddoriaeth, dylunio) hefyd yn cael eu gwahodd i gyfweliadau. Bydd paratoi ar gyfer y rhain ar ôl gwneud cais yn sicrhau bod y myfyriwr wedi cael amser i wneud ymchwil o amgylch eu maes pwnc, gwerthoedd a chyfleusterau'r brifysgol, ac unrhyw gwestiynau y gellid eu gofyn. Bydd y brifysgol eisiau gwybod beth all y myfyriwr ei gynnig i’r sefydliad, felly mae’n bwysig iddynt werthu eu hunain a meddwl am arddangos sgiliau allweddol mewn tasgau ymarferol neu grŵp.
Byddai hefyd yn ddefnyddiol esbonio UCAS Extra i'ch myfyrwyr, a all roi sicrwydd i fyfyrwyr sy'n nerfus ynghylch derbyn cynigion. Mae UCAS Extra yn agor ar 28 Chwefror 2024 ac mae ar gael i fyfyrwyr nad ydynt wedi derbyn unrhyw gynigion ac nad ydynt yn aros am ragor o benderfyniadau. Mae'n caniatáu i'r myfyrwyr hyn wneud cais am chweched gwrs erbyn 4 Gorffennaf 2024, ac ar yr adeg honno bydd y broses hon yn cau a bydd Clirio yn agor.
